Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • g85 9/8 p. 7-10
  • Ang Kinabuhi Diha sa Usa ka Dakong Kompaniya

Walay video nga available.

Sorry, dunay problema sa pag-load sa video

  • Ang Kinabuhi Diha sa Usa ka Dakong Kompaniya
  • Pagmata!—1985
  • Sub-ulohan
  • Susamang Materyal
  • Mga Pamatasan Diha sa Trabaho
  • Pagkamaunongon sa Pundok
  • Mga Balos ug mga Promosyon
  • Kaminyoon ug Pamilya
  • Trabaho ug Relihiyon
  • Unsay Hinungdan sa ‘Milagro’?
    Pagmata!—1985
  • Unsay Hinungdan sa Problema?
    Pagmata!—1987
  • Ang Pagkugi—Dihang Kini Usa ka Maayong Kinaiya
    Pagmata!—1993
  • Usa ka Sorpresa Alang sa Japan
    Ang Bantayanang Torre Nagapahayag sa Gingharian ni Jehova—2015
Uban Pa
Pagmata!—1985
g85 9/8 p. 7-10

Ang Kinabuhi Diha sa Usa ka Dakong Kompaniya

ANG tibuok-kinabuhing trabaho, mapinadayonong edukasyon, mga promosyon, bonus, pabalay sa kompaniya, pasilidad sa kalingawan​—kini sila ug daghan pang benepisyo mao ang pangandoy sa mga trabahante sa tibuok kalibotan. Sa Hapon, kana mao ang adlaw-adlaw nga mga kamatuoran sa daghang trabahante niini. Ngani, sila lagmit mao ang mga bahin sa Hapones nga milagro nga giestoryahan pag-ayo ug gidayeg sa katawhan sa ubang dapit.

Hinuon, adunay ubang bahin nga wala kaayo hisayri sa mga tagagawas. Pananglitan, unsa ang gidak-on sa kinabuhi sa usa ang kontrolado o apektado sa dagkong mga kompaniya? Sa unsang gidak-on apektado ang kaminyoon, pamilyahanong kinabuhi, sosyal nga kinabuhi, ug bisan ang relihiyosong mga pagtuo sa usa? Unsang mga sakripisyo ang kinahanglang buhaton aron mohaom? Kini sila mga butang daling hikalimtan sa mga tagagawas kay sila gilandongan sa kauswagan ug kalamposan. Apan, sa dakong bahin, dili ba kini sila ang mga butang magahukom sa kataposan kon kaha ang usa ka tawo tinuod malipayon, tagbaw, ug sa ingon malamposon?

Mga Pamatasan Diha sa Trabaho

Ang usa ka resulta sa tibuok-kinabuhing trabaho mao ang sensitibong butang maylabot sa ranggo o pagkataas ug serbisyo o senyoridad. Ang mga lalaking taas ug ranggo nakabatog taas nga eksperyensiya uban sa kompaniya. Kinaiyanhon lamang sila mangayo sa pagtahod ug kooperasyon sa mga batan-ong nailalom kanila. Ang batan-on o bag-ong mga empliyado, sa baylo, hatagag ranggo sumala sa katuigan sa ilang pagserbisyo sa kompaniya. Kini momugna sa pormal nga palibot diha sa trabahoan, ug ibanaag kini sa ilang sinultihan ug kagawian.

Sa Hapones adunay tulo ka uso sa sinultihan. Pinaagi lamang sa pagpamati sa pagpili sa usa ka tawo sa mga pulong makaila ka kon kaha siya nakigsulti ngadto sa labaw kaniya, isigkaingon, o sa junior o ubos. “Ang paglitok [lamang] sa iyang ngalan kon makigsulti sa usang gulanggulang o taastaas ug ranggo maoy pagkawalay tahod,” misaysay ang usa ka Hapones nga ehekutibo. Hinunoa, ang apelyido o titulo sa tawo sama sa shacho (presidente) o bucho (manedyer) gamiton uban sa matinahorong mga pulong “san” o “sama.”

Ang pagyukbo, nga mahimong magpasabot “salamat,” “tabi,” “gikasubo ko,” ug daghang laing butang maoy kinahanglanong bahin sa pamatasan sa opisina. Mao usab ang pulong “hai” (oo) uban sa pagyango sa ulo. Ugaling, kining “oo” wala magpasabot nga “Oo, uyon ako,” kondili nagpasabot “Oo, nakasabot ako sa imong gisulti.” Kini mao lamay lihok sa pagpakitag pagtahod sa nagsulti.

Ingong sangpotanan, ang kadaghanang lalaki nahisamag isdang nakagawas sa tubig kon mahigawas sa trabahoan. Kon makatagbo silag laing lalaki nga wala magtrabaho sa samang kompaniya, ang estoryahay bakikaw hangtod masayod sila sa iyang ranggo aron magamit ang tukmang uso sa sinultihan. Ang mga kard ug mataktikanhong mga pangutana magamit sa pagtino niini una makasugod ang estoryahay. Ang dili-pormal ug kaswal nga estoryahay lisod alang kanila bisan pag ngadto sa ilang mga asawa ug mga anak. Sila dili gil-asan lamang kon kauban sa isigkatrabahante sa kompaniya.

Pagkamaunongon sa Pundok

Sa pagpausbaw sa espiritu sa pundok, ang kadaghanang kompaniya nagataganag uniporme sa ilang mga trabahante. Ang mga trabahante nagaorganisar usab sa ilang kaugalingon nga gagmayng mga pundok, dili aron mangayog labi pang maayong mga kahimtang sa trabaho o dagkong mga suweldo, kondili aron hisgotan kon unsaon pagpauswag ang kahanas ug produksiyon. Ang magdudumalang direktor sa usa sa higanteng mga kompaniya sa Hapon, nga walay welga sulod sa 25 anyos, mibatbat sa ilang mga tigom niining paagiha: “Kami may bibong mga panaghisgot, apan sa kataposan ang tanan mokooperar.” Ang indibiduwal nga mga trabahante, kay mibating nakapahayag bahin sa ulohan, labi pang makiling sa pagpaluyo sa mga lagda sa kompaniya. “Sila nagahunahuna alang sa pundok ug dili alang sa ilang kaugalingon,” matud sa direktor.

Ang kalainan tali sa Hapones nga pagdumala ug sa iya sa Tinipong Bansa giilustrar sa usa ka Hapones nga ekonomista niining paagiha: “Ang among sistema nahisamag elektrik tren, nga ang matag kotse may kaugalingong makina, samtang ang inyong sistema nahisamag hataas nga tren nga paandaron sa duha o tulo ka lig-ong makina, nga walay makina sa ubang kotse. Sultihan ninyo ang inyong mga trabahante sa pagsunod. Gusto namong ang mga tawo magbaton sa ilang kaugalingong panukmod​—ug magkahiusa sa paglihok.”

Sa pagpadayag sa tukmang panukmod, ang tanang empliyado laoman sa pagtrabahog dugay ug makugihon. Bisag ang gobyerno nagbutang ug tumong nga pagka 1985 ang tanang kompaniya magtugot sa tag-duha ka adlawng hinapos-sa-semana, kasagaran gihapon ang unom ka adlaw nga semana sa trabaho. Sa bag-o pa lamang, ang mga bangko misugod sa batasan sa pagsirag usa ka Sabado matag bulan. Katingalahan, ang katilingban wala masibot, ug ang usa ka editoryal sa Yomiuri Shimbun nag-isip niana nga paagi sa pagpahilom sa “langyawng mga pagsaway nga ang mga Hapones maoy sobra ka trabahante.”

Ang obertaym nga trabaho, nga kasagaran walay bayad, maoy naandan. Gikatahong kasagaran ang pagkakitag mga trabahante nga mobiya sa ilang mga opisina sa 11 s.g. o bisan sa tungang gabii. Bisan pa niana, kini gidawat nga naandan lamang. Ang usa ka surbi sa bag-ong mga graduwado sa hayskul ug unibersidad nga gidumala sa Konseho sa Junior nga Ehekutibo sa Hapon nakakaplag nga “79 porsiento sa mga mitubag motrabahong obertaym kon hangyoon bisan pag kinahanglang ilang kanselahon ang ilang deyt,” mitaho ang The Japan Times.

Ang mga ehekutibo ug superbisor dili kay nagapahayahay. Dugang sa tagdugay nga mga adlaw sa opisina, kadaghanan gugolon nila ang mga gabii ug bisan mga hinapos-sa-semana sa pagtambong sa mga miting o pag-abiabi sa mga kliyente o mga kaubanan sa negosyo, nga kadaghanan sa gabii nang dako. Kining tanan buhaton ingong pagkamaunongon sa kompaniya. “Dili ko buot mag-abiabi,” matud sa usa ka batan-ong ehekutibo nga may asawa ug upat ka anak, “apan kini nahimong institusyon.”

Mga Balos ug mga Promosyon

Ang tagdugay nga mga bakasyon dili gayod batasan sa Hapones. Ang usa ka taho sa gobyerno nagapadayag nga bisan pag ang kadaghanang trabahante may katungod sa 15 ka sinuweldohang adlaw sa bakasyon sa usa ka tuig, sila aktuwal nagakuha lamag 8.3 ka adlaw sa aberids. Ang dagkong mga pista opisyal maoy sa sinugdan sa tuig ug sa Agosto dihang saulogon ang kostumbre sa pagduaw sa mga lubong sa katigulangan. Unya anaa ang mga ekskursiyon sa kompaniya nga niana dahomong motambong​—ug nagatambong​—ang tanang empliyado. Kana kasagarang duha ka adlawng mga okasyon sa hinapos sa semana ngadto sa kabukiran, init nga mga tuboran, ug mga balay-bakasyonan sa kompaniya diin daghan ang pagkaon ug ilimnon. Ang mga trabahante makarelaks, makalingawlingaw, ug labaw nga magkailhanay sa usag usa.

Ang usa ka bililhong butang sa Hapones nga mga trabahante mao ang kaduha-sa-tuig nga bonus, nga ihatag sumala sa kahimtang sa panalapi sa kompaniya. Sa aktuwal kini bahin sa ilang suweldo nga hiposon sa kompaniya. Kon maayog dagan ang kompaniya madawat sa mga trabahante ang dakong kantidad isip bonus. Apan kon dili kaayo maayo ang negosyo kining bahina tingali kubsan. Kini epektibong panukmod sa mga trabahante.

Ang mga suweldo ug mga promosyon malangkobong tinoon pinaagi sa sistema sa pagkataas ug serbisyo. Talagsaong ang bag-ong empliyado moasenso nga una sa iyang mga labaw, bisan pag unsa tingali niya ka kuwalipikado. Kon kini mahitabo ugaling, kasagaran nga ang gisayloan hatagag pila ka bag-ong titulo aron dili maulaw. Tungod niini ang kabingkilan labing gamay, ug maalagaran ang kaayohan sa pundok.

Lahi ang kahimtang sa babayeng mga empliyado. Samtang duolag 39 porsiento sa mga mamumuo sa Hapon maoy babaye, sila kasagarang suweldohan sa katunga lamang sa kantidad sa suweldo sa usa ka lalaki. Ngani, ang kadaghanang kompaniya dili mohatag ug masaarong mga katungdanan ngadto sa mga babaye bisan pag nabatonan nila ang mga kuwalipikasyon, kay gidahom nga sila magtrabaho lamang hangtod sila maminyo ug magpamilya.

Kaminyoon ug Pamilya

Tungod sa pit-os nga mga obligasyon sa trabaho​—unom ka adlaw nga semana sa trabaho ug kanunayng obertaym—​ang lalaking nagatrabaho diyutay na lamag panahon alang sa iyang pamilya. Ang pila ka lalaki molakaw alang sa trabaho sa dili pa magmata ang mga bata ug mopauli dihang sila nangatulog na. Talagsa ra nilang makita ang ilang mga anak, gawas tingali sa Dominggo. Gikaingong ang kinabuhi sa kasagarang empliyado sa kompaniya o sarariman (lalaking may suweldo) sumala sa pagtawag kaniya sa Hapon, nasentro sa iyang trabaho. Ang iyang panimalay, asawa, ug pamilya nahisamag gamayng dugang negosyo, nga motagana niyag lugar nga kan-an ug katulgan, ug tinong dungog sa komunidad.

Nga may pila ka eksepsion, ang asawa magaatiman sa tanang butang sa panimalay. Kini nagaapil dili lang sa adlaw-adlawng mga buluhaton sa panimalay kondili sa dagkong mga desisyon sama sa kon asa mopuyo, unsay paliton, ug bisan ang edukasyon ug disiplina sa kabataan. Busa, sa malalangong paagi, bisan pag ang mga lalaki mosulti ug molihok nga maorag sila mao ang mga ulo sa ilang mga pamilya, ang kadaghanang pamilya sa mga empliyado sa dakong kompaniya sa pagkamatuod maoy matriarkang mga kahikayan.

Ang mga ulitawo may mga suliran usab. Tungod sa iyang trabaho siya diyutay na lamag panahon alang sa pagpakiglabot gawas sa pag-abiabi maylabot sa negosyo. Gawas sa kompaniya, basin siya diyutay rag higala. Apan, ang Hapones nga katilingban motamay sa ulahing mga kaminyoon. Si bisan kinsang wala pa maminyo inigkaabot niya sa edad 30 tingali isipong katingad-anan. Kini nagapatin-aw sa pagkakaylap sa omiai, o hinikay nga mga kaminyoon, nga mao ang hinungdan sa halos 60 porsiento sa tanang pagminyo sa Hapon bisan karong adlawa.

Ang dagkong mga kompaniya kanunayng magabalhin sa ilang mga tawo sa tibuok nasod gikan sa usa ka sanga ngadto sa lain. Kini nagkahulogan sa pagbalhin ug pagsinati sa bag-ong mga silingan ug mga silinganan matag duha o tulo ka tuig. Bisan pag ang matag pagbalhin kasagarang duyogan sa promosyon ug pag-uswag sa suweldo, kini makamugnag mga suliran alang sa pamilya kon bahin sa pag-eskuyla sa kabataan ug pag-atiman sa tigulang nga mga ginikanan. Apan kana mao ang mga kalipay ug mga kapaitan sa pagkataas ug serbisyo ug tibuok-kinabuhing trabaho diha sa dagkong mga kompaniyang Hapones.

Trabaho ug Relihiyon

Ang pagkamahunahunaon sa pundok ug ang agda sa pagpahiuyon dakog bahin sa pag-umol sa relihiyosong mga tinamdan sa mga Hapones. Aron mohaom, ang usa kinahanglang dili magmapugsanon mahitungod sa mga pagtuo sa usa kondili matinugoton, nga andam mokompromiso. Busa, gikaingong ang Hapones nga salabotan sa moralidad wala ipasukad sa matarong o daotan kondili sa pagkadinawat o pagkadili-dinawat.

Busa, sa dagkong mga kompaniya, ang usa ka trabahante dahomong moapil sa mga rituwal sama sa mga kasal, mga paglubong, ug ubang okasyon bisan pag sila Buddhista, Shinto, o Kristohanon. Ang kadaghanang lalaki dili samokon sa konsensiya mahitungod nianang naandang pag-apil. Sila nakatuon sa pagkinabuhi nga walay personal nga mga pagtuo ug kombiksiyon, o pagpailalom niana sa kagustohan sa ilang kompaniya. Busa, daghang lalaki dili matinagdanon sa relihiyon. Lisod nga sila maghunahuna sa relihiyoso o espirituwal nga mga butang. Tingali saulogon gihapon nila ang mga rituwal ug mga kostumbre nga gipasa gikan sa mga kaliwatan sa nangagi, apan sila sa pagkamatuod walay relihiyosong pagtuo.

Sa laing bahin, ang mga babaye, ilabina ang mga inahan, kinsa nagainusara sa pag-atiman sa akademikanhon, moral, ug relihiyosong edukasyon sa kabataan, kinaiyanhong madani sa relihiyon. Apan bahin kanila, ang kiling maoy sa hinobra​—kon mas daghan mas maayo. Ang usa ka batan-ong inahan mipahayag kon unsa tingali ang kasagarang relihiyosong tinamdan diha sa usa ka balita sa magasing Time: “Obligado ako sa pagtahod sa akong mga ginikanan ug akong ginapakita kini pinaagi sa Buddhismo. Ako usa ka Haponesa, mao nga ako nagatuman sa tanang ginagmayng rituwal sa Shinto. Ug sa akong hunahuna maanindot ang kasal sa Kristohanon. Kini kontradiksiyon, apan unsay anaa niana?” Sumala sa nasyonal nga senso, bisag ang tibuok populasyon sa Hapon 120 milyon, adunay 87 milyong Buddhista ug 89 milyong Shintoista. Dayag nga wala ra sa buot sa daghan ang pagpahayag nga sila mga sumusunod sa dili usa ra ka relihiyon.

Gikan sa atong daklit nga paghisgot sa kinabuhi diha sa dakong kompaniyang Hapones, tin-aw nga may labaw pa kay sa dayag nga mga benepisyo nga gidayeg pag-ayo. Ang kamatuoran mao nga gibati sa pila ka awtoridad nga ang maong mga benepisyo gipasobrahan kaayo. Hinunoa, ilang nakita ang mga ilhanan nga dili maayo ang tanan sa maong gimithi nga nasod sa ekonomikanhon ug teknolohikanhong mga higante. Unsa ba ang maong mga ilhanan, ug unsa ang kaugmaon sa Hapones nga milagro?

[Letrato sa panid 8]

Ang tanan gidahom sa pagtrabahog dugay ug makugihon

[Tinubdan]

Hapones nga Sentro sa Impormasyon

[Letrato sa panid 10]

Ang mga okasyon sa dakong kompaniya nagaapil sa mga kasal

[Tinubdan]

Hapones nga Sentro sa Impormasyon

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa