Ang Kinamaayohang Kagamhanan—Sa Dili Madugay!

KON walay kagamhanan anaa ang anarkiya. Kini balikbalik gihulagway dihang ang mga puwersa sa balaod ug kahusay nangwelga o wala moobra. Ang sangpotanan? Ang malapasong minoriya nagpahimulos sa kahimtang aron mangawat ug manglaglag. Kini nagapunting sa kamatuorang ang tawo dili makakinabuhi sa usa ka mahusay nga katilingban gawas adunay kagamhanan sa pagpaigoigo sa balaod ug kahusay sa kaayohan sa tanan.

Apan ang uban motubag nga kon adunay kagamhanan kadaghanan adunay laing matang sa pagpangawat​—ang mga politiko ug dakong negosyo nagapuno sa ilang mga bulsa tungod sa ilang impluwensiya. Ang panghiphip, panghukhok, ug panglimbong maoy kasagarang mga batasan sa politika. Ang dakog-sapi nga mga kontrata sa gobyerno ipang-apod-apod ngadto sa pinaborang “mga higala.” Ingong sangpotanan, daghang tawo ang nawad-ag kasibot sa politika ug sa mga politiko, ug dili na gani magtagad sa pagbotar. Ngano? Ang usa ka hinungdan mao nga sa kadaghanan ang mga kagamhanan wala makapasalig sa hustisya ug pagkamanagsama sa tanan.

Nganong sa kadaghanan, bisan pa sa taas-dunggon nga mga mithi ug makitawhanong mga manifesto o pahayag, ang politika nahimong makapabahin ug malaglagon kaayo sa tawhanong kinabuhi?

Natago nga Impluwensiya Luyo sa Politika

Sa pagtubag niining pangutanaha kinahanglang mobalik kita sa kasaysayan sa kapin ug 1,950 ka tuig ngadto sa usa ka bukid sa Palestina. Didto nahitabo ang usa ka talagsaong kabildohay nga mao ang yawi sa pagsabot sa isyu sa tawhanong pagmando. Si Jesus hapit na niadtong mosugod sa iyang publikong ministeryo. Si Satanas, ang pangunang kaatbang sa Diyos alang sa unibersohanong pagmando, nagpahimulos sa higayon sa pagsulay kang Jesus sa paningkamot nga bungkagon ang iyang integridad. Ang kasaysayan nagatug-an kanato nga si Satanas “nagpakita kang [Jesus] sa tanang gingharian sa kalibotan [sa usa ka panan-awon] ug sa ilang himaya, ug siya miingon kaniya: ‘Kining tanang butanga igahatag ko kanimo kon ikaw moyukbo ug mohimo sa usa ka buhat sa pagsimba kanako.’”​—Mateo 4:​8, 9.

Sa walay-kataposang panalangin sa katawhan, gisalikway ni Jesus ang tanyag. Apan unsay ginatug-an kanato niining hinungdanong panagtagbo mahitungod kang Satanas ug sa sistema sa kalibotan, ang “tanang gingharian sa kalibotan”? Nga si Satanas mao ang dili-makitang “magmamando niining kalibotana.” (Juan 12:​31; 14:​30; 16:​11) Busa si apostol Juan nakasulat: “Kita nahibalo nga kita mga anak sa Diyos ug ang tanang ubang bahin sa kalibotan alirong kanato nailalom sa gahom ug pagmando ni Satanas.”​—1 Juan 5:​19, The Living Bible.

Busa ang daotang espiritu ni Satanas mao ang nanuhotsuhot sa politikanhong sistema sa kalibotan. Siya ang tinuod nga tinubdan sa mga prinsipyo nga gitigom ni Machiavelli. Si Satanas mao ang “espiritu nga karon nagalihok taliwala sa maalsahong mga sakop sa Diyos” kay siya mao “ang pangulo sa espirituhanong mga gahom sa kahanginan.”​—Efeso 2:​2, The New English Bible.

Ang pila tingali lisdan sa pagdawat nga adunay daotan, dili-makitang espirituhanong gahom nga nagadasig sa politikanhong mga gahom sa kalibotan. Apan kini usa ka sukaranan sa pagsabot sa katibuk-ang hulagway nga ginahatag sa Bibliya mahitungod sa usa ka away tungod sa unibersohanong pagkasoberano. (Pinadayag 12:​7-9) Gigamit ni Satanas ang politika sa pagbahin sa katawhan ug pagpahilayo sa pagtagad sa tawo gikan sa matuod nga paglaom sa gipasig-uling matarong nga pagmando, nga mao, ang kagamhanang Gingharian sa Diyos pinaagi ni Kristo.​—Mateo 4:​23; 9:35.

Malamposon gayod si Satanas! Pinaagi sa iyang pagpahimulos sa makapabahing politika ug sa nasyonalismo iyang gigamit ang mga tawo nga “nagbayaw sa kagamhanan ingong balaan . . . o nagpaila nga kana mao ang pagmartsa sa Diyos sa kasaysayan.” Alang sa pipila, ang “pagsimba sa estado ingong personipikasyon sa espiritu sa nasod kinahanglanon sa pagkab-ot sa nasodnong dulnganan.” (Ideas in Conflict, Edward Burns) Ang Nazi nga Alemanya mao ang naandang pananglitan. “Walay butang labi pang gipasiugda kay sa pagsimba sa Nasismo ug sa iyang Führer,” matud si Propesor Palmer. Bisan karon ang mga politiko nagagamit niining samang kasangkapan sa pagpauswag sa ilang mga ambisyon, apan sa kadaotan sa katawhan. Tungod sa politikanhong interes sa kaugalingon, atong giatubang ang posibleng pagkapuo.

Unsay makabira sa tawo pahilayo sa ngilit sa nukleyar nga katalagman? Aduna bay matang sa kagamhanan nga makapahiusa sa katawhan? Unsay gikinahanglan aron ang tanang tawo magmaunongon sa usa ka matarong nga kagamhanan?

Kalinaw ug Panaghiusa—Sa Unsang Paagi?

Ang historyanong si Edward Burns misulat: “Ang pagpugong ug pagkunhod sa nasyonalismo, ug ang pagpuli niana sa usa ka epektibong organisasyon sa kalibotan, pihong maoy usa sa labing lisod nga mga suliran sa modernong mga panahon.” (Italiko amoa.) Ang ubang mga hunahuna nagkarapkarap sa pagpangitag sulbad sa pagtinguha sa tawo alang sa panaghiusa. Ang Katsila-Amerikanong pilosopo si George Santayana “wala makakitag paagi sa pagpapas sa gubat gawas pinaagi sa pagmugnag usa ka unibersohanong kagamhanan nga may katakos sa pagpatuman sa pagbuot niini diha sa tanang estado sa yuta. Walay Liga sa Kanasoran o Hiniusang Kanasoran ang paigo.”​—Italiko amoa.

Nganong ang mga politiko wala makakab-ot sa maong mithi sa usa ka unibersohanong kagamhanan? Ang usa ka hinungdan mao nga nagababag ang mapiotong nasyonalismo. Sumala sa giingon sa usa ka historyano: “Ang pagkontrolar o pagpapas niana sa bisan unsang paagi nga nakulangan sa edukasyon sa tawhanong pagkamanagsoon lisod basta ang atong kalibotan mausbawong hasolon sa mga pagdumot ug mga kahadlok.” (Italiko amoa.) Nangatarongan ang awtor si H. G. Wells: “Kinahanglang ang nagkahiusang hunahuna sa katawhan mahupong sa ideya sa tawhanong panaghiusa, ug ang ideya nga ang katawhan maoy usa ka pamilya, angay mahimong ulohan sa unibersohanong pagtudlo ug pagsinabtanay.”​—Italiko amoa.

Posible ba ang maong edukasyonal nga programa? Dili lamang posible kini; kini usa ka kamatuoran! Diin man? Taliwala sa minilyong Saksi ni Jehova diha sa 203 ka kanasoran ug kayutaan. Sila nakasinati na sa kausaban sa kasingkasing ug hunahuna. Sa baylo, ang mga Saksi ni Jehova nagaapektar usab sa kapin sa upat ka milyong kaubanan. Unsang kausaban ang ilang gipatungha? Ang espiritung molabaw sa nasodnong intereses gipatungha sa ilang taliwala nga gipasukad sa Kristohanong gugma. Ilang gibiyaan ang nasyonalismo nga “nalangkit sa rasismo, pagkalimitado, pagkamadapigon, pagkadili-matinugoton, paglutos, ug pagkapanatiko.”​—Ideas in Conflict, panid 502.

Ang Bibliya mihatag ug pasiunang mga talan-awon niining dakong edukasyonal nga buluhaton alang niining kaliwatana. Mihatag si Jehova ug pasalig pinaagi sa iyang manalagnang si Isaias nga “ang tanan nimong mga anak mao unyay mga tawong natudloan ni Jehova, ug ang pakigdait sa imong mga anak magmadagayaon.” (Isaias 54:​13) Kini ipadayon hangtod ang tibuok yuta “mapuno sa kahibalo ni Jehova sama sa katubigan nga nagapuno sa dagat mismo.”​—Isaias 11:9.

Mipahayag usab si Jesus ingong bahin sa ilhanan sa kataposang mga adlaw alang niining politikanhon, komersiyal, relihiyosong sistema: “Kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:​14) Kini nagapatin-aw sa balay-balay edukasyonal nga kampanya nga ginabuhat sa mga Saksi ni Jehova niining ika-20ng siglo. Sila nagapahayag sa Ginghariang kagamhanan nga duol nang molihok gikan sa mga langit sa “pagdugmok ug paglaglag sa tanan niining [politikanhon karon] nga mga gingharian, ug kini mismo mobarog sa mga panahong walay katinoan.”​—Daniel 2:44.

Unsay Anaa sa Haduol nga Umaabot?

Apan, una pa mogahom sa tibuok yuta ang maong teokratikanhong Ginghariang kagamhanan pinaagi ni Kristo, kinahanglang mahitabo ang pila ka hitabo, sumala sa panagna sa Bibliya. Ang basahong Pinadayag nagahatag sa mga karakter. Kini sila mao:​

“Usa ka babaye . . . ‘Ang Dakong Babilonya, ang inahan sa mga bigaon.’” (Pinadayag 17:​3-5) Siya nagahawas sa imperyo sa kalibotan sa bakak nga relihiyon nga nagaimpluwensiya sa “daghang katawhan ug mga panon ug mga nasod ug mga pinulongan.”​—Pinadayag 17:15.

“Usa ka mapulang mapintas nga mananap” nga ang babaye nagasakay niana. Kining mananapa, usa ka imahen sa mas dakong “mapintas nga mananap” nga gihisgotan sa nangagi sa Pinadayag nga gihatag kang Juan, nagasimbolo sa internasyonal nga organisasyong nagatigom ngadto sa usa ka hawanan sa mga hawas sa halos tanang politikanhong sistema niining kalibotana. Sa sinugdan kadto mao ang Liga sa Kanasoran. Karon kini mao ang Hiniusang Kanasoran. Sa pagkamatuod kini usa ka pagsabutsabot batok sa Gingharian sa Diyos. Ang tumong niini mao ang pagbuhat sa butang mabuhat lamang sa Gingharian sa Diyos​—ang pagtukod sa malungtarong pakigdait.​—Pinadayag 13:​l, 2, 15; 17:​3, 8; 20:4.

Karon unsang mga hitabo ang kinahanglang mahitabo sa dili madugay? Ang Pinadayag nagapasalig kanato nga “ang mapulang mapintas nga mananap” ug ang mga nagbatog politikanhong gahom “magadumot sa bigaon ug magalaglag kaniya ug . . . magasunog kaniya sa bug-os sa kalayo.” (Pinadayag 17:​16) Unsay gitagna niining matin-awng pinulongan? Nga ang politikanhong mga elemento, nga gihawasan diha sa Hiniusang Kanasoran, mobalitok sa imperyo sa kalibotan sa bakak nga relihiyon aron laglagon kini. Apan kini nagkahulogan nga sila sa kataposan mobalitok usab batok sa matuod nga mga hawas sa Gingharian sa Diyos pinaagi ni Kristo, nga mao, ang mga Saksi ni Jehova.a Unsa unyay mosangpot?

Kana mohagit sa reaksiyon gikan sa mga langit, gikan sa ‘usang nagsakay sa maputing kabayo nga nagahukom ug nagapakiggubat sa pagkamatarong,’ nga mao, “Ang Pulong sa Diyos,” si Kristo Jesus. (Pinadayag 19:​11-16) Sa ingon atubangon sa kanasoran ang gubat sa Diyos sa Armageddon. (Pinadayag 16:​16) Kining matarong nga gubat batok kang Satanas ug sa iyang “kalibotan” magatimaan sa kalaglagan sa tanang politikanhong sistema. Kini pagasundan sa pagkapasig-uli sa teokratikanhong pagmando ibabaw sa tibuok yuta. Ang yuta mausab ngadto sa paraisonhong kahimtang ug pagapuy-an sa mga maaghop nga nagabuhat sa kabubut-on sa Diyos. Ang makapadaot nga mga politika mahanaw na unya sa yuta.​—Salmo 2:​2, 9; 37:29.

Tungod sa dayag nga kapakyasan sa tanang politikanhong sistema sa pagtagbaw sa kinahiladmang mga panginahanglan sa katawhan, dili ba angay mosalig ka sa kagamhanan nga makapatagbaw sa tanang tawo? Tungod sa pagkadinalian sa mga panahong atong ginapuy-an, kami nagadapit kanimo sa pagpakigkita sa mga Saksi ni Jehova diha sa inyong dapit sa pagsusi nga labi pang mainampingon sa ebidensiya nga nagapailang haduol na ang Ginghariang kagamhanan sa Diyos.​—Lucas 21:​25-33.

[Mga footnote]

[Blurb sa panid 12]

Tungod sa politikanhong interes sa kaugalingon, atong ginaatubang ang posibleng pagkapuo

[Blurb sa panid 13]

“Ang ideya nga ang katawhan maoy usa ka pamilya angay mahimong ulohan sa unibersohanong pagtudlo ug pagsinabtanay.”—H. G. Wells