Pangutana

◼ Nganong gikinahanglan ang maayong panghukom may kalabotan sa paggamit ug telepono alang sa pagpaminaw sa mga tigom sa kongregasyon?

Daghang kongregasyon ang naghimog kahikayan aron makapaminaw sa tigom pinaagig telepono ang mga indibiduwal nga usahay dili makatambong sa mga tigom sa Kingdom Hall tungod sa sakit o uban pang dili kalikayang mga kahimtang. Aron maseguro nga ang maong mahigugmaong tagana mapahimuslan niadtong tinuod nga nanginahanglan niini, gikinahanglan ang maayong panghukom ug kahikayan. Busa, ang mga ansiyano nga nagdumala sa maong kahikayan angayng mag-organisar ug magmonitor sa paggamit niana aron ‘ang tanang butang mahimong hapsay ug pinaagig kahikayan.’—1 Cor. 14:40.

Tinoon gayod sa mga ansiyano nga mahatagag prioridad ang mga magmamantala sa ilang kongregasyon nga may grabeng sakit o kaha dili makagawas sa balay. Ang usa ka magmamantala nga temporaryong nasakit o kaha nahimong baldado, o ang nagmauswagon nga estudyante sa Bibliya kinsa dili makagawas sa balay, mahimong makapahimulos usab niini nga kahikayan ug ilakip sila sa ihap sa mga tumatambong. Kon walay igong linya sa telepono nga magamit niadtong tinuod nga nanginahanglan, ang mga ansiyano makahimo ug laing kahikayan, sama sa pagtaganag rekording sa mga programa sa tigom.

Siyempre, mas daghan gayod ang mga kaayohan kon presente kita sa atong mga tigom. Ang atong pagpakig-uban sa mga igsoon moresulta sa “pagdinasigay” ug makatabang sa mga bag-ohan nga mapabilhan gayod ang panginahanglan sa pagtambong. Kon presente kita sa atong mga tigom, mas masabtan nato ang mga bahin, personal kitang matabangan sa mga ansiyano, ug ato mismong mabati ang mainitong gugma sa kaigsoonan. Tinuod gayod ang pagbati nga gipahayag sa usa ka edarang sister kinsa, human gigakos sa mga igsoon diha sa Kingdom Hall mipatugbaw: “Dili nimo kana masinati sa telepono!”—Roma 1:11, 12.

Sama kang Ana nga “wala gayod mopalta sa templo,” daghan sa atong edarang mga igsoon karon ang presente kanunay sa Kristohanong mga tigom, kon itugot sa ilang panglawas ug mga kahimtang. (Luc. 2:36, 37) Bisan pag ang uban kanila sa popanahon naminaw sa programa nga gikonektar pinaagig telepono, wala nila kana isipa nga mas kombenyenteng kapuli sa pagtambong sa mga tigom sa Kingdom Hall. Isip pagsundog sa ilang panig-ingnan, hinaot padayon kitang maningkamot sa pagtambong sa atong mga tigom samtang kita nagsimba sa atong dakong Diyos, si Jehova.—Sal. 95:1-3, 6; 122:1.