Nagdakong Suliran sa Pagbasa

HANDURAWA ang suliran sa pagtultol sa imong adtoan kon dili ka makabasag karatula sa karsada. Unsaon nimo pag-inom sa tukma sa tambal kon dili ka makabasa sa mga tugon diha sa sudlanan? Ug unsaon nimo pag-aplay ug trabaho kon dili ka makabasag aplikasyon?

Kini pipila ra sa mga sulirang atubangon niadtong dili makabasa. Apan gibanabanang usa sa lima ka Amerikanong hamtong, mga 27,000,000, ang dili makaantigong mobasa o functionally illiterate.a Sa 1980 tanantanan may mga 824 milyong dili makaantigong mobasa sa tibuok kalibotan, nga ang edad 15 ug sobra pa, ug ang gidaghanon kusog nagauswag. Makapasubo ang sangpotanan. Pananglitan, sa Tinipong Bansa ang Departamento sa Pamuo mitaho nga abot ug 75 porsiento sa walay trabaho ang nakulangan sa gikinahanglang mga kahanas sa pagbasa ug komunikasyon.

Apan kadtong dili makabasa dili lamang moatubang sa mga suliran sa panarbaho. Sila mahikawan ug dako kaayo nga mohatag kahimuot ug kalipay. Hunahunaa ang mas maayong matang sa kinabuhi nga mahimong mosangpot sa labaw nga kahibalo sa kalibotan alirong kanato. Pagkalimitado unta nato kon kita makatuon lamang gikan sa atong mapanid-an o masinati sa atong kaugalingon! Ang pagbasa magbukas sa ganghaan ngadto sa natigom nga kahibalo sa kasiglohan.

Ang pagbasa maoy talagsaong tawhanong katakos. Sumala sa ginapahayag sa Science Digest: “Sa usa ka gutlo ang imong mga mata ug kaisipan magbanabana, manglaktod, magpuno sa mga kal-ang ug mag-areglar sa mga kasayoran nga mohagit sa labing batid nga kompiyutir.”

Buot ba nimong pauswagon ang imong kahanas sa pagbasa? O buot ba nimong buligan ang laing tawo sa pagbuhat niana? Sa sunod duha ka artikulo pagasusihon ang pipila sa mga butang makaabag sa mga suliran sa pagbasa, ug ihatag ang mga sugyot sa pagpauswag sa pagbasa sa usa.

[Mga footnote]

[Letrato sa panid 3]

Unsaon nimo pag-aplay ug trabaho kon dili ka makabasa sa aplikasyon?