Kon Unsaon nga Makapuyo Ka sa Bag-ong Kalibotan

Gipakita sa miaging mga artikulo nga hapit nang taposon sa Diyos ang dili diyosnong mga tawo, apil na ang tanang problema. Makaseguro ta nga mahitabo gyod ni. Ngano? Kay ang Pulong sa Diyos, ang Bibliya, nagsaad:

“Ang kalibotan nagakahanaw.”—1 JUAN 2:17.

Makaseguro ta nga dunay maluwas kay ang teksto nagsaad sab:

“Siya nga nagabuhat sa kabubut-on sa Diyos magpabilin hangtod sa hangtod.”

Busa, kinahanglan natong buhaton ang kabubut-on sa Diyos aron maluwas. Aron mahibalo kon unsa ang kabubut-on sa Diyos, kinahanglang makaila una ta niya.

KINAHANGLANG “MAKAILA” KA SA DIYOS ARON MALUWAS

Collage: 1. Nurse nga naglingkod sa salog sa ospital, gikapoy ug naluya. 2. Nagmeryenda siya sa cafeteria ug nakamatikod sa iyang katrabaho nga malipayong nagbasa ug magasin. 3. Gibasahan siyag teksto sa iyang katrabaho ug gihatagan siyag jw.org contact card.

Si Jesus miingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos.” (Juan 17:3) Aron maluwas ug mabuhi hangtod sa hangtod, kinahanglang “makaila” ta sa Diyos. Nagpasabot ni nga dili lang kay basta motuo ta nga dunay Diyos o naa tay nahibaloan bahin niya. Kinahanglang mahimo tang iyang mga higala. Sama nga mogahin tag panahon sa atong mga higala aron masuod ta kanila, kinahanglang mogahin pod tag panahon aron masuod ta sa Diyos. Konsideraha ang pipila ka importanteng kamatuoran diha sa Bibliya nga makatabang nato sa pagbaton ug pagmentinar ug suod nga relasyon sa Diyos.

Mga Kamatuoran Diha sa Bibliya

Gusto sa Diyos nga magpuyo ta sa Paraiso.

Iyang gihimo ang unang mga tawo, si Adan ug Eva, ug gibutang sila sa nindot nga lugar nga gitawag ug hardin sa Eden. Hingpit sila, ug gihatag sa Diyos ang tanan nilang gikinahanglan aron magmalipayon. Puwede unta silang mabuhi hangtod sa hangtod. Kon magpabilin silang higala sa Diyos, dili sila mamatay. Pero ilang gisupak ang simpleng sugo sa Diyos kanila.

Kon nganong nag-antos ang mga tawo karon.

Kay gisupak ni Adan ang Diyos, nawad-an siyag kahigayonan nga mabuhi hangtod sa hangtod, apil na ang tanang tawo. Ang Bibliya nag-ingon: “Sama nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ang kamatayon mikaylap sa tanang tawo.” (Roma 5:12) Sama nga mapanunod sa anak ang depekto sa iyang ginikanan, napanunod sa tanang anak ni Adan ang iyang pagkadili-hingpit. Busa kita matigulang ug mamatay.

Kon unsay gihimo sa Diyos aron matabangan ta.

Ang Bibliya nag-ingon: “Gihigugma pag-ayo sa Diyos ang kalibotan mao nga gihatag niya ang iyang bugtong nga Anak aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.” (Juan 3:16) Gipadala sa Diyos si Jesus sa yuta aron ihatag ang iyang kinabuhi para kanato. Bahin niana, ang 86 anyos nga Indian nga si Prabhakar miingon: “Kini nagpakita nga gimahal ko pag-ayo ni Jehova.a Tungod sa iyang gugma, duna koy paglaom nga mabuhi sa walay kataposan.”

Kon unsaon nato pagpakitag apresasyon sa gihimo sa Diyos alang kanato.

Ang Bibliya nag-ingon nga mapakita nato ang atong apresasyon sa gihimo sa Diyos alang kanato pinaagi sa ‘pagtuman sa iyang mga sugo.’ (1 Juan 2:3) Mahigugmaong gipakita ni Jehova nga Diyos kon unsay atong himoon aron magmalipayon ta karon. (Isaias 48:17, 18, footnote) Dili gusto sa Diyos nga mag-antos ta. Siya nagsaad nga kon sundon nato ang iyang mga sugo, dili lang kay magmalipayon ta karon kondili may paglaom ta nga mabuhi hangtod sa hangtod.

BASAHA ANG PULONG SA DIYOS, ANG BIBLIYA, KADA ADLAW

Ang nurse mihangad sa langit human sa iyang pagbasag Bibliya panahon sa lunch break. — Maluwas ka sa kataposan sa kalibotan pinaagi sa pag-ampo sa Diyos alang sa tabang ug sa pagbuhat sa iyang kabubut-on

Regular tang mokaon aron magpabiling buhi. Pero si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.”—Mateo 4:4.

Karon, atong mabasa ang mga pulong ni Jehova diha sa Bibliya. Samtang imong tun-an kining sagradong basahon, imong makat-onan ang importanteng mga kamatuoran kon unsay gihimo sa Diyos sa miagi, sa iyang ginahimo karon, ug sa iyang himoon sa umaabot.

PAG-AMPO SA DIYOS ALANG SA TABANG

Unsay imong himoon kon gusto nimong sundon ang Diyos pero nalisdan ka sa paghunong sa mga buhat nga iyang giingon nga sayop? Makatabang nimo kon mailhan nimo pag-ayo ang Diyos.

Tagda pananglitan ang babaye nga tawgon natog Sakura. Imoral siyag kinabuhi kaniadto. Dihang nagtuon siyag Bibliya, iyang nakat-onan ang sugo sa Diyos nga “kalagiw gikan sa seksuwal nga imoralidad.” (1 Corinto 6:18) Nag-ampo siya sa Diyos alang sa kusog ug nahunong niya kining daotang buhat. Pero kinahanglan gihapon niyang suklan ang mga tentasyon. “Kon makahunahuna kog imoral,” siya miingon, “moampo ko kang Jehova kay nahibalo ko nga dili nako ni masuklan sa kaugalingon lang nga paningkamot. Tungod sa pag-ampo, mas nasuod ko kang Jehova.” Sama ni Sakura, minilyon na ang nakaila sa Diyos. Siya naghatag kanilag kusog nga gikinahanglan aron magbag-o ug magkinabuhi sa paagi nga makapalipay niya.—Filipos 4:13.

Dihang mas mailhan nimo ang Diyos, mas ilhon ka niya ingong iyang minahal nga higala. (Galacia 4:9; Salmo 25:14) Dayon maluwas ka ug makapuyo sa bag-ong kalibotan sa Diyos. Unsa unyay kahimtang sa bag-ong kalibotan? Ipakita kana sa mosunod nga artikulo.

a Jehova ang ngalan sa Diyos sumala sa Bibliya.