Pamatuod sa Malig-ong Pagtuo!
1. Unsang makalilisang nga mga hitabo ang gitagna ni Jesus?
1 Ang mga apostoles idlot nga namati kang Jesus samtang siya naghisgot bahin sa iyang presensiya ug sa konklusyon sa sistema sa mga butang. Maagoman sa katawhan ang makalilisang nga mga hitabo—mga gubat, kanihit sa pagkaon, linog, kamatay. Dayon, miingon si Jesus nga ang iyang mga sumusunod pagadumtan, pagasakiton, ug pagapatyon. Motungha ang mini nga mga manalagna nga magpahisalaag sa daghan. Mobugnaw ang gugma sa kadaghanan.
2. Nganong makapahingangha nga ang maayong balita ginasangyaw sa tibuok kalibotan?
2 Luyo niining tanan, lagmit natingala ang mga apostoles sa dihang si Jesus sunod nga miingon nga ang maayong balita sa Gingharian sa Diyos igawali sa tibuok gipuy-ang yuta. (Mat. 24:3-14) Nakita nato karon ang makapahinganghang katumanan nianang makaiikag nga tagna. Bisan pag nagkinabuhi kita sa makuyaw nga panahon, ang mga Saksi ni Jehova masibotong nagmantala sa maayong balita. Samtang nagkabugnaw ang gugma sa kalibotan, ang atong gugma nagkainit. Bisan pag gidumtan sa “tanang kanasoran,” kita nagsangyaw sa halos tanang nasod.
3. Unsang makapadasig nga bahin ang imong nakita sa tibuok-kalibotang taho?
3 Makapadasig gayod ang pagrepaso sa kalihokan sa mga Saksi ni Jehova sa miaging tuig sa pag-alagad nga makita sa tsart sa panid 3 ngadto sa 6! Matag tuig, kapin sa usa ka bilyong oras ang atong gigugol sa pagsangyaw ug paghimog mga tinun-an. Kini ang kahimtang sulod na sa 16 ka tuig. Pamatuod gayod kana sa atong malig-ong pagtuo! Ang gidaghanon sa mga payunir miuswag ug 5.8 porsiyento, 3.1 porsiyento sa mga magmamantala, ug 4.4 porsiyento sa mga pagtuon sa Bibliya. Mas taas ug 20.1 porsiyento ang gidaghanon sa nabawtismohan kay sa miaging tuig. Makapalipay gayod ang pagkahibalo nga duolan na sa pito ka milyon ang matinumanong nagaalagad kang Jehova—mas daghan karon kay sukad masukad! Sa imong pagsusi sa tsart, unsay imong nakita nga ilabinang nakapadasig kanimo?
4. Unsa nga mga bisyo ang gibuntog sa usa ka tawo samtang naningkamot siyang magpabawtismo?
4 Bisan tuod dalayegon ang maong mga pag-uswag, angay natong hinumdoman nga kini nagrepresentar sa mga tawo nga nagpamatuod sa ilang pagtuo. Tagda pananglitan si Guillermo nga nagdako sa Bolivia. Siya natawo niadtong 1935, ug nagtrabaho sa plantasyon sa coca sukad nga siya nagpangedarog nuybe anyos. Sukad sa iyang pagkabata, siya nagmama ug mga dahon sa coca aron mahupayan sa iyang kahago. Sa ulahi siya naghuboghubog ug nanabako. Sa dihang iyang nakat-onan kon unsay gikinahanglan ni Jehova kaniya, si Guillermo miundang sa pagpanabako ug paghuboghubog. Apan siya nalisdan gayod sa pag-undang sa iyang nakagamot nang bisyo sa pagmama ug mga dahon sa coca. Wala siya molunga sa pag-ampo mao nga iyang nabuntog kining bisyoha. Iyang gibiyaan ang iyang mga bisyo, ug siya nabawtismohan. Siya nag-ingon, “Karon, ako mibati nang hinlo ug malipayon gayod.”
5. Unsay imong gitinguha?
5 Si Jehova interesado gayod sa mga tawo. Iyang gitinguha nga ang tanan maghinulsol. (2 Ped. 3:9) Mao usab kana ang atong gitinguha. Hinaot nga palihokon kita sa atong mga kasingkasing sa paghimo sa atong maarangan nga padayong tabangan ang mga tawong matinud-anog-kasingkasing, aron sila usab makaila ug mahigugma kang Jehova.