Sa Nauyog ang Yuta, Misanong Sila

Sinulat sa koresponsal sa “Pagmata!” sa Chile

MIKUSOG ug mikusog pa ang pag-uyog sa yuta. Kami mibalhin ngadto sa pultahan sa among kuwarto. Kadtong didto sa kusina naningkamot sa pagsira sa mga aparador, samtang ang mga libro, mga botelya, mga mesetera, mga baso, ug mga garapon sa jam nanghagsa sa salog sa itaas. Nahibulong kami kon hangtod kanus-a kadto mopadayon.

Di na mistil isulti pa, wala namo kadto orasi, apan sa sunod adlaw ang mantalaan miingong kadto milungtad ug duha ka minutos. Karon, tingali maghunahuna kang ang duha ka minutos daklit ra, apan tuohi ako, matingala ka nga maorag dugay kaayo kana sa mauyog ang yuta ilalom sa imong mga tiil!

Alas 7:47 s.g. kadto sa Dominggo, Marso 3, 1985, dihang milinog dinhi sa Santiago, Chile. Nagpahulay kami sa among kuwarto sa sangang buhatan sa Watch Tower Society sa nahitabo kadto. Ang uban namong kaubang trabahante nanginom ug tsa sa kusina.

Tungod sa linog kami walay koryente sa ubay-ubayng oras. Busa nanggawas ang mga plaslait, mga kandila, ug mga radyong transistor. Sumala sa balita sa radyo, grabeng naapektahan ang mga dapit sa baybay ug mas karaang mga seksiyon sa Santiago. ‘Unsa kaha ang kahimtang sa atong Kristohanong mga igsoon didto?’ kami nahibulong. Dili namo sila makontak—ang mga linya sa telepono kargado sa mga tawag, ug gawas pa, ang mga poste sa telepono natumba niadtong mga dapita. Ang unang tawag nga nakaabot kanamo maoy gikan sa puwesto sa konstruksiyon sa among bag-ong pasilidad sa sanga. Nahupayan kamig dako sa pagkabating maayo ra ang tanan ug ang bag-ong pabrika wala maunsa! Ngani, ang pader lamang nga gipatindog sa dapit sa opisina niadtong buntaga ang natumba!

Niadtong gabhiona pipila ra kanamo ang nakatulog pag-ayo. Igo ra kaming nahikatulog dihang nauyog ang among katre sa linog, nga tungod niadto nahigmata kami. Sa sunod buntag, gitaho sa mga mantalaan ang kadaot, nga nagpakitag mga hulagway sa kadaot nga gipahinabo sa linog, nga nakaabot ug 7.7 sa sukdanang Richter. Ang mga siyudad walay tubig ug koryente. Naguba ang mga taytayan. Kapin ug 140 ka tawo ang patay ug ang gibanabanang 150,000 ang nawad-ag balay. Ang kapildihan tingali $1,800 milyon (U.S.)! Aw, ang linog gibati sa Buenos Aires, Argentina, mga 1,350 ka kilometros (840 milya) ang kalayo sa Atlantikong baybayon! Ang Marso 3, 1985 mahinumdoman sa dugay nga panahon.

Tabang Gikinahanglan sa Madali!

Gihikay dayon namo nga ang lainlaing membro sa mga trabahante sa among sangang buhatan moduaw sa mga dapit sama sa Machalí, Melipilla, Rengo, San Antonio, Valparaíso, ug Viña del Mar. Ang rason? Sa pagsusi unsa ang kahimtang sa among Kristohanong mga igsoon ug kon unsay labing gikinahanglan nila ingong hinabang sa emerhensiya.

Nahadiindiin ang mga talan-awon sa kalumpagan. Bisag ang kadaghanan sa kadaot maoy nganha sa daandaang mga balay nga tisa, ang pila ka modernong tinukod naapektahan—sama sa walog-andanang apartment sa Reñaca nga giuyog ug kusog kaayo nga human niadto kadto mihirig sama sa Torre sa Pisa. Kinahanglang kadto gub-on.

Ug ang among Kristohanong mga igsoon? Bisan pag ginatos kanila ang nawad-an sa ilang mga balay ug mga kabtangan, kami nalipay kaayo nga masayrang walay mausa sa 16,000 ka Saking nagpuyo sa gilinog nga dapit ang namatay o nasamdan! Ang mga kongregasyon sa mga Saksi ni Jehova sa Santiago ug abot sa halayong Punta Arenas ug Iquique misugod sa pagtelepono, nga nangutana kon unsay ilang ikatabang. Daling mikaylap ang balita, ug sa mga oras ang pipila misugod sa pag-abot nga may dalang pagkaon, sinina, mga habol, ug ubang kapuslang mga butang. Sa wala madugay ang among duha ka trak nga may bug-os nga kapasidad nga 5.5 tonelada gipuno ug milarga na. Sa panahong sila nahibalik nga gabii na kaayo, nadawat ang igong mga donasyon aron planohon ang laing biyahe. Ug nagpadayon kadtong ingon sulod sa halos duha ka semana.

Sa ikaduhang hinapos-sa-semana tapos sa linog, 110 ka boluntaryo gikan sa kanait nga mga kongregasyon ug sa puwesto sa konstruksiyon sa bag-ong sanga mibiyahe ngadto sa pila sa mga siyudad nga labing grabeng naapektahan ug mipatindog sa 24 ka ginama-daang tablang mga puy-anan. Sa pagsulat niini, kami nakatukod nag 69 ingong puy-anan, ug kami nagalaom nga magtukod ug dugang sa dili pa mosugod ang kusog nga ulan.

Ang usa ka kongregasyon misulat kanamo sa pag-ingon nga ang praktikal nga hinabang ug mga puy-anan dayag nagpasundayag sa among pagkamanagsoon. “¡Los hermanos se pasaron!” (“Labaw ang gibuhat sa mga igsoon!”) Sa makapatandog nga paagi, kami gipahinumdoman nga kini usa ka internasyonal nga pag-igsoonay, kay sa daghang adlaw ug semana human sa linog, ang mga Saksi gikan sa Argentina, Alemanya, Italya, ug Tinipong Bansa mitawag nga nangutana bahin sa kahimtang sa ilang Kristohanong mga igsoon sa Chile. Ang mga tawag sa telepono gisundan sa dagkong mga amot sa pag-abag sa pagtagana sa mga panginahanglan sa among “pamilya.”

Panahon sa Pagsusi-sa-Kaugalingon

Ang singgit nga “Linog!” ug ang nalangkit nga dakong paglaglag kadaghanan mopukaw sa katawhan sa paghunahuna sa ilang relasyon sa Diyos. Ngani, minutos lamang tapos sa linog dinhi sa Chile, daghan sa among mga Kingdom Hall giduaw sa mga silingan nga nangitag panalipod. Usa ka Saksi sa Melipilla, nga ilado sa iyang silinganan, daghag bisita niadtong gabhiona. Uban sa matag misunod nga linog, dugang silingan ang mitungha sa iyang balay nga nagtinguhag panalipod. Gipatindog ang usa ka balongbalong diha sa iyang tugkaran, diin iyang gigugol ang daghang oras hangtod sa gabii nga naghisgot sa mga pulong ni Jesus mahitungod sa kataposang mga adlaw nga may “mga linog sa sunodsunod nga dapit.”—Marcos 13:3-8.

Sa Viña del Mar ang usa ka lalaki mihunong sa iyang pagtuon sa Bibliya ug miingong dili na gayod siya mobalik sa Kingdom Hall. Apan diin siya mopaingon niadtong gabhiona tapos sa linog? Aw, sa Kingdom Hall! Giabiabi siya ug ang iyang pamilya ug gihatagag temporaryong sak-anan. Siya natandog kaayo sa mainitong pag-abiabi nga gipakita kaniya ug sa iyang pamilya nga mihukom siyang iyang ipadayon ang iyang pagtuon sa Bibliya.

Ang pipila sa among mga igsoon igo rang nakalingkawas uban sa ilang mga kinabuhi. Pananglitan, sa Vicuña Rozas nga Kongregasyon, ang usa ka igsoong lalaki bag-o pang nahiuli gikan sa ospital ug naghigda lamang. Niadtong gabhiona ang iyang asawa ug anak babaye nangadto sa miting, mao nga siya lamang ang nabilin sa balay. Minutos lamang una molinog, siya mihukom sa pagpaningkamot nga mobangon ug sorpresahon ang iyang asawa ug anak babaye pinaagi sa pag-andam ug tubig alang sa tasa sa tsa inig-abot nila sa balay. Siya miadto sa kusina, ug dihang siya mag-init na untag tubig, milinog. Sa mibalik siya sa iyang kuwarto, iyang nakaplagan ang iyang katre ilalom sa tres-metros-gihabogon (9 tiil) nga paril nga natumpag! Siya mapasalamaton gayod nga siya nakahunahuna sa pag-adto sa kusina sa pag-andam ug usa ka tasang tsa!

Makapalig-on sa pagtuo ang pagkakita sa sanong sa among Kristohanong mga igsoon, kinsa, bisan pag sila nawad-an sa tanan nilang kabtangan, nagpabiling malaomon. Sumala sa gipahayag sa daghan: “Natumpag ang among mga balay, apan ang among pagtuo wala!”