Ang Bugtong Paagi sa Kaluwasan
“INIGKAKITA na ninyo nga likosan ang Jerusalem sa magkampong kasundalohan, nan inyong masabot nga nagakahiduol na ang iyang kalaglagan. Ug sila nga anaa sa Judea pakalagiwa ngadto sa kabukiran.” (Lucas 21:20, 21) Maoy sugo ni Jesu-Kristo sa iyang mga tinun-an. Ug komusta kadtong wala mosunod sa mga pulong ni Kristo? Siya nanagna: “Sila mangamatay sa sulab sa espada ug pagabihagon ngadto sa tanang kanasoran; ug ang Jerusalem pagayatakan sa kanasoran.”—Lucas 21:24.
Wala makaangay ang Zealots sa mga pulong ni Jesus. Sumala sa librong A History of the Jews ni Abram L. Sachar, ang Zealots “maoy mga tawong may hingaping pagtuo kinsa walay gikahadlokan sa pagpukan sa ilang paganong mga agalon.” Ang ideya sa pagkalagiw dili lang kay dili-praktikal kondili, tinalawan! Busa sa 66 K.P., ang kabangisan sa Romano nakapukaw niining mga Hudiyoa sa pag-alsa. Human nga nailog sa mga Hudiyohanong rebelde ang Masada, ang Roma midalidali sa paglig-on sa Jerusalem. Ang Jerusalem karon “gilikosan na sa nagkampong kasundalohan.” Apan sa gisibog ug kalit sa Romanong komandanteng si Cestius Gallus ang iyang tropa, nabuksan ang higayon alang sa mga pumoluyo sa Jerusalem sa pagsunod sa tambag ni Jesus sa pagkalagiw. Nag-ingon ang ikatulong siglong manalaysayng si Eusebius: “Apan, ang tibuok lawas, sa iglesiya sa Jerusalem, nga gisugo pinaagi sa balaang kapahayagan . . . mipahawa sa siyudad, ug nanimuyo sa usa ka lungsod nga saylo sa Jordan, nga gitawag Pella.” Apan komusta kadtong nagpabilin?
Miabot ang 70 K.P., mibalik ang Romano ubos sa pagpanguna ni Heneral Tito. Matinguhaon nga makadaog, ilang gialihan ang siyudad. Si Flavius Josephus, nga kanhi Hudiyohanong rebelde nga karon nag-alagad sa mga Romano, milibot sa mga padir sa Jerusalem, nangaliyopo sa iyang katawhan sa paghunong sa ilang walay kapuslanang pakig-away. “Palandonga,” mituaw siya, “nga kamo nakig-away dili lamang sa mga Romano kondili sa Diyos usab.” Ang resulta? Sa iyang kaugalingong mga pulong: “Bisag naghilak si Josephus nga misinggit sa pagpangaliyopo kanila, ang mga rebelyoso wala gayod moampo ni milantaw nga luwas ang pagbag-o sa ilang dalan.” Ingong resulta, gatosgatos ka libo ang nangamatay sa kagutom ug sa espada, ug tinagpulo ka libo ang gibihag alang sa alaut nga kinabuhi sa pagkaulipon! Apan, luwas sa Pella, mapalandong sa mga Kristohanon ang panalangin sa pagpamati sa pasidaan ni Jesus.
Kaluwasan Karon
Ang nahitabo sa Jerusalem maoy usa lamang ka gamay nga pananglitan sa mahitabo sa atong panahon sa tibuok globo nga sukod. Apan ang nameligro niining panahona dili lamang ang kalungtaran sa usa ka siyudad kondili sa tibuok-yutang sistema sa mga butang!—Mateo 24:21.
Ang Diyos mismo ang mopakanaog niining globonhong kalaglagan. Apan alang sa unsang katarongan? Aron sa “paglaglag niadtong nagalaglag sa yuta.” (Pinadayag 11:18) Ang Diyos, “ang Maguumol sa yuta ug Magbubuhat niana, . . . wala maglalang niini sa walay kapuslanan,” ug dili niya tugotan ang tawo sa paglaglag niini pinaagi sa polusyon o sa nukleyar nga kalaglagan. (Isaias 45:18) Apan nagkinahanglag Iyang pagpangilabot aron mapugngan ang hinimog-tawo nga kalaglagan nga gikahadlokan sa mga mabalak-on sa kaluwasan. Apan, si Jesus miingon nga may posibilidad sa “pag-ikyas gikan niining tanang mga butanga nga magakahitabo.”—Lucas 21:36.
Sanglit kaylap man sa tibuok nga yuta ang mga sumusunod ni Jesus karon, imposible alang kanila sa pagkalagiw sa isa ka pisikal nga lokasyon, sama sa gihimo sa mga Kristohanon sa unang siglo. Karon, ang kaluwasan nagadepende sa pagsunod sa tambag sa Bibliya sa Sofonias 2:2, 3: “Sa dili pa modangat kaninyo ang nagakalayo nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa si Jehova, kamong tanan nga mga maaghop sa yuta, nga nanagtuman sa lyang mga tulomanon. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” Ug ang Bibliya dugang nag-ingon: “Ang tanan nga magatawag sa ngalan ni Jehova mamaluwas.”—Joel 2:32.
Matuod, gipalubog sa ubang mga hubad sa Bibliya ang kahulogan ning tekstoha pinaagi sa paghubad niini: “Ang bisan kinsa nga magatawag sa ngalan sa GINOO mamaluwas.” (Authorized Version) Apan ang teksto sa orihinal nga pinulongan nagpakita nga labaw pa kay sa pagpangaliyopo lamang sa usa ka walay ngalang “GINOO” ang gikinahanglan. Diha sa daghang mga Bibliya, ang mga teksto sama sa Salmo 83:18 tin-awng nagpakita nga ang personal nga ngalan nianang maong “GINOO” mao si JEHOVA. (AV; American Standard Version) Ang pagtawag sa iyang ngalan nagkahulogan ug labaw pa kay sa paggamit niini sa seremonyal nga paagi. Kinahanglang “pangitaon” sa usa si Jehova pinaagi sa pagtuon sa Bibliya ug sa pagkuhag kasayoran bahin kaniya ingong usa ka persona. (Juan 17:3) Makapalihok kining maong kahibalo sa matarong ug kasingkasing nga tawo sa pagtahod sa awtoridad ni Jehova ingong Universal nga Soberano, sa pagsubay sa iyang mga sukdanan ug sa pagsundog kang Jesus sa ‘pagpadayag sa ngalan sa Diyos’ ngadto sa uban.—Juan 17:6.
Ang yanong pag-adto sa simbahan nga iyang pinili dili mao ang dalan sa kaluwasan. Sa unsang paaging maingon niana, sanglit napakyas ang mga iglesya dili lamang sa paggamit sa personal nga ngalan sa Diyos kondili ginabugnaw pa ngani sa paggamit niana ug sa dili pagpanumbaling sa mga kasugoan sa Diyos? Hinumdomi, ang propetang si Malaquias nag-ingon nga ang Diyos adunay “basahon sa handomanan” niadtong “may kahadlok kang Jehova ug nga nanagpalandong sa iyang ngalan.” (Malaquias 3:16) Taliwala sa tanang relihiyosong mga grupo nga nag-angkong Kristiyano, hain niini ang kanunayng nagagamit sa ngalan sa Diyos, si Jehova, nga bug-os nagasalig kaniya ug sa iyang mga saad ug maisogong nagadasig sa mga membro niini nga mahimong iyang mga saksi? (Isaias 43:10) Sa walay duhaduha, mao kini sila ang ‘nagapangita kang Jehova.’ Ilang giawhag ang uban sa pakig-uban kanila sa pagkakat-on sa bugtong seguradong paagi sa kaluwasan sa umaabot nga globonhong kalaglagan.
[Blurb sa panid 9]
“Apan, ang tibuok lawas, sa iglesya sa Jerusalem, nga gisugo pinaagi sa balaang kapahayagan . . . mipahawa sa siyudad, ug nanimuyo sa usa ka lungsod nga saylo sa Jordan, nga gitawag Pella.”—Manalaysayng Eusebius
[Blurb sa panid 9]
Ang yanong pag-adto sa simbahan nga iyang pinili dili mao ang dalan sa kaluwasan. “Ang tanan nga magatawag sa ngalan ni Jehova mamaluwas.”—Joel 2:32