Repaso sa Teokratikanhong Tunghaan sa Ministeryo
Ang mosunod nga mga pangutana pagatagdon sa Teokratikanhong Tunghaan sa Ministeryo sa semana nga magsugod sa Pebrero 25, 2008. Dumalahon sa magtatan-aw sa tunghaan ang 30-minutos nga repaso pinasukad sa materyal nga gikobrehan sa mga asaynment sa mga semana sa Enero 7 hangtod sa Pebrero 25, 2008. [Matikdi: Kon walay reperensiya human sa pangutana, kinahanglang manukiduki ka aron makaplagan ang mga tubag.—Tan-awa ang Tunghaan sa Ministeryo, p. 36-7.]
MGA HIYAS SA PAGPANULTI
1. Unsay kinahanglan natong himoon sa pagtabang sa atong mamiminaw nga makasabot sa kahulogan sa mga teksto, ug nganong angay kining himoon? [be p. 228 par. 2-3] Kinahanglang gahinan natog panahon ang pagpatin-aw ug pagpadapat sa mga teksto nga atong basahon. Sa pagbuhat niana atong gipatin-aw ang kahulogan sa kasulatan. (Neh. 8:8, 12) Pinaagi sa pagpakita sa kapadapatan sa mga teksto, kita nagtabang sa mamiminaw sa pagkakita kon sa unsang paagi ang impormasyon makaimpluwensiya sa ilang kinabuhi.
2. Nganong mahinungdanon nga himoon natong matulon-anon ang mga presentasyon alang sa atong mamiminaw, ug sa unsang paagi ato kining mahimo? [be p. 230 par. 3-5, kahon] Lagmit dili interesadong maminaw ang mga tawo kon ang atong isulti kanila mao lamang ang mga butang nga ila nang nahibaloan. Ang atong tumong mao ang pagpukaw sa hunahuna sa mamiminaw ug pagpabati kanila nga sila may nakat-onan nga mapuslanon. Mahimo nato kini pinaagi sa pagpasibo sa paso sa atong pagpahayag sumala sa nahibaloan sa atong mamiminaw bahin sa atong ulohan—mas paspas alang sa pamilyar na nga mga punto ug mas hinay alang sa bag-ong mga punto.
3. Sa unsang mga paagi makatabang ang panukiduki aron mahimong mas matulon-anon ang atong mga pakigpulong? [be p. 231 par. 1-3] Ang panukiduki makatabang kanato sa pagpresentar ug makaiikag nga mga detalye imbes pagsultig katibuk-ang impormasyon. Basin makakaplag kitag dili-kaayo sinating hitabo sa kasaysayan o bag-ong balita nga makailustrar sa punto nga giplano natong hisgotan.
4. Unsay atong himoon aron mahimong mas matulon-anon ang atong paghisgot sa sinati nga mga teksto? [be p. 231 par. 4-5] Kinahanglang mogahin kitag panahon sa pagpalapad sa espesipikong mga bahin sa teksto nga atong hisgotan. Ipasiugda ang mga pulong nga may kalabotan sa tema. Pananglitan, kon maghisgot sa Miqueas 6:8, mahimo natong ipalapad ang kahulogan sa hustisya o sa pagkamakasaranganon. Mahimo usab natong iilustrar kon unsay gipasabot sa “paghigugma sa kalulot.”
5. Nganong mahinungdanon nga atong isaysay ang teksto nga atong basahon? [be p. 232 par. 3-4] Kon atong isaysay ang Kasulatan, atong matabangan ang mga tawo sa pagbasa sa Pulong sa Diyos nga mas maampingon ug sa pagkasabot sa mga detalye nga lagmit dili nila mamatikdan. (Mat. 22:41-45) Mahimo nato kini pinaagi sa paghisgot sa konteksto sa usa ka kasulatan, sa mga kahimtang panahon sa pagsulat niini, o kon kinsay nagsulti o nagpatalinghog niini.
ASAYNMENT NUM. 1
6. Unsay nagpakita nga ang basahon ni Mateo ilabinang gisulat alang sa mga Hudiyo? [si p. 176 par. 6-7] Ang talaan sa kagikan ni Jesus, nga nagpakita sa iyang aktuwal nga mga katigulangan sugod kang Abraham, ug ang daghang pagkutlo gikan sa Hebreohanong Kasulatan bahin sa pag-abot sa Mesiyas nagpakita nga ang Mateo ilabinang gisulat alang sa mga Hudiyo. Aduna usay ebidensiya nga nagpakita nga gisulat ni Mateo ang iyang Ebanghelyo diha sa Hebreohanong pinulongan.
7. Unsaon nato pag-andam ang atong kasingkasing sa pagdawat ug instruksiyon gikan sa Diyos pinaagi sa mamumulong? (2 Cron. 20:33) [be p. 13 par. 4–p. 14 par. 5] Ang usa ka mahinungdanong paagi sa pag-andam sa atong kasingkasing sa pagdawat ug instruksiyon gikan kang Jehova mao ang pag-ampo alang sa mapasalamatong espiritu. (Sal. 27:4; 95:2) Mahimo usab natong iampo ang pagbaton ug kalinaw sa hunahuna ug kasingkasing aron isalikway ang bisan unsang “makapatugaw nga mga hunahuna” nga makabalda sa atong pagtagad. (Sal. 94:19) Ang pagtan-aw sa mamumulong ug ang pagpakli sa atong Bibliya makatabang aron dili mabahin ang atong pagtagad.
8. Unsay mahimo sa mga ginikanan sa pagbansay sa ilang mga anak aron mahimong “maalamon alang sa kaluwasan”? (2 Tim. 3:15) [be p. 16 par. 3-4] Ang mga ginikanan kinahanglang maningkamot pag-ayo sa pagdala sa ilang mga anak sa mga tigom sa kongregasyon, mga asembliya, ug mga kombensiyon. Diha sa balay, mahimong hikayon sa mga ginikanan nga ang mga bata maglingkod aron sa pagtan-awg mga hulagway diha sa atong Kristohanong mga basahon. Ang mga bata mahimong hatagan ug personal nga mga kopya sa mga basahon nga pagatun-an sa atong mga tigom. Sa ngadtongadto, mahimong tabangan sa mga ginikanan ang ilang mga anak sa pag-andam ug mugbong mga komento.
9. Sa unsang paagi gipasiugda sa Ebanghelyo ni Mateo ang katumanan sa tagna sa Bibliya? [si p. 181 par. 32] Ang Ebanghelyo ni Mateo naundan ug daghang pagkutlo gikan sa Hebreohanong Kasulatan ug kini nagpakita usab kon sa unsang paagi natuman ang maong mga tagna. Pananglitan, ang Mateo 13:14, 15 nagkutlo sa Isaias 6:9, 10; ang Mateo 21:42 nagtumong sa katumanan sa Salmo 118:22, 23; ug ang Mateo 26:31, 56 nagpasiugda sa katumanan sa Zacarias 13:7. Ang maong mga katumanan naghatag kanato ug lig-ong pasikaranan sa pagtuo sa pagka-Mesiyas ni Jesus ug sa mga tagna nga gipamulong mismo ni Jesus nga narekord diha sa Mateo.
10. Kon ang Ebanghelyo ni Mateo naghulagway kang Jesus ingong ang gisaad nga Mesiyas ug Hari, sa unsang paagi siya gihubit sa Ebanghelyo ni Marcos? [si p. 182 par. 7-8] Ang Ebanghelyo ni Marcos naghubit kang Jesus ingong Anak sa Diyos nga naghimog mga milagro ug ingong Manluluwas. Labing menos 19 ka milagro ang narekord niini. Gipasiugda ni Marcos ang mga kalihokan ni Jesus imbes ang iyang mga pagtulon-an. Bisan tuod gilakbitan lamang niini paghisgot ang Balaod ni Moises ug ang talaan sa kagikan ni Jesus, kini nagsaysay sa kostumbre sa mga Hudiyo, nga nagpakita nga gisulat kini ni Marcos ilabina alang sa kaayohan sa mga Romano.
SENEMANANG PAGBASA SA BIBLIYA
11. Mas seryoso ba nga butang ang pagpahungaw sa kasuko kay sa pagpadayon sa pagkapungot? (Mat. 5:21, 22) [w08 1/15 “Ang Pulong ni Jehova Buhi—Mga Pangunang Punto Gikan sa Basahon ni Mateo”] Si Jesus nagpasidaan nga ang ‘padayong pagkapungot sa usa ngadto sa iyang igsoon’ maoy sama ra ka bug-at sa pagbuno. Hinunoa, gaan ra kini kon itandi sa pagpahungaw sa kapungot pinaagi sa pagsultig mga pulong sa pagtamay, kay ang naghimo niana kinahanglang manubag dili sa lokal nga korte sa hustisya kondili ngadto sa Korte Suprema.
12. Sa unsang paagi makahupot ang mga Kristohanon ug ‘yano nga mata’? (Mat. 6:22, 23) [w06 10/1 p. 29] Ang yanong mata sinsero, putli ug motibo, ug walay kadalo ug hakog nga ambisyon. Ang paghupot ug yanong mata wala magpasabot ug pagkinabuhi sa tumang kakabos o pagpasagad sa atong Kristohanong mga responsibilidad. Hinunoa, kini nagpasabot ug pagpakitag “maayong panghunahuna” samtang giuna nato ang pag-alagad kang Jehova. (2 Tim. 1:7)
13. Unsay gipasabot ni Jesus dihang iyang gisukna ang iyang mga tinun-an: “Nasabtan ba ninyo ang diwa niining tanang butanga?” (Mat. 13:51, 52) [w08 1/15 “Ang Pulong ni Jehova Buhi—Mga Pangunang Punto Gikan sa Basahon ni Mateo”] Gipasiugda ni Jesus ang kahinungdanon sa pagkasabot sa mga kamatuoran bahin sa Gingharian. Kadtong mga nakabaton niana nga kahibalo obligado sa pagtudlo ug sa pagpaambit nianang maong bahandi ngadto sa uban.
14. Nganong sagad gipahimangnoan ni Jesus ang iyang mga gipang-ayo sa “dili pagpaila kaniya”? (Mat. 12:16) [w87 5/15 p. 9; cl p. 93-4] Gigamit ni Jesus ang iyang gahom sa hustong paagi. Wala siya maghimog mga milagro alang sa mapagawalong pagpasundayag. (Mat. 4:5-7; Luc. 23:8, 9) Dili niya buot nga ang mga tawo mohimog konklusyon bahin kaniya pinasukad sa makapaukyab nga mga taho.
15. Unsay gipasabot ni Jesus dihang siya naghisgot bahin sa “sukod” nga “ginasukod” sa usa? (Mar. 4:24, 25) [w80 12/15 p. 14; gt kap. 43] Kon hatagan natog diyutayng interes o pagtagad si Jesus, dili kita makadahom nga makakuhag daghan gikan kaniya. Apan kon atong ihatag kaniya ang kinadak-ang sukod sa atong pagtagad, nan siya maghatag kanatog kahibalo ug pagsabot nga sobra pa kay sa atong gidahom. Niining paagiha, kita molambo ug mas makaarang sa pagpaambit nianang maong pagsabot ngadto sa uban.