Gikan sa Among mga Magbabasa

Mahitungod sa mga Grado

Naangayan ko pag-ayo ang inyong artikulong “Mga Batan-on Nangutana . . . Nganong Mabalaka sa mga Grado?” (Agosto 22, 1984 sa Cebuano) Gipasiugda sa artikulo ang pagpamati sa klase kon buot natong makabatog kahibalo. Karon ako mas magakugi sa tunghaan. Maoy akong tinguha nga ang tanang estudyante nga nakabasa niadtong artikuloha sama kanako makasabot sa bili sa pagpamati sa klase.

E. R., Pransiya

Naangayan ko gayod ang artikulong “Mga Batan-on Nangutana . . . Sa unsang Paagi Akong Mapauswag ang Akong mga Batasan sa Pagtuon?” (Enero 8, 1985 sa Cebuano) Mouyon ako nga ang telebisyon makadaot sa imong konsentrasyon, apan dili ako mouyon nga ang radyo makabalda. Ako makahatag bug-os pagtagad sa akong ginabasa ug may radyo usab nga nagatokar.

A. N., Ohio

Ang epekto sa pagtokar sa radyo samtang ang usa nagahatag bug-os nga pagtagad sa pagtuon tingali magkalainlain gikan sa usa ka tawo ngadto sa lain. Ang epekto niini mahimong magdepende usab sa matang sa honi nga ginatokar. Ang librong “How to Double Your Child’s Grades in School,” sa seksiyong “Tips That Double the Value of Each Study Hour,” nagaingon: “Kinahanglang walay mga kabaldahan sa maong takna. Kini nagkahulogan, nga labing maayo, sa iyang kaugalingong kuwarto nga may siradong pultahan. Walay radyo o TV. Walay mga mobalda.” Bisan tuod bation sa usa nga ang pagpatokar sa radyo dili mobalda sa bug-os nga pagtagad, maayong sulayan ang pagtuon nga walay radyo. Kini mahimong mopauswag sa bug-os nga pagtagad. Kini angay sulayan.—ED.

Ang Iglesya Katolika ug ang Kaluwasan

Sa inyong isyu sa Agosto 22, 1984, sa Iningles, panid 28, inyong giingon nga ang Iglesya Katolika nagaangkon nga mao ang paagi sa kaluwasan alang sa ginatos ka milyong katawhan. Ang Iglesya Katolika wala mag-angkong mao ang dalan sa kaluwasan kondili nagatudlo nga si Jesu-Kristo mao ang dalan sa kaluwasan. Ang Iglesya maoy instrumentong gigamit sa Diyos sa pagtultol sa katawhan ngadto sa Usa nga nagaluwas, nga mao, si Jesus. Nagaawhag ako kaninyo sa paghunong sa pagtamay sa ubang iglesya ug paghatag sa bug-os nga pagtagad sa gasa sa gugma.

S. H., California

Sa “New Catholic Encyclopedia” sa The Catholic University of America, ilalom sa ulohang “Salvation, Necessity of the Church For,” kini nagaingon nga ang usa mahibalo sa kahikayan sa Diyos nga maluwas pinaagi sa pagtuo ug “pinaagi sa Iglesya Katolika, nga mao ang Mistikong Lawas ni Kristo, nga gawas niana wala ing kaluwasan.” Sa unahan ug diyutay kini nagaingon: “Ang panginahanglan sa Iglesya alang sa kaluwasan tin-awng gibatbat sa Iglesya ingong gipadayag nga kamatuoran. . . . Busa, si Boniface III nagpatuo diha sa iyang bula nga ‘Unam sanctam’ nga gawas sa Iglesya ni Kristo wala ing kaluwasan ni kapasayloan sa mga sala.” Kami nagtuo nga sa kaayohan sa tanang tawo nga masayod sa tinuod nga kahimtang, apil kadtong mga bahin diin ang mga organisasyon sa iglesya o ilang mga pangulo wala mahiuyon sa pagtulon-an ni Kristo. Kon tudloan ang katawhan sa pagsimba sa Diyos sa paaging nahasupak sa tinuod nga pagtulon-an sa Bibliya, ug nga dili niya dawaton, tinong pagpakitag gugma kanila ang pagpahibalo kanila sa mga kamatuoran, sama sa gibuhat ni Jesus, sumala sa nahitala sa Mateo 15:8, 9.—ED.