TABANG ALANG SA PAMILYA
Pakig-estorya sa Imong Anak Bahin sa Alkoholikong Ilimnon
“Sayis anyos pa lang ang among anak nga babaye dihang among gihisgotan kaniya ang bahin sa alkoholikong ilimnon. Nakurat mi kay daghan na siyag nahibaloan bahin niini.”—Alexander.
Ang angay nimong mahibaloan
Importanteng hisgotan uban sa mga anak ang bahin sa alkoholikong ilimnon. Ayawg hulata nga tin-edyer na ang imong anak. “Nagmahay mi nga wala namo maestorya ang among anak nga lalaki bahin sa hustong paggamit sa alkoholikong ilimnon sa bata pa siya,” miingon si Khamit nga taga-Russia. “Ulahi na dihang naamgohan nako ang kaimportante niini, kay akong nasayran nga ang akong anak palainom na sa edad nga 13.”
Nganong importante kini?
Ang mga klasmet, advertisement, ug TV makaimpluwensiya sa hunahuna sa imong anak bahin sa pag-inom.
Sumala sa U.S. Centers for Disease Control and Prevention, mga menor de edad ang tig-inom sa 11 porsiyento sa tanang makonsumong ilimnon sa United States.
Dili ikatingala, ang mga health official nagtambag sa mga ginikanan nga tudloan ang ilang mga anak samtang bata pa bahin sa kapeligrohan sa pag-inom. Unsaon nimo nâ paghimo?
Ang imong mahimo
Hunahunaa ang posibleng ipangutana sa imong anak. Ang mga bata daghag pangutana, ug mas daghan silag pangutana samtang managko sila. Busa, kinahanglan kang mangandam kon unsaon sila pagtubag. Pananglitan:
Kon mangutana ang imong anak kon unsay lasa sa bino, puwede nimong isulti nga mora nig aslom nga juice, ug ang beer medyo pait.
Kon gustong motilaw ang imong anak, puwede nimo siyang ingnan nga dili makaya sa lawas sa bata ang kaisog sa bino o beer. Hisgoti ang mga epekto: Ang pag-inom makaparelaks, pero kon ang usa masobraag inom, siya malipong, makahimog dili maayo, ug makasultig mga butang nga mahayan niya.—Proverbio 23:29-35.
Pag-research. Ang Bibliya nag-ingon: “Ang . . . maalamon molihok uban ang kahibalo.” (Proverbio 13:16) Kinahanglan kang mahibalo sa epekto sa alkoholikong ilimnon ug sa mga balaod ug limitasyon bahin niini sa inyong nasod. Kon mahimo na nimo, andam na ka sa pagtabang sa imong anak.
Manguna sa paghisgot. “Ang mga bata lagmit maglibog bahin sa alkoholikong ilimnon,” miingon si Mark, usa ka amahan nga taga-Britain. “Nangutana ko sa akong otso anyos nga anak nga lalaki kon maayo ba o daotan ang pag-inom. Relaks ug impormal lang ang akong paagi sa pagpangutana, ug kini nakatabang niya nga masulti ang iyang hunahuna.”
Mas mahinumdoman sa imong anak ang bahin sa alkoholikong ilimnon kon kadaghan ninyo ning hisgotan. Depende sa iyang edad, hisgoti sab ang ubang importanteng topiko, sama sa balaod sa trapiko ug pagmaneho ug sex education.
Magpakitag maayong ehemplo. Ang mga bata morag espongha—ilang “suhopon,” o sundogon, kon unsay naa sa ilang palibot—ug sumala sa research, mga ginikanan ang ilabinang makaimpluwensiya sa ilang mga anak. Nagpasabot ni nga kon moinom dayon ka aron mokalma o mawala ang stress, hunahunaon sa imong anak nga ang pag-inom maoy solusyon sa mga problema. Busa importanteng magpakita ka ug maayong ehemplo bahin sa hustong paggamit sa alkoholikong ilimnon.
Ang imong anak makakat-on sa imong ehemplo maylabot sa pag-inom