Sa Unsang Paagi Matuman ang Kalinaw?

Unsa ang pila sa dagkong batong kapandolanan nga mopugong sa pagkatuman sa malungtarong kalinaw? Gikan sa among nag-unang artikulo, kita makaila sa mosunod:

(1) Hakog hamiling nagamandong mga matang (politikanhon, militaryo, komersiyal, ug relihiyoso) nga nagmaneobra sa katawhan.

(2) Usa ka sistema sa edukasyonal nga pagkondlsyon sa hunahuna nga gipasukad sa hinobrang nasyonalismo nga nagatudlo sa “sagradong garbo,” nasodnong pagkalabaw, dili pagsalig, ug pagdumot.

(3) Ang katibuk-ang paggahom ug pagtultol sa ‘diyos niining sistema sa mga butang, nga nagbuta sa mga hunahuna sa mga walay pagtuo,’ nga mao, si Satanas nga Yawa.—2 Corinto 4:4.

SA TIBUOK kalibotan, kinahanglang may kausaban sa panghunahuna, kausaban sa kasingkasing. Ug kana nagkahulogan sa kausaban sa edukasyon—pagtudlo sa tanang katawhan sa kalinaw, gugma, ug mutuwal nga pagtahod. Ug kana nagkahulogan usab sa tibuok-kalibotang kausaban sa pamunoan ngadto sa nahiusang pamunoan nga pagatahoron sa tanang nasod—usa ka dili-madunotong kagamhanan sa kalibotan. Sa baylo, kana nagkahulogan sa kausaban sa pagmando sa kalibotan—gikan sa pagmando ni Satanas ngadto sa pagmando sa Diyos! Apan sa unsang paagi mahitabo ang maong mga kausaban?

Gitagna sa Bibliya kapin ug 2,500 ka tuig nga miagi nga sa panahon sa kataposan niining sistema sa mga butang ‘ang Diyos sa langit magatukod sa usa ka gingharian nga dili gayod malaglag.’ (Daniel 2:44) Kini mao ang walay-kataposang Gingharian nga alang niana gitudloan ni Jesus ang iyang mga sumusunod sa pag-ampo: “Umanhi ang imong gingharian. Mamatuman ang imong kabubut-on, maingon sa langit, dinhi usab sa yuta.” (Mateo 6:9, 10) Kanang ginghariana nagkahulogan sa usa ka bag-ong pamunoan pinaagi ni Kristo Jesus, gikan sa mga langit, alang sa tibuok yuta, sama sa gisulat ni propeta Daniel: “Ang iyang pagmando [o, pagkasoberano] maoy walay kataposan nga pagmando nga dili mahanaw, ug ang iyang gingharian dili malaglag.”—Daniel 7:13, 14.

Kining langitnong kagamhanan diha sa mga kamot ni Kristo mao ang bag-ong kahikayan nga magpuli sa makapabahin, hakog hamiling mga matang nga nagmandong sayop sa daghang milenyo. Kini mao ang nagamandong bahin sa “bag-ong mga langit ug usa ka bag-ong yuta” nga “atong ginapaabot sumala sa saad [sa Diyos], ug ang pagkamatarong magapabilin niini.” (2 Pedro 3:13) Kini nga kagamhanan mao ang matuod nga “duyanan sa umaabot nga dulnganan sa kalibotan,” dili ang Hiniusang Kanasoran sa New York nga gipasiugda ni Robert Muller, usa ka luyoluyong sekretaryo-heneral sa HK. Bisan pa sa pagproklamar sa HK sa 1986 ingong Internasyonal nga Tuig sa Kalinaw, ang matuod nga kalinaw moabot lamang pinaagi sa giuyonan sa Diyos nga paagi sa Gingharian sa Diyos.

Ang Papel sa Edukasyon

Minilyong katawhan nagapangandam na sa pagpuyong malinawon ilalom sa pagmando nianang Gingharian nga kagamhanan. Sulod sa kapin sa usa ka gatos ka tuig ang dako kaayong edukasyonal nga kampanya gipaabot sa tanang kanasoran sa pagdala sa mensahe sa maong Gingharian ngadto sa tanang tawo. Lagmit ikaw naduaw na sa usa ka makigdaitong hawas sa maong kagamhanan diha sa imong balay, bisan pag niadtong panahona tingali wala ka makaamgo sa bili niadtong duawa. Siya nakigbahin sa labing dakong edukasyonal nga buluhaton sa kasaysayan sa tawo. Kinsa ba ang miduaw? Usa sa mga Saksi ni Jehova. Ug nganong ang mga Saksi nagaduaw kanimo?

Ang mga Saksi nagatanyag sa pagtuon sa Bibliya uban ni bisan kinsang sinserong tawo nga buot masayod sa paagi ni Jehova sa kalinaw. Kining libreng edukasyon nagatabang nag minilyon “sa pagsalsal sa ilang mga espada nga mga punta sa daro ug sa ilang mga bangkaw nga mga galab.” Ang propetang Isaias nagaingon: “Ang nasod dili na mobakyaw ug espada batok sa nasod, ni sila makakat-on pa sa gubat.”—Isaias 2:4.

Ginatuman na sa mga Saksi ni Jehova kining tagnaa nga sukwahi sa mga membro sa Hiniusang Kanasoran, kinsa nagabuhat sa binaba o lawasnong gubat batok sa usag usa. Ug giunsa pagkab-ot kini sa mga Saksi? Pinaagi sa pagtuon sa Bibliya aron mabatonan ang hunahuna ni Kristo bahin sa mga butang; pinaagi sa pagkakat-on nga ang Diyos sa pagkamatuod maoy gugma ug kinahanglang ilang ibanaag ang iyang gugma ngadto sa ilang isigkatawo sa tanang mga nasod ug mga rasa. Tungod niana ilang gihuptan ang estriktong baroganan sa pagkaneyutral bahin sa politikanhong mga isyu ug sila dili moapil sa bisan unsang gubat o away, bisan pag unsay mahitabo.—1 Juan 4:8; Juan 13:34, 35.

Sumala sa natuman nga tagna sa Bibliya, ang panahon haduol na nga molihok ang Gingharian sa Diyos. (Mateo 24:3-35) Sa dili madugay ang gubat sa Diyos sa Armageddon magtapos sa pagmando ni Satanas uban sa tanan nianang makapabahin ug makadaot nga politika. (Pinadayag 16:14-16; 19:17-21) Karon mao ang panahon sa pagdangop ngadto sa Diyos ug sa iyang Pulong. Ang mga Saksi ni Jehova sa inyong silinganan malipayng motabang kanimo sa pagpamatuod sa imong kaugalingon nga ang walay kataposang kalinaw dili usa ka damgo nga dili matuman kondili usa ka kamatuoran nga sa duol na matuman sa tibuok kalibotan. O ayaw kaikog sa pagsulat sa mga magpapatik niining magasina alang sa dugang impormasyon ug tabang.

[Letrato sa panid 9]

“Ug ilang pagasalsalon ang Hang mga espada nga mga punta sa daro . . . Ang nasod dili mobakyaw sa espada batok sa nasod, ni sila makakat-on pa sa gubat.”—Isaias ang propeta