Ang Kristohanong Pagkalagiw Ngadto sa Pella

SA 33 K.P., mipasidaan si Jesu-Kristo sa iyang mga sumusunod sa “pagkalagiw ngadto sa kabukiran” kon ilang makita nga “pagalikosan ang Jerusalem sa mga sundalo.” (Lucas 21:20-24) Apan diing dapita gayod sila sa aktuwal mikalagiw? Ang Pranses nga oryentalista ug manalaysay si Joseph Ernest Renan mitubag: “Ang dapit nga gipili sa mga pangulo sa [Kristohanon] komunidad nga nagsilbing pangunang dalangpanan sa naglagiw nga Iglesya mao ang Pella, usa sa mga lungsod sa Decapolis, nga nahimutang duol sa wala nga bakilid sa Jordan diha sa usa ka matahom nga lokasyon, nagbantaaw sa usa ka kilid sa tibuok kapatagan sa Ghor, ug sa pikas kilid titip kaayo ang mga pangpang, ang tiilan niini adunay sulog kaayong suba. Walay molabaw pa sa pagkamaalamon ang pagkapili niini. Ang Judæa, Idumæa, Peræa, ug Galilea nangalsa; ang Samaria ug ang kabaybayonan magubot kaayo ang kahimtang . . . Busa ang Scythopolis ug Pella mao ang labing duol neyutral nga siyudad sa Jerusalem. Ang Pella, tungod sa posisyon niini saylo sa Jordan, mas malinaw kay sa Scythopolis, nga nahimong usa sa malig-ong kuta sa Romano. Libreng siyudad ang Pella sama sa ubang mga lungsod sa Decapolis . . . Ang pagdangop didto bukas nga nagpadayag sa kalisang sa [Hudiyohanon] pag-alsa . . . Dinhi ning batok-Hudiyo nga lungsod nga midangop ang Iglesya sa Jerusalem sa yugto sa mga kalisang sa paglikos.”