Palamboa ang Kalinaw Pinaagi sa Paglikay sa Kasina

1. Sa unsang paagi ang kasina nakaapektar sa pamilya ni Jose?

GIMAHAL ni Jacob ang tanan niyang anak nga lalaki, pero palangga kaayo niya ang 17 anyos nga si Jose. Unsay gibati sa mga igsoon ni Jose? Nasina sila kaniya, maong gidumtan nila siya. Si Jose walay gihimong daotan aron dumtan nila. Bisan pa niana, ilang gibaligya si Jose aron mahimong ulipon ug gibakakan ang ilang amahan, nga kuno gipatay sa bangis nga mananap ang iyang paboritong anak. Tungod sa kasina, gidaot nila ang kalinaw sa ilang pamilya ug gipaguol pag-ayo ang ilang amahan.​—Gen. 37:3, 4, 27-34.

2. Sumala sa Galacia 5:19-21, nganong peligroso kaayo ang kasina?

² Sa Kasulatan, ang kasinab giapil sa makamatayng “mga buhat sa unod” nga mahimong hinungdan nga ang usa dili makapanunod sa Gingharian sa Diyos. (Basaha ang Galacia 5:19-21.) Sagad, ang kasina mao ang gamot sa makadaot nga mga bunga sama sa pagdumtanay, panag-away, ug pagsilaob sa kasuko.

3. Unsay atong hisgotan niining artikuloha?

³ Ang gihimo sa mga igsoon ni Jose nagpakita kon sa unsang paagi ang kasina makadaot sa relasyon ug makatugaw sa kalinaw sa pamilya. Bisag dili gyod nato buhaton ang gihimo sa mga igsoon ni Jose, kitang tanan dunay dili hingpit ug malimbongon nga kasingkasing. (Jer. 17:9) Busa usahay, mobati tingali tag kasina. Hisgotan nato ang pipila ka dili maayong pananglitan sa Bibliya nga makatabang nato sa pagkahibalo sa mga rason kon nganong posibleng mogamot sa atong kasingkasing ang kasina. Dayon atong hisgotan ang pipila ka praktikal nga paagi aron masuklan ang kasina ug mapalambo ang kalinaw.

UNSAY POSIBLENG HINUNGDAN SA KASINA?

4. Nganong nasina ang mga Filistehanon kang Isaac?

⁴ Kadato. Si Isaac dato, mao nga nasina niya ang mga Filistehanon. (Gen. 26:12-14) Ila pa ganing gitabonan ang mga atabay nga kuhaanag tubig ni Isaac para sa iyang kahayopan. (Gen. 26:15, 16, 27) Sama sa mga Filistehanon, may mga tawo karon nga nasina niadtong mas daghag materyal nga butang kay kanila. Wala lang nila tinguhaa ang nabatonan sa uban; nagtinguha sab sila nga mawad-an ang uban sa ilang nabatonan.

5. Nganong ang mga lider sa relihiyon nasina kang Jesus?

⁵ Daghan ang ganahan sa usa ka tawo. Ang Hudiyong mga lider sa relihiyon nasina kang Jesus kay ganahan kaayo niya ang ordinaryong mga tawo. (Mat. 7:28, 29) Si Jesus representante sa Diyos ug nagtudlo sa kamatuoran. Bisan pa niana, ang maong mga lider sa relihiyon nagpakaylap ug daotan kaayong mga bakak aron daoton ang maayong ngalan ni Jesus. (Mar. 15:10; Juan 11:47, 48; 12:12, 13, 19) Unsay atong makat-onan niini? Kinahanglang suklan nato ang bisan unsang tendensiya nga masina sa mga igsoon nga dunay mga hiyas nga nakapasuod nila sa kongregasyon. Hinunoa, angay tang maningkamot sa pagsundog sa ilang mahigugmaong mga buhat.​—1 Cor. 11:1; 3 Juan 11.

6. Giunsa pagpakita ni Diotrefes nga nasina siya?

⁶ Pribilehiyo sa kongregasyon. Sa unang siglo, si Diotrefes nasina sa mga tigdumala sa kongregasyon. ‘Gusto niyang molabaw’ sa mga igsoon sa kongregasyon, mao nga nagpakaylap siyag daotang mga estorya aron daoton si apostol Juan ug ang ubang brader nga may mga katungdanan. (3 Juan 9, 10) Bisag dili gyod nato buhaton ang gihimo ni Diotrefes, basig masina ta sa igsoon nga nakadawat sa asaynment nga atong gipangandoy​—ilabina kon gibati nato nga kuwalipikado sab ta sa maong responsibilidad.

7. Unsay mahimong epekto kanato sa kasina?

⁷ Ang kasina samag makamatay nga sagbot. Dihang ang binhi sa kasina makagamot na sa atong kasingkasing, mahimong lisod na ning patyon. Ang kasina mosamot tungod sa negatibong mga pagbati, sama sa pagselos, garbo, ug kahakog. Ang kasina makapugong sa pagtubo sa maayong mga hiyas, sama sa gugma, pagkamabination, ug pagkamaayo. Dihang makita nato nga nagsugod nag turok ang kasina, kinahanglan nato ning ibton sa atong kasingkasing. Sa unsang paagi nato masuklan ang kasina?

UGMARA ANG PAGKAMAPAINUBSANON UG PAGKAKONTENTO

8. Unsang mga hiyas ang makatabang nga masuklan nato ang kasina?

⁸ Masuklan nato ang kasina pinaagi sa pag-ugmad sa pagkamapainubsanon ug pagkakontento. Kon ang atong kasingkasing puno niining maayo nga mga hiyas, wala nay katuboan ang kasina. Ang pagkamapainubsanon makatabang nga dili ta maghunahuna nga labaw ta sa uban. Ang tawong mapainubsanon dili maghunahuna nga angayan siyang makadawat ug labaw kay sa uban. (Gal. 6:3, 4) Ang tawong kontento malipay kon unsay naa niya ug dili niya ikomparar ang iyang kaugalingon sa uban. (1 Tim. 6:7, 8) Ang tawong mapainubsanon ug kontento malipay dihang makita niya nga ang uban nakadawat ug maayong mga butang.

9. Sumala sa Galacia 5:16 ug Filipos 2:3, 4, unsay ikatabang kanato sa balaang espiritu?

⁹ Nagkinahanglan ta sa tabang sa balaang espiritu sa Diyos aron malikayan ang kasina ug maugmad ang pagkamapainubsanon ug pagkakontento. (Basaha ang Galacia 5:16; Filipos 2:3, 4.) Ang balaang espiritu ni Jehova makatabang nato sa pagsusi kon unsa gyoy atong hunahuna ug motibo. Sa tabang sa Diyos, ang makadaot nga mga hunahuna ug pagbati atong mapulihag mga butang nga makapadasig. (Sal. 26:2; 51:10) Konsideraha ang ehemplo ni Moises ug Pablo, kinsa nakasukol sa tendensiya nga masina.

10. Nganong posible untang masina si Moises? (Tan-awa ang hulagway sa atubangan sa magasin.)

¹⁰ Si Moises dakog awtoridad sa katawhan sa Diyos, pero wala niya pugngi ang uban sa pagbaton sab niana nga awtoridad. Pananglitan, sa usa ka higayon, gikuhaan ni Jehova ang balaang espiritu nga naa kang Moises ug gihatag kini sa usa ka grupo sa mga ansiyano sa Israel nga nagtindog duol sa tolda nga tagboanan. Wala madugay human niana, nabalitaan ni Moises nga may duha ka ansiyano nga wala didto sa tolda nga tagboanan nga nakadawat sab ug balaang espiritu ug migawi nga samag mga propeta. Unsa may iyang reaksiyon dihang giingnan siya ni Josue nga pugngan ang duha ka ansiyano? Si Moises wala masina sa pagtagad nga nadawat niining mga tawhana gikan kang Jehova. Nalipay hinuon siya sa nadawat nila nga pribilehiyo. (Num. 11:24-29) Unsay atong makat-onan kang Moises?

11. Sa unsang paagi masundog sa mga ansiyano si Moises?

¹¹ Kon ansiyano ka, gihangyo ka na ba sukad sa pagbansay sa usa ka brader diha sa kongregasyon aron moatiman sa usa ka responsibilidad nga gimahal kaayo nimo? Pananglitan, ganahan kaayo kang magdumala sa Pagtuon sa Bantayanang Torre kada semana. Pero kon mapainubsanon ka sama kang Moises, dili ka mobati nga dili na kaayo ka importante kay gihangyo ka sa pagbansay sa laing brader nga sa ngadtongadto maoy modumala niini. Angay hinuon kang malipay sa pagtabang sa maong brader.

12. Sa unsang paagi ang daghang Kristohanon karon nagpakitag pagkakontento ug pagkamapainubsanon?

¹² Konsideraha ang laing situwasyon nga giatubang sa daghang tigulang nga mga brader. Sa daghang katuigan, sila nag-alagad ingong koordinetor sa mga ansiyano. Pero inigka-80 anyos nila, andam nilang ihatag ang ilang asaynment ngadto sa uban. Ang mga tigdumala sa sirkito nga 70 anyos na andam mobiya sa ilang pribilehiyo ug mapainubsanong modawat ug bag-ong asaynment. Ug sa di pa dugayng katuigan, daghan sa pamilyang Bethel sa tibuok kalibotan ang nareasayn sa field. Kining matinumanong mga igsoon dili malain niadtong nakadawat sa mga asaynment nga ilang nabatonan kaniadto.

13. Nganong posible untang masina si Pablo sa 12 ka apostoles?

¹³ Si apostol Pablo maayo pod nga ehemplo sa pag-ugmad ug pagkakontento ug pagkamapainubsanon. Wala tugoti ni Pablo nga motubo sa iyang kasingkasing ang kasina. Naghago siya pag-ayo sa ministeryo, pero mapainubsanon siyang miingon: “Ako ang labing ubos sa mga apostoles, ug dili ko angayng tawgon nga apostol.” (1 Cor. 15:9, 10) Ang 12 ka apostoles kauban ni Jesus panahon sa iyang ministeryo sa yuta, pero si Pablo nahimo lang Kristohanon human mamatay ug mabanhaw si Jesus. Bisag sa ulahi natudlo siya ingong “apostol sa kanasoran,” si Pablo wala mokuwalipikar sa espesyal nga pribilehiyo nga mahimong usa sa 12 ka apostoles. (Roma 11:13; Buh. 1:21-26) Imbes masina sa maong 12 ka lalaki ug sa ilang pagpakig-uban kaniadto kang Jesus, si Pablo nagpabiling kontento sa iyang nabatonan.

14. Unsay atong buhaton kon kita kontento ug mapainubsanon?

¹⁴ Kon kita kontento ug mapainubsanon sama kang Pablo, magpakita tag pagtahod sa awtoridad nga gihatag ni Jehova sa uban. (Buh. 21:20-26) Si Jehova naghimog kahikayan nga dunay mga ansiyano nga magdumala sa kongregasyon. Bisag dili sila hingpit, giisip sila ni Jehova ingong “gasa nga mga lalaki.” (Efe. 4:8, 11) Kon tahoron nato ang mga ansiyano ug mapainubsanon tang mosunod sa ilang instruksiyon, makapabilin tang suod kang Jehova ug makabatog malinawong relasyon sa atong mga igsoon.

BUHATA ANG TANAN ARON DUNA TAY MALINAWONG RELASYON SA UBAN

15. Unsay kinahanglan natong himoon?

¹⁵ Ang kalinaw dili molambo kon tugotan nato nga motubo ang kasina. Kinahanglan natong ibton ang kasina gikan sa atong kasingkasing ug dili magtisok ug kasina diha sa uban. Angay natong himoon kining importanteng mga lakang aron masunod nato ang sugo ni Jehova nga buhaton ang tanan aron duna tay malinawong relasyon sa uban ug madasig ang usag usa. (Roma 14:19) Unsay atong mahimo aron matabangan ang uban nga masuklan ang kasina, ug sa unsang paagi mapalambo nato ang kalinaw?

16. Sa unsang paagi matabangan nato ang uban nga masuklan ang kasina?

¹⁶ Ang atong panghunahuna ug mga lihok makaimpluwensiya pag-ayo sa uban. Gusto sa kalibotan nga ‘ipasigarbo’ nato ang mga butang nga atong nabatonan. (1 Juan 2:16) Pero kana makapukaw sa kasina. Malikayan nato nga masina ang uban kon dili ta magsigeg sulti bahin sa mga butang nga atong nabatonan o giplanong paliton. Ang laing paagi nga dili ta makapukaw ug kasina mao ang pagpakitag balanseng panglantaw maylabot sa atong mga pribilehiyo sa kongregasyon. Kon magsige tag estorya bahin niini, sama rag gihimo natong tabunok ang yuta diin mahimong moturok ang kasina. Pero kon magpakita tag tinuod nga interes sa uban ug ilhon ang maayo nilang nahimo, matabangan nato sila nga mahimong kontento ug mapalambo nato ang panaghiusa ug kalinaw sa kongregasyon.

17. Unsay maayong nahimo sa mga igsoon ni Jose, ug nganong nahimo nila kana?

¹⁷ Puwede natong masuklan ang kasina! Konsideraha pag-usab ang mga igsoon ni Jose. Mga katuigan human nila daogdaoga si Jose, nagkita sila sa Ehipto. Sa wala pa magpaila si Jose sa iyang mga igsoon, iyang gisulayan sila kon nagbag-o na ba sila. Giimbitar niya sila sa pagpangaon ug gihatagan niyag mas daghang pagkaon ang iyang manghod nga si Benjamin. (Gen. 43:33, 34) Pero walay timailhan nga ang iyang mga igsoon nasina kang Benjamin. Hinunoa, gipakita nila nga gimahal gyod nila ang ilang igsoon ug ang ilang amahan, si Jacob. (Gen. 44:30-34) Kay wala na masina ang mga igsoon ni Jose, nakatabang sila nga mahibalik ang kalinaw sa ilang pamilya. (Gen. 45:4, 15) Sa susama, kon atong ibton ang kasina gikan sa atong kasingkasing, makatabang ta nga magmalinawon ang atong pamilya ug kongregasyon.

18. Sumala sa Santiago 3:17, 18, unsay resulta kon motabang ta sa pagpalambo sa kalinaw?

¹⁸ Gusto ni Jehova nga suklan nato ang kasina ug palamboon ang kalinaw. Kinahanglang maningkamot ta pag-ayo sa paghimo niana. Sumala sa gihisgotan niining artikuloha, duna tay tendensiya nga masina. (Sant. 4:5) Ug nagpuyo ta sa kalibotan nga nagpasiugdag kasina. Pero kon atong ugmaron ang pagkamapainubsanon, pagkakontento, ug pagkamapasalamaton, dili ta mahimong masinahon. Hinunoa, makatabang ta nga molambo ang kalinaw diin motubo ang matarong nga mga bunga.​—Basaha ang Santiago 3:17, 18.