Pangutana

◼ Haom ba nga maghikay ug mga baligyang subasta o uban pang mga kalihokan aron makakuhag pondong salapi nga itabang sa kongregasyon?

Naandan na sa mga relihiyosong organisasyon ang paghikay ug mga salosalo, mga baligya, o mga kalingawan aron makakuhag pondong salapi. Bisan tuod nagtuo ang uban nga kini adunay maayong katuyoan, ang maong mga kalihokan katumbas ra sa pagpangolektag salapi. Ang mga Saksi ni Jehova dili magkuhag pinansiyal nga suporta pinaagi niini.

Ang ikaduhang gula sa Watch Tower, sa Agosto 1879, nag-ingon bahin sa wala nato pagsundog sa mga relihiyon ug sa walay pagpangolektag salapi: “Kami nagtuo nga ang nagpaluyo sa ‘Zion’s Watch Tower’ mao si JEHOVA, ug tungod niini kini dili gayod magpakilimos ni mohangyo sa mga tawo alang sa suporta. Sa dihang Siya nga nagaingon: ‘Ang tanang bulawan ug salapi sa kabukiran akoa,’ dili makahatag sa kinahanglanong salapi, among sabton nga mao na kana ang panahon sa paghunong sa pagpatik.”

Kita magpadayon sa pagsunod sa Kasulatanhong prinsipyo: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2 Cor. 9:7) Ang mga kahon alang sa amot gibutang diha sa Kingdom Hall aron si bisan kinsa nga gustong moamot makahatag sa ilang boluntaryong mga donasyon. (2 Hari 12:9) Ang mga donasyon wala kolektaha; ni kini gihatag aron adunay madawat isip balos.