“Mao Kini ang Panulondon sa mga Alagad ni Jehova.”​—Isa. 54:17.

ANG mga alagad ni Jehova sa Georgia dasig kaayo sa pagsangyaw, ug gipanalanginan sila ni Jehova. Tungod niana, ang maayong balita nakaabot bisan sa lagyong mga dapit niining nasora.

Di pa dugay, mas gihatagag pagtagad sa mga igsoon ang pagkobre sa mga teritoryo nga talagsa rang masangyawan. Sa bukirong mga dapit, ang ubang lagyong mga barangay ug sitio maadtoan lang gamit ang cable car o 4x4 nga mga sakyanan.

Kada tuig sukad niadtong 2009, ang sangang buhatan sa Georgia maghatag ug listahan sa wala pa makobrehi nga mga teritoryo ngadto sa mga kongregasyon. Ilang gidasig ang mga magmamantala nga mosuportar sa pagsangyaw nianang mga dapita. Aron makasuportar niini, daghan ang mihimog dagkong mga pagsakripisyo.

Bag-ong minyo si Temuri ug Ana Bliadze dihang ilang nahibaloan nga naay dakong panginahanglan sa magsasangyaw sa bukirong rehiyon sa Ajaria. Nakapalit na sila ug lote aron tukoran ug balay. Pero karon naa silay kahigayonan nga pauswagon ang ilang ministeryo.

Misulay sila pagpuyo ug usa ka semana sa Ajaria. Nahinumdom si Temuri sa iyang unang obserbasyon. Siya miingon: “Layo kaayo ang baktason sa mga igsoon aron makaabot sa mga barangay. Naa miy 4x4 nga van, maong nakahunahuna ko nga magamit kaayo nâ didto.”

Si Ana midugang: “Lisod ang pagbalhin sa laing lugar kay suod kaayo mi sa kongregasyon ug sa among pamilya. Pero gitabangan mi ni Jehova.” Kapin nag tulo ka tuig nga si Temuri ug Ana nagsuportar sa grupo sa Keda, usa ka lungsod sa Ajaria.

Maayong Mangitag Pamaagi ang mga Payunir

Nakatabang gyod ang mga temporary special pioneer nga masangyawan ang lagyong lugar. Pagkahuman sa ilang asaynment, daghang payunir ang nagpabilin sa maong teritoryo aron tabangan ang ilang mga Bible study.

Duha ka sister nga payunir, nga parehong Khatuna ang ngalan, naasayn sa lungsod sa Manglisi. Walay mga Saksi didto, pero daghan kaayo silag nasangyawan nga mga interesado. Nakadumala silag 9 ka Bible study sa unang bulan, 12 pagkasunod bulan, 15 sa sunod, ug dayon 18! Aron padayon nilang maatiman ang mga Bible study, wala sila manghawa sa Manglisi.

Aron masuportahan ang ilang panginahanglan, kinahanglan silang mangitag mga pamaagi. Daghan sa mga bisita sa Manglisi ang ganahan sa specialty sa maong dapit​—ang pinecone jam, nga ilado tungod kay maayo kini sa panglawas. Ang mga sister manguhag green nga pinecone aron himoong jam, ug ila kining ibaligya sa palengke. Pero sa wala lang damha, nakakita silag bag-ong sideline.

Usa ka adlaw, gidalhan sila sa Bible study ug daghang pisô. Wala magdahom ang Bible study nga ang usa sa iyang mga manok nangitlog diay sa laing lugar. Busa nadugangan ang iyang mga binuhi. Karon gusto ni niyang ihatag sa mga sister nga nag-Bible study niya. Usa sa maong mga sister makamaong magbuhi ug manok maong nakahunahuna sila nga maghimo ug gamayng poultry aron makasuportar sa ilang panginahanglan.

Usa sa maong mga sister miingon: “Sa tabang ni Jehova, sa mga igsoon, ug sa mga Bible study, nakapabilin mi sa Manglisi sulod sa lima ka tuig.” Karon duna nay madasigong mga igsoon didto.

Pagsangyaw sa mga Tawong Lahig Pinulongan

Di pa dugay, daghang tawo gikan sa laing nasod ang nangadto sa Georgia. Gusto sa mga payunir nga sangyawan kining mga tawhana, maong nagtuon silag laing pinulongan sama sa Arabic, Azerbaijani, Chinese, English, Persian, ug Turkish.

Daghang payunir ang misuportar sa mga grupo ug kongregasyon nga lahig pinulongan. Ang uban usab miadto sa laing mga nasod aron mag-alagad diin dako ang panginahanglan. Si Giorgi ug Gela mga 20 anyos dihang mibalhin sa laing nasod. Si Giorgi miingon: “Gusto namong ihatag ang among kinamaayohan kang Jehova, ug ang pag-alagad sa laing nasod maoy usa ka maayong kahigayonan sa paghimo niana.”

Si Gela nahinumdom: “Daghan kaayo kog nakat-onan didto ingong ansiyano. Pribilehiyo kaayo nga gamiton ka ni Jehova sa pagtabang sa iyang ‘gagmayng mga karnero.’”​—Juan 21:17.

Si Giorgi midugang: “Lisod baya, pero nagpokus mi sa among pag-alagad ug gibarogan ang among desisyon. Gihimo namo kon unsay angay namong himoon.”

Usa ka brader, nga ginganlan sab ug Gela, nag-alagad sa Turkey sulod sa pipila ka tuig. Siya miingon: “Sa primero nalisdan ko sa ilang pinulongan maong maguol ko usahay. Pero, dihang makamao na kong makig-estorya sa mga igsoon ug sa mga tawo sa teritoryo gamit ang ilang pinulongan, malipayon na kaayo ko.”

Si Nino, nga kapig napulo ka tuig na nga payunir sa Istanbul, Turkey miingon: “Gitabangan gyod ko ni Jehova sukad sa akong pagbalhin dinhi. Tungod sa akong pagsangyaw sa mga tawong lahig pinulongan, halos adlaw-adlaw nakong masinati ang ‘pang-Yearbook nga mga eksperyensiya.’”