Pangutana
◼ Angay bang mag-ampo panahon sa pagtuon sa Bibliya diha sa ganghaan?
Sanglit nagkalainlain man ang mga kahimtang, ang nagdumala sa pagtuon kinahanglang mogamit ug salabotan sa pagdesidir kon mag-ampo ba panahon sa pagtuon sa Bibliya diha sa ganghaan. Ang usa ka butang nga pagatagdon mao ang kagikanan sa gitun-an. Ang Abril 2005 nga Atong Ministeryo sa Gingharian, panid 8, nag-ingon: ‘Tukma nga buksan ug tiklopan sa pag-ampo ang usa ka establisado nang pagtuon. Sagad natong mahimo kini sa unang pagtuon mismo uban sa mga tawong relihiyoso. Bahin sa uban, basin kinahanglan natong sabton ang nahiangayng panahon sa paghimo sa pag-ampo.’
Ang laing butang nga pagatagdon mao ang dapit diin kamo nagtuon. Kon adunay gamayng pribasiya, ang mubong pag-ampo ikatanyag nga mabinantayon sa pagsugod ug pagtiklop sa pagtuon. Ugaling, kon ang pag-ampo makadani sa pagtagad sa mga tumatan-aw o ang gitun-an mobatig kahigwaos, nan labing maayo ang paghulat hangtod ang pagtuon mahimo diha sa dapit nga adunay mas dakong pribasiya sa dili pa himoon ang pag-ampo.
◼ Angay bang magpandong ang usa ka sister kon siya may kauban nga lalaking magmamantala panahon sa pagtuon sa Bibliya diha sa ganghaan?
Oo. Sa dihang ang usa ka sister magdumalag regular, naeskedyul nga pagtuon sa Bibliya ug presente ang usa ka lalaki nga magmamantala sa Gingharian, angay siyang magpandong. (1 Cor. 11:3-10) Matuod kini bisan kon ang pagtuon gidumala sulod sa usa ka balay, diha sa ganghaan, o sa ubang dapit. Ang Hulyo 15, 2002, nga gula sa Ang Bantayanang Torre, panid 27, nagpatin-aw: “Kini maoy nahikay nang daan nga sesyon sa pagpanudlo diin ang tigdumala sa pagtuon maoy aktuwal nga nagdumala. Ubos sa maong mga kahimtang, ang pagtuon mahimong usa ka dugtong sa kongregasyon. Kon usa ka babaye nga bawtismadong Saksi ang nagdumala sa maong pagtuon nga may presenteng usa ka lalaki nga bawtismadong Saksi, angay siyang magpandong.” Ang samang butang mapadapat kon mokuyog kaniya ang dili-bawtismadong lalaki nga magmamantala.
Sa laing bahin, kon ang pagtuon sa Bibliya diha sa ganghaan dili pa establisado, ang sister dili kinahanglang magpandong kon presente ang usa ka lalaki nga magmamantala sa Gingharian, bisan pa kon ang katuyoan sa pagbalik-duaw mao ang pagpasundayag sa pagtuon sa Bibliya o paghisgot ug impormasyon diha sa usa sa rekomendadong mga basahon sa pagtuon. Sanglit ang mga pagtuon diha sa ganghaan kasagarang inanay nga maestablisar, pinaagig serye sa progresibong mga pagbalik-duaw, ang mga magmamantala kinahanglang magtagad sa mga kahimtang ug magmakataronganon sa pagtino kon kanus-a siya angayng magpandong.