Makasugod Ka bag Usa ka Pagtuon sa Bibliya sa Septiyembre?
1. Unsang linaing paningkamot ang atong himoon sa Septiyembre, ug unsay nalangkit niini?
1 Sa Septiyembre kita mohimog linaing paningkamot sa pagsugod ug mga pagtuon sa Bibliya sa unang duaw ginamit ang librong Gitudlo sa Bibliya. Unsay nalangkit niini? Gawas pa sa pagpahimutang sa libro, kita maningkamot sa paghisgot ug pipila ka parapo uban sa tagbalay ug hikayon nga ipadayon ang panaghisgot sa sunod nga mga duaw.
2. Unsaon nato paggamit ang panid 4 ug 5 sa librong Gitudlo sa Bibliya aron makasugod ug panaghisgot sa Bibliya?
2 Makasugod kita pinaagi sa pagpakli ngadto sa mga ilustrasyon sa panid 4 ug 5 sa libro ug moingon, “Dili ba nindot kaayo kon ang mga kausaban nga gipakita dinhi mahitabo gayod?” Paminawa pag-ayo ang tubag. Kon magpakitag interes ang tagbalay sa usa sa mga ulohan, ipakita kaniya kon unsay tinuod nga gitudlo sa Bibliya bahin sa maong ulohan pinaagi sa paghisgot sa parapo o mga parapo diha sa libro nga naghisgot nianang tekstoha. Pananglitan, kon interesado siya nga mawala na ang mga sakit sumala sa gitagna sa Isaias 33:24 o sa 35:5, 6, paklia ang panid 36 ug hisgoti ang parapo 22.
3. (a) Kon ikaw naggamit ug presentasyon nga susama sa gisugyot sa parapo 3, unsay sanong sa tagbalay? (b) Unsa pang mga presentasyona ang imong gigamit sa imong pagpaningkamot nga makasugod ug usa ka pagtuon sa Bibliya sa unang duaw?
3 Ang mga presentasyon nga dali ra kitang makasugod ug panaghisgot sa Bibliya ginamit ang maong libro mahimong epektibo. Sanglit kadaghanang tawo gustong makabaton ug malipayon nga pamilyahanong kinabuhi, mahimong pangutan-on mo ang tagbalay, “Sa imong hunahuna, ang pagpadapat ba niining tambaga sa Bibliya makatabang sa mga tawo nga makapahimulos ug malipayon nga pamilyahanong kinabuhi?” Basaha ang Efeso 5:33, ug dayon patubaga. Ang pasiunang mga pangutana sa kapitulo 14 mahimong makadani sa pagtagad sa maong tawo, nga magtugot kanimo sa paghisgot sa unang duha ka parapo. Samtang hisgotan mo ang impormasyon, ikaw nagsugod nag usa ka pagtuon sa Bibliya.
4. Kon makasugod kitag usa ka pagtuon sa Bibliya sa unang duaw, unsaon nato paghikay nga mapadayon ang panaghisgot?
4 Hikaya nga Mobalik: Sa dihang taposon ang unang pagtuon, makahikay ka sa pagpadayon sa panaghisgot pinaagi sa pag-ingon: “Sa pipila lang ka minutos, atong nakat-onan kon unsay gitudlo sa Bibliya bahin sa usa ka hinungdanong ulohan. Sa sunod higayon, atong mahisgotan [pagbilin ug pangutana nga pagahisgotan]. Mahimo ba kong moduaw niining orasa gihapon sa sunod semana?” Paghimog tinong mga kahikayan sa pagbalik, ug paneguroa nga tumanon ang gikasabotan. (Mat. 5:37) Sa dihang matukod na ang usa ka regular nga pagtuon, tun-i ang libro sa sistematikong paagi sugod sa sinugdan hangtod sa kataposan.
5. Unsay angay natong himoon kon ang tagbalay dili modawat ug pagtuon sa Bibliya sa unang duaw?
5 Kon makapahimutang kag usa ka kopya sa librong Gitudlo sa Bibliya apan ang tagbalay dili modawat ug pagtuon sa unang duaw, baliki siya uban ang tumong nga makasugod ug pagtuon sa Bibliya.