Agoniyas Alang sa Olympics?

Mayo 8, 1984:

“Ang Nasodnong Komite sa Olympics sa U.S.S.R. napugos sa pagpahayag nga imposible ang pag-apil sa Sobyet nga mga magdudula sa Dula sa XXIII Olympiad sa Los Angeles.”

SA INGON ang bomba nahulog sa kalibotan sa mga dula sa Olympics. Ang mga Sobyet misibog gikan sa Dulang Olympics sa Los Angeles. Sa pila ra ka adlaw ang ubang komunistang nasod misuhid sa iyang panig-ingnan.

Unsay nakahagit sa kalit nga pagsibog sa U.S.S.R. gikan sa Dulang Olympics? Sumala sa opisyal Rusong deklarasyon nga gipahayag sa ahensiya sa balitang Sobyet nga Tass, ang pangunang hinungdan mao ang KASEGUROHAN. Sila nagpatuo, “Ang politikanhong mga demonstrasyon nga mabatokon sa U.S.S.R. ginaandam, ang wala-ililong nga mga bahad gihimo batok sa U.S.S.R. Nasodnong Komite sa Olympics, Sobyet nga mga magdudula ug opisyales.” Sila midugang nga ang tinamdan sa mga awtoridad sa T.B. mao ang “sobrang pagtamay sa mga mithi ug mga tradisyon sa kalihokan sa Olympics.”

Apan ang kasegurohan mao ba ang tinuod bugtong hinungdan luyo sa Rusong lihok? Sa tanghaga sa malalangong internasyonal nga politika, mahimo kahang adunay ubang hinungdan? Sa pag-analisar sa maong lakaw diha sa dulang “ahedres” sa kalibotan sa mga dagkong gahom, ang prensa sa Kasadpan mihatag sa ubang posibleng mga hinungdan sa dili pag-apil sa Sobyet. Kana tanan masuma sa usa ka pulong—POLITIKA.

Ang Britanikong senemanang basahong The Economist mipahayag: “Sukad gayod ang mga Amerika nagpahilayo sa Moscow Olympics sa 1980, ang Sobyet nga panimalos maoy posibilidad.” Sa ingon gisabot sa daghang maniniid ang Rusong lihok ingon nga yanong baraibara nga lihok sa pagbalos apan uban ang dugang panagang. Ang 1984 mao ang tuig sa piliay sa presidente sa Tinipong Bansa. Busa ang U.S. News & World Report mipahayag: “Sa makausa pa ang gilaayan nga kalibotan milantaw nga masulob-on samtang ang Dulang Olympics . . . gihimong bihag sa politika sa dagkong mga gahom. . . . ang dakong epekto sa boycott maoy politikanhon.” Unya kini midugang, “Ang pangunang puntiriya sa pagsibog mao si Ronald Reagan.” Ang Newsweek miingon nga ang bomba sa Moscow “maoy masakit nga pasidaan sa nagkalalom nga pagkontra sa Kremlin kang Ronald Reagan.” Usa ka magsusulat sa New York Times mitanyag sa opinyon nga “ang desisyon sa Kremlin dili mabulag sa halalom nga pagkamabatokon nga nagpabilin mahitungod sa Sobyet-Amerikanhong relasyon sa katuigang dili dugay.”

Kini mao na ang ikalimang sunodsunod nga panahong ang Olympics nabiktima, sa usa o laing paagi, sa politika. Sukad 1968 ang Dulang Olympics namantsahan sa politikanhong mga kahulogan. Sila dugang ug dugang gigamit nga sakyanan sa pagpahayag sa politikanhong protesta ug kayugot. Ang mga terorista nagkombertir sa dulaanan sa Olympics ngadto sa usa ka entablado alang sa ilang pagpaagas sa dugo. Ang duha ka dagkong gahom karon nagpasundayag na sa unsang paagi ang Dulang Olympics mahimong peyon sa ilang pakigbisog alang sa pagkalabaw. Ug ang makataronganong pangutana mao, Unsay epekto niining tanan diha sa kaugmaon sa Dula?

Layog-Abot nga mga Epekto

Ang Dulang Olympics makalahutay ba niining dugang pagdaot sa ilang hulagway? Ang pila ka opisyal malaomon gihapon. Si William Simon, presidente sa Komite sa Olympics sa Tinipong Bansa, gitahong miingon, “Ang kalihokan sa Olympics lig-on. Bisan pa sa tanang kangil-aran niini, kini positibo gihapong gahom alang sa pakigdait.” Apan, ang uban dunay mas masulob-ong panud-ong. Matud ni Alberto Salazar, nga maghuhupot sa rekord sa marathon sa kalibotan, “Ako nasubo lang nga kini nahitabo ug akong gibati nga kini mahimong bunal nga makapatay sa Olympics.” Ang Newsweek nangahas sa paghatag sa opinyong “kini mahimong nagalandong sa kataposang kalaglagan sa modernong kalihokan sa Olympics mismo.”

Tino, ang ugdang nga mga pangutana gibangon karon mahitungod sa umaabot nga tigpaluyo sa Dula. Unsang siyudara o asosasyon sa negosyo ang gustong modawat sa pinansiyal nga kapildihan sa pag-organisar sa Dula kon sila kanunayng isakripisyo ingong peyon sa politikanhong mga away? Ang mga magdudula buot ba gihapong mangandam pag-ayo kon ang ilang pag-apil dili mapaneguro tungod sa internasyonal nga politika? Kini pila ra sa mga pagduhaduha nga karon ginapahayag. Apan adunay ubang pangutana—Unsa na man ang nasyonalismo? Ang paggamit sa mga droga? Ang pag-apil sa mini nga mga bag-ohan o amateur? Sa laing mga pulong—Ang mga mithi ba sa Olympics nagkamenos? Kun nagkawala na?