May Suliran Ka ba sa Imong Makina sa Panahi?

Naghunahuna ka bang mopalit sa una nimong makina sa panahi? Kon mao, maikag ka sa mosunod nga tambag.

“AY, NGANO bang kining makinaha dili man motahi karon?” Minglugmaw ang mga luha sa kapakyasan sa mga mata ni Elsa samtang iyang gitanaw ang lain pang sidsid nga mikunot. “Unsa kahay deperensiya sa akong gibuhat?” Ang pagtahi pinaagi sa makina bag-o alang kaniya ug siya may suliran sa bag-ohan.

Nahimutang ka ba sukad nianang kahimtanga? Kon duna kay makina sa panahi, lagmit ang kaugalingon nimong kasinatian nagtudlo kanimo nga mobati sa suliran ni Elsa. Ugaling, bisan pag unsa ka makapahiubos kana sama sa pila ka suliran, tingali dili kinahanglang mopalit ug bag-ong makina o himoon ang dakong trabaho sa pag-ayo. Makaatiman ka sa daghang suliran—bisan makasagubang pa sa seryosong mga suliran—diha mismo sa balay, nga mosangpot ang nadaginot nga panahon ug salapi.

Maikag ka ba nianang kalaomana? Kon maohon, basin madasig kang mahibalo nga kadaghanan gikinahanglan ang diyutay rang kahanas bahin sa makina sa pagmentenar ug pag-ayo sa imong makina, ug ang kadaghanang suliran masulbad pinaagi sa paghimog ginagmayng pagpasibo. Busa kon anaa sa imong duol ang imong makina sa panahi, basin buot mong susihon kana samtang imong ipadayon ang pagbasa niining artikuloha sa pagsusi unsa ka sayon gayod nga huptan kana sa maayong kondisyon.

PAGTAOD SA HILO SA IMONG MAKINA

Nahauna, ilabina kon taudtaod nang wala nimo magamit ang imong makina, susiha ang pagkataod sa hilo ug ang dagom. Unsang direksiyon itaod ang imong dagom? Kon ang plantsa sa dagom naa sa wala nga kilid sa imong makina, ang lapad nga bahin sa dagom magpasulod, o sa tuo nimo, ug ang imong pagtaod sa hilo maoy gikan sa wala patuo. Kon ang plantsa sa dagom anaa sa atubangan, nan ang lapad nga bahin sa dagom mopaluyo, ug ang imong pagtuhog maoy gikan sa atubangan paluyo. Diyutay ra ang makina nga eksepsiyon ning lagdaa.

Ang pagtaod sa hilo sa imong makina lisod tan-awon, pero kini yano kaayo. Sugdi pinaagi sa pagpataas sa presser foot o pang-ipit sa panapton (ang presser foot lever anaa sa wala nga kilid sa likod sa imong makina). Sa pagpadayon gikan sa karite nimo sa hilo, pangitaa ang usa kun duha ka giya sa hilo sa wala nga uloulo sa makina. Unya ipaubos ang hilo ngadto ug palibot sa tension o tension dial, nga paneguroong hisakpan ang nagtuliyok nga alambre didto; dayon, ipataas ngadto sa take-up lever o palangka sa hilo, agi sa lungag niana, paubos agi sa usa o duha pa ka giya sa hilo ug sa kataposan agi sa dagom. Kon sayop ang pagkataod sa hilo sa makina, o kon nabali ang dagom, ang hilo maputol o kaha magtulohog ang agi.

Ang tinahian ba sa imong makina molukso? Kon mao, sulayi ang bag-ong dagom, kay ang dagom nga bawog kanunay mopalukso sa tinahian niana. Ang matang usab sa panapton nga ginatahi dunay bahin. Sa kadaghanang bag-ong polyester ug sheer nga mga panapton basin buot nimong sulayan ang espesyal ball-point nga dagom kay kini motabang, sa pila ka kaso, sa pagwagtang sa paglukso sa tahi. Ang laing paagi mao ang pagtahi sa panapton nga may nipis nga papel sa ilalom aron kana mabagabaga, ug dayon, siempre, gis-on ang papel.

Sa kaso ni Elsa, ang kunot nga pagtahi nga gihisgotan sa introduksiyon mahimong gipahinabo sa dili-hustong pagpasibo sa tension dial. Ang mas kasagaran nga sayop mao ang pagtuluhog sa tahi sa ibabaw o ilalom sa panapton. Ang solusyon? Kasagarang yano nga pagpasibo sa tension regulator (dial). Nahauna, sulayi ang pagbalhin sa tension ngadto sa sunod nga numero sa dial. Kon kana dili magsulbad niana, sulayi ang usa ka numero sa atbang nga direksiyon. Kon mopadayon ang suliran, basin kinahanglang pasiboon ang lansadera.

Ang langkob nga giya ning pagpasiboa mao: Dihang ang kaha sa lansadera nga nasudlan sa lansadera nabitay sa hilo niini, ang kabug-at makabadbad sa lansadera kon luag kaayo ang tensiyon. Ning kahimtanga ang sulbad mao ang paghugot sa roska sa tension usa ka bahin sa walo sa paglisong naandan hangtod ang kabugat niana mopugong sa pagkabadbad. Unya hugti ang roska sa tension sa makausa pa usa ka bahin sa walo sa usa ka pagliso. Kini mohimo sa bug-os nga pagkasibo nga un-kuwarto sa pagliso ug angay magsulbad sa suliran.

PAGLIMPIYO SA IMONG MAKINA

Ang pipila ka butang imong kinahanglan sa paglimpiyo ug pag-ayo sayong mabatonan. Kana mao: (1) Gamay gahing sepilyo. Ang sepilyo sa ngipon mahimo na ug ekselente sa pag-abot sa piot nga mga dapit. (2) Gamayng igtotornilyo. (Hinumdomi, sa kanunay labing maayong gamiton ang igtotornilyo nga ang tumoy samag gidak-on sa giwang sa ulo sa roska.) (3) Diyutayng gapas. (4) Gamayng trapo nga walay lanotlanot. (5) Gamayng tinabas sa pinong panaptong emery (nga mapalit sa bisan diing tindahag hardware). (6) Aseite sa makina sa panahi. (7) Diyutayng gas o iglilimpiyo sa karburador sa sakyanan. (8) Kimpit (sa pagbira sa hilo o lanotlanot sa panapton gikan sa makina).

Ang natipon nga lanotlanot ug hugaw lagmit mao ang labing kasagarang hinungdan sa suliran sa makina sa panahi sa balay. Ang lanotlanot matipon sa lansadera ug sa ngiponan samtang ang ginagmayng hilo ug panapton masikop. Kadaghanan kini mopahinabo nga ang panapton dili-tukmang mapasulod ug mosangpot sa kunot ug lukso nga tahi. Sa paglimpiyo, tangtanga ang dagom ug ang presser foot o pang-ipit sa panapton. Tangtanga pinaagi sa igtotornilyo ang mga roska sa plantsa sa dagom ug tangtanga ang plantsa sa dagom. Pinaagi sa imong sepilyo, limpiyohi sa pagpagawas sa abog ug lanotlanot nga mihuot sa ngiponan. Butangig duha ka tinulo sa aseite sa dapit nga imong makita ang mga lungag para aseite.

Ang paglimpiyo sa dapit sa lansadera mao ang sunod. Nahauna, tangtanga ang kaha sa lansadera ug ang lansadera. Sunod, tangtanga ang shuttle race ring—nga kasagarang gikuptan sa duha ka panghawid—ug ang kaw-it sa lansadera luyo niana. Gamita ang sepilyo ug ang mga kimpit sa pagkuha sa makita nga lanotlanot. Samtang ang mga parte sa lansadera bungkag pa, hatagig panahon ang pagsusig maayo sa mga parte sa lansadera alang sa mga tibhang ug garas. Kini bililhon kay ang pagkadili-hamis sa nawong sa lansadera makasikop sa hilo ug makaputol niana. Sa unsang paagi kana naa dinha? Kadaghanan kana sila ipahinabo sa pagbira sa panapton nga mas tulin kay sa ikapakaon sa makina. Ang dugang pagpugos sa dagom sa tahi mo pahinabo nga kana mabawog ug maigo ang lansadera.

Sa pagsusi, hilama sa tumoy sa imong tudlo ang dapit sa tumoy sa lansadera ug dayon lahus sa atubang sa tumoy ug latas sa giwang. Posible tingali ang pag-ayom-ayom sa pagkadili-hamis pinaagi sa hinay nga pagtrapo sa lansadera pinaagi sa pino nga panaptong emery. Ang kapilian mao ang pagpalit ug bag-ong lansadera, mao nga diyutay rang mawala kanimo sa pagsulay ning mas baratong solusyon. Karon tapoa pag-usab ang mga parte sa lansadera ug pahirig diyutayng aseite ang dapit sa lansadera.

ASEITEHI ANG IMONG MAKINA

Ang pag-aseite kasagarang dili lisod. Daghang tiggama nagataganag aseite sa makina sa panahi ug sa giya sa pag-aseite uban sa makina panahon sa pagpalit. Ang mga tiggama nagasugyot nga imong aseitehan ang imong makina sumala sa imong paggamit niana; kada adlaw kon gamiton sa ubay-ubayng oras kada adlaw; senemana kon gamiton lamang sa usa ka oras o menos pa kada adlaw. AYAW PAGPASOBRAHI SA PAG-ASEITE. Ang usa o duha ka tinulo kasagarang mao lamang ang gikinahanglan. Gamita lamang ang aseite alang sa makina sa panahi. Ang aseiteng all-purpose, panimalaynon o vegetable dili angay gamiton.

Sa pila ka makina adunay mga lungag sa uloulo sa makina diin ang aseite ikabutang. Sa uban, ang ibabaw nga tabon sa makina kinahanglang tangtangon aron sa pag-aseite. Kasagarang duha ka roska ang nagahawid niining tabona, bisan tuod ang pila ka makina duna lamay usa. Sa maong panahon ang ubay-ubay nga lungag para sa aseite makita ubay sa ibabaw. Butangig duha ka tinulo sa aseite ang matag usa ug ibalik ang tabon.

Enkasog ang imong makina daan na ug natipon ang aseite (nga mayelo na, gahi, samag-varnish), imong matangtang kini pinaagi sa gas o iglilimpiyo sa karburador sa sakyanan, nga gamiton ang gapas o trapo. Sanglit ang pluwidong iglilimpiyo mohungaw, tinoa ang paghimo niini sa lugar nga maayog bentilasyon. Kon ang imong makina dunay nylon o plastik nga mga parte, pagbantay nga kining solusyona dili mapahid kanila kay kini modaot niana.

Bisan tuod kining artikuloha dili mag-andam kanimo nga mahimong teknisyan sa makina sa panahi, kini mahimong bililhong reperensiya kon motungha ang mga suliran, ingon man magpaila kon kanus-a panahon na sa pagtawag sa propesyonal aron sa paghimog mga pag-ayoayo. Ug samtang ikaw mas magmahunahunaon sa pagmentenar sa imong makina sa regular nga paagi, makasalig ka sa maayong-motahi nga makina ug malugwayan ang kinabuhi niini sa pagserbisyo. Labaw sa tanan, ang maayog-andar nga makina moluwas kanimo gikan sa mga kapakyasan nga kinahanglang antoson sa daghan kaayo. Kini tinong modugang sa imong kalipay sa pagbuhat sa maayong trabaho sa kalipay ug kaharuhay sa imong kaugalingon ug sa uban.—Tinampo.

[Dayagram/Letrato sa panid 25]

(Alang sa aktuwal nga pagkahan-ay, tan-awa ang publikasyon)

Thread guides

Thread take up lever

Tension dial

Presser-foot lever

Presser foot

Feed dog

Needle

Needle plate

Bobbin case

Spool