Pagplano na Karon sa Pag-oksilyare Payunir!
1. Nganong angay kitang maghimog mga tumong para sa umaabot nga tuig?
1 Kita kinahanglang maghimog mga tumong kon gusto natong mouswag sa espirituwal. Unsang personal nga mga tumong ang imong gihimo para sa umaabot nga tuig? Ang usa ka maayo kaayong tumong mao ang pag-oksilyare payunir. Tungod kay kining makalingaw nga kalihokan kasagarang nagkinahanglan ug abanteng pagplano, karon na ang maayong panahon sa pagplano bahin niini. Nganong angay mang hunahunaon ang pag-oksilyare payunir ingong tumong?
2. Nganong angayng palandongon ang pag-oksilyare payunir ingong tumong?
2 Ang pag-oksilyare payunir magpaarang kanato sa pag-alagad nga “mas bug-os pa” sa atong langitnong Amahan pinaagi sa paggugol ug mas daghang panahon diha sa ministeryo. (1 Tes. 4:1) Samtang atong palandongon ang tanang nahimo ni Jehova alang kanato, ang atong mga kasingkasing mapalihok sa ‘pagtanyag kanunay sa Diyos ug halad sa pagdayeg.’ (Heb. 13:15; 1 Juan 4:9, 10) Siyempre, ang pag-oksilyare payunir nagkinahanglan nga kita mosakripisyog panahon ug kusog. Si Jehova nahibalo gayod sa atong indibiduwal nga mga kahimtang ug sa personal nga mga pagsakripisyo nga atong himoon sa pag-alagad kaniya. (Heb. 6:10) Kita malipay gayod sa pagkahibalo nga ang atong kakugi gikahimut-an ni Jehova.—1 Cron. 29:9; Isa. 65:14.
3, 4. Sa unsang paagi kita makakuhag kaayohan sa pag-oksilyare payunir?
3 Mga Kaayohan: Kon kanunay nimong buhaton ang usa ka butang, kasagaran nga kini mahimong mas sayon ug mas makalingaw. Ang paggugol ug mas daghang panahon sa ministeryo magpahimo kanimo nga mas relaks diha sa pultahan. Ikaw mas mahanas sa pagsugod ug mga panaghisgot ug sa paggamit sa imong Bibliya. Kon kanunay kang makighisgot bahin sa imong pagtuo, mas molig-on pa kini. Daghan nga walay gidumalahan ug pagtuon sa Bibliya ang nakasugod ug usa samtang nag-oksilyare payunir.
4 Ang pag-oksilyare payunir mahimong usa usab ka panukmod nga gikinahanglan aron mausab ang atong tinamdan kon ang atong pag-alagad daw makapuol na. Usa ka regular payunir kanhi nga puliki kaayo sa sekular nga trabaho ang nakahukom sa pag-oksilyare payunir sa usa ka bulan. Siya miingon: “Dili ako makatuo nga ang usa ka bulan nakapadasig pag-ayo kanako sa espirituwal! Mihimo akog mga kahikayan aron padayon akong makaoksilyare payunir, hangtod nga ako nahimong regular payunir pag-usab.”
5. Sa unsang paagi atong mabuntog ang pipila ka kasagarang mga babag sa pag-oksilyare payunir?
5 Buntoga ang mga Babag: Magpanuko ang uban sa pag-oksilyare payunir tungod kay sila mibati nga kulang sa katakos ingong mga magwawali. Kon kini ang nakapugong kanimo, hinumdomi nga si Jehova makatabang kanimo. Bisan pag si Moises “mahinay sa baba ug mahinay sa dila,” siya gigamit ni Jehova sa pagpalampos sa Iyang kabubut-on. (Ex. 4:10-12) Kon ikaw nag-antos sa mga suliran sa panglawas o may puliking eskedyul, ayaw dayog hunahunaa nga dili ka makaoksilyare payunir. Ang pagkab-ot sa kinahanglanong oras mahimong sayon ra kay sa imong gihunahuna. Ang singkuwenta ka oras sa usa ka bulan nagpasabot ug aberids nga wala pay duha ka oras sa usa ka adlaw. Makaoksilyare payunir ka kon ikaw may makataronganong eskedyul. Kon ikaw may puliking eskedyul, tingali mahimo nimong buhaton ang di-hinungdanong mga kalihokan pagkasunod bulan. Ang uban nga may bug-os-panahong trabaho nakaoksilyare payunir pinaagi sa pagbakasyon ug usa o duha ka adlaw.—Col. 4:5.
6. Nganong mapuslanon nga iampo ang bahin sa pag-oksilyare payunir?
6 Kon Unsaon Paghimo Kana: Kon dili ka seguradong makaoksilyare payunir, iampo kining butanga. (Roma 12:11, 12) Hangyoa si Jehova sa pagpanalangin sa imong mga paningkamot sa pagpalapad sa imong ministeryo. Siya makatabang kanimo sa paghimog maalamong mga desisyon sa pagpasibo sa imong eskedyul. (Sant. 1:5) Kon ikaw nakulangan sa tinguha, hangyoa si Jehova sa pagtabang kanimo nga magmalipayon sa buluhatong pagsangyaw. (Luc. 10:1, 17) Kon mobati kang walay katakos, pangamuyo kang Jehova alang sa kaisog.—Buh. 4:29.
7. Sa unsang paagi ang pagpadapat sa Proverbio 15:22 makapaarang sa usa ka membro sa pamilya sa pag-oksilyare payunir?
7 Hisgoti uban sa pamilya ang tumong nga mag-oksilyare payunir. (Prov. 15:22) Tingali usa ka membro sa pamilya ang makaoksilyare payunir pinaagi sa pagpaluyo sa mga membro sa panimalay. Pananglitan, ang mga membro sa pamilya mahimong magpulipuli sa pag-uban sa oksilyare payunir sa magabii o sa mga hinapos sa semana. Sila mahimong motabang sa mga buhatbuhaton sa balay nga naandang himoon sa nag-oksilyare payunir. Dugang pa, pakigsultihi ang uban diha sa kongregasyon, ilabina kadtong adunay sama nimog kahimtang, nga ikaw gustong magpayunir. Kini mahimong makapatunghag dugang kadasig ug suporta.
8. Unsang mga bulana ang mahimo nimong pilion nga maka-oksilyare payunir?
8 Tan-awa ang 2007 nga kalendaryo, ug susiha kon kanus-a ka makaoksilyare payunir. Kon ikaw may bug-os-panahong trabaho o nag-eskuyla, mahimo mong susihon ang mga bulan nga may ekstrang Sabado, ekstrang Dominggo, o pista opisyal. Ang Marso ug Hunyo adunay lima ka Sabado, ug ang Abril ug Hulyo adunay lima ka Dominggo. Ang Septiyembre ug Disyembre adunay tagilma ka Sabado ug Dominggo. Hunahunaa usab ang mga bulan nga kasagarang maayo ang panahon. Buot tingali nimong magpayunir panahon sa bulan nga ang magtatan-aw sa sirkito moduaw sa inyong kongregasyon. Kon makapili ka nag mga bulan nga gusto nimong mag-oksilyare payunir, pagsulat dayon ug eskedyul nga makapaarang kanimo sa pagkab-ot sa kinahanglanong oras.
9. Unsay atong mahimo kon kita dili gayod makaoksilyare payunir?
9 Tingali pagkahuman nimog ‘kuwenta pag-ayo sa gasto,’ ikaw dili makaoksilyare payunir sa umaabot nga mga bulan. (Luc. 14:28) Apan, mahuptan mo gihapon ang espiritu sa pagpayunir. Padayona ang pagbuhat sa imong maarangan diha sa ministeryo, nga masaligon nga si Jehova malipay kon imong ihatag kaniya ang imong kinamaayohan. (Luc. 21:1-4) Basin mausab ang imong mga kahimtang, ug ikaw makaoksilyare payunir sa umaabot. Kasamtangan, paluyohi ug dasiga kadtong makahimo sa pagpahimulos niining matanga sa pag-alagad. Imo pa ganing mapasibo ang imong eskedyul aron makauban kanila sa ministeryo ug usa ka adlaw sulod sa semana.
10. Nganong kita angayng magbaton ug pagbati sa pagkadinalian?
10 Ang katawhan ni Jehova adunay pagbati sa pagkadinalian. Kita adunay buluhaton nga kinahanglang taposon—ang pagsangyaw sa maayong balita. Mga kinabuhi ang nalangkit, ug hamubo na lang ang nahibiling panahon. (1 Cor. 7:29-31) Ang gugma alang sa Diyos ug sa silingan mopalihok kanato sa pagbuhat kutob sa atong maarangan diha sa ministeryo niining tuiga. Uban ang paningkamot ug maayong pagplano, ikaw makaoksilyare payunir.