Ang Homoseksuwal nga Paagi sa Kinabuhi—Masadya Ba?

Gikan sa pagkatinago ngadto sa ulohan sa mga balita. Mao kana ang bag-ong lakat sa homoseksuwalidad. Gimantala kana sa mga libro, mga dula, pelikula, mga programa, ug mga balita, nga usa ka madawat nga kapiliang paagi sa kinabuhi. Apan unsa ka madawat kini? Unsay nalangkit niini? Tinuod bang masadya kini sumala sa iyang ngalang “gay”? Ug komusta kadtong mosupak niini? Pig-ot ba ang ilang pangbunabuna? Ug madawat ba kini sa Diyos? Unsay gipahayag sa iyang Pulong, ang Bibliya, bahin niini? Hinungdanon kining mga pangutanaba, tungod sa propaganda sa pagbimo nga madawat kini.

Sa Tinipong Bansa, ang mga libro ug mga dula bahin sa homoseksuwal nga kinabuhi gimantala sa prensa. Ang libro bahin sa mga madreng tomboy nahalinan ug libolibo ug girebista sa popular nga salida sa TV sa buntag. Ang hunta sa edukasyon sa New York City miaprobar ug tunghaan sa hayskol alang sa mga homoseksuwal. Ang kongregasyon sa Riverside Church (walay denominasyon, 3,000 ka membro) sa purok sa Manhattan, New York City, mibotar “uyon sa pamulong nga polisa sa pagdawat sa homoseksuwal nga mga relasyon ingong bahin sa ideya sa Kristohanong panimalaynong kinabuhi.”

“Mihimo ang Britanya ug iyang unang Olympic sa Homoseksuwal,” mitaho ang Daily Mail sa London. Ang tulo ka bahing dokumentaryo sa Britanya “nagsugyot nga homoseksuwal si Jesus.” Sa Toronto, Canada, “gisugdan ang piyesta sa homoseksuwal ug 2,000 nga nagparada sa siyudad,” ug “lakip niini mao ang interdominasyonal nga serbisyo sa simbahan.” Parada sa mga homoseksuwal, mga simbahan sa homoseksuwal, mga tindahag libro sa homoseksuwal, mga bar sa homoseksuwal, kaligoanan sa homoseksuwal, homoseksuwal nga mga aktibista sa politika uban sa ilang homoseksuwal nga pahayag sa mga katungod—ug uban pa niining gimugna alang sa kaugalingong kasadya nga mikaylap sa katilingban.

Nagatubong Propaganda Alang sa Homoseksuwal nga Estilo sa Kinabuhi

Kadtong mosupak niini mao ang gimaymayan. Sa New York City, gitudlong huwes ang usa ka miangkong homoseksuwal sa hukmanang kriminal. Sa gipapanumpa siya, iyang “gidayeg ang iyang kaugalingon tungod sa iyang ‘kaisog’ sa pagpadayag sa iyang pagkatawo,” dayon “gihalokan ang iyang lalaking hinigugma ug nakadawat ug masipang pakpak.” Dihay misupak, apan ang labing dakong mantalaan sa siyudad, ang Daily News, mipahayag nga ang misupak sa pagtudlo sa homoseksuwal nga huwes “mapig-ot ug pangisip.”

Sa Nobyembre 1985 sa ilang sibya sa balita sa gabii, duha ka network nga gipanag-iya ug gipalakaw sa mga estasyon sa TV sa New York City, ang WNBC ug WABC, nagpasundayag ug mga serye bahin sa homoseksuwalidad—sa pagnunot sa pagdawat sa kadaghanan sa homoseksuwal, sumala sa gisibya sa usa ka reporter. Ang serye sa WNBC, nga nag-ulohan “Kon ang Imong Bata Homoseksuwal,” ilabinang gidesinyo sa pagsanong sa ginikanan sa homoseksuwal nga mga anak. Ang mga sikyatrista sa programa nag-ingon nga kinaiyanhon niining mga bataa kining seksuwal nga kiling ug lalom ug dulot ug dili gayod angay nga bag-ohon kana sa mga ginikanan. ‘Mas maayo pang pasagdan ang imong anak nga magmalipayon ug homoseksuwal,’ miingon ang usa, ‘kay sa magmasulob-on ug heteroseksuwal o maibog sa kaatbang nga sekso.’

Ang isyu sa Seventeen sa Marso 1985 nagsugyot nga kon nasamok ka sa usa ka homoseksuwal, makapangayo kag tambag “sa lokal nga sentro sa mga serbisyo sa komunidad sa mga homoseksuwal.” Ang artikulo niini may pahayag ni “Reverendo” Robert H. Iles: “Lalaki man o babaye ang imong gimahal, sa kataposang pag-analisar, dili sama ka importante sa kamatuoran nga ikaw may katakos sa paghigugma.” Iyang gitimbang ang gugma uban sa sekso ug miingon, Pakighigugma, homo man o hetero.

Ang usa ka edukador sa Britanya mipahayag ug kasubo nga diha sa mga tunghaan “ang tanang edukasyon sa sekso gidesinyo alang sa mga heteroseksuwal . . . walay usa kanila ang nakahimog programa alang sa homoseksuwal nga mga estudyante.” Mireklamo usab siya nga ang “kadaghanang librarya nagpundo lamag mga basahong romansa . . . nga may heteroseksuwal nga mga bidang lalaki ug babaye—bisan pa sa nagkadaghang tomo sa sugilanong pang-homoseksuwal.” Iyang gipunting nga pagpinig ang hinungdan batok sa mga homoseksuwal: “Ang ideya nga mas superyor ang heteroseksuwal . . . maoy nakaingon sa pagpinig.”

Homoseksuwal nga “Gugma”

Apan dili ba mas superyor ang heteroseksuwal? Dili ba ang desinyo ug natural nga mga gamit sa mga sangkap sa lawas nakapahimo mining mas superyor? Dili ba ang lalaki uban sa babaye dayag nga normal, ug ang lalaki uban sa lalaki dayag nga sukwahi? Nalangkit sa homoseksuwal nga “gugma” ang mga buhat nga maoy anaa sa hunahuna ni apostol Pablo sa mipadayag siya sa mga butang nga “dili angay paghisgotan sa inyong taliwala” ug “makauulaw gani nga hisgotan.” (Efeso 5:3, 12) Bisan pa, may mga panahon nga nakita niyang hinungdanong hisgotan kadtong mga batasana sumala sa makita diha sa Roma 1:24-27. Daw karon maoy maayong higayon usab. Ang homoseksuwalidad dili na tinago. Mahagiton kini, nga nagaparada ingong madawat nga estilo sa kinabuhi. Apan tinuod ba? Unsay nalangkit niini?

Ang medikal nga magasing Practical Gastroenterology, sa gula niini sa Hulyo/Agosto 1985, nga gihikay alang sa mga doktor sa pagtambal sa mga homoseksuwal sa ilang mga batasan sa masadyang estilo sa kinabuhi. Kini nagpakita nga komun nilang gihimo ang mutuwal nga masturbasyon, sama usab sa sekso pinaagi sa baba ug sa lubot. Ang ubang dili katuohang mga buhat nga makalilisang detalyadong giasoy sa artikulo.

Kini nagpakita nga ang homoseksuwalidad moresulta pa gayod nga mahimong sadomasochismo, ang kalipay sa pagbaton ug mangil-ad nga kadungganan ug mapaubos. Alang sa tinuod nga mga Kristohanon kining paagiha sa kinabuhi dili gayod madawat. Ang malimbongong propaganda nga mibaha alang niini kinahanglang dumilian sama sa usa ka hampak.

Ang Ani sa Homoseksuwal

Kining pagpatuyang nga mga pag-abuso dili makalikay sa kadaot. Kon unsay ipugas sa tawo, mao kanay ilang anihon. Ang Practical Gastroenterology mihatag ug serye sa mga artikulo bahin sa mga sakit nga gipatungha sa homoseksuwalidad. Ang hepatitis simplex, impeksiyon sa atay, gonoriya, sipilis, parasitong mga impeksiyon, lymphoma sa gamayng tinai, Kaposi’s sarcoma, ug, ang makalilisang nga AIDS—kini maoy pipila lamang sa mga sakit nga gihisgotan sa mga gula niini sa Hulyo/Agosto ug Septiyembre/Oktubre 1985.

Gihukman sa bag-ong mga pagtuki ang AIDS nga makadaot sa utok ug sa dugokan. Ang lindog sa siyensiya sa The New York Times, sa Oktubre 15, 1985, mitaho: “Ang pipila niining mga pasyenteha nagpakita ug tin-awng mga timailhan sa dementia o pagkabuang, lakip sa pagkawala sa panumdoman, pagkawalay katakos sa pagplano ug sa paghimog mga desisyon, ug sa tagsaong pagkawalay pagtagad sa tanang butang. Ang uban natugkan ug paralisis sa usa ka bahin sa lawas, pagkawalay koordinasyon sa maskulo o mas grabeng mga problema sa pagkontrolar sa ilang lawas . . . Mikuyos ang utok sa ubang mga biktima sa AIDS. Ang mga luna sa sulod niini, nga gitawag ventricles, nanghupong ug ang mga bahin sa importante kaayong cerebral cortex nakitang mikaging . . . Bisan ug maimbento ang mga tambal sa pagsumpo sa impeksiyon sa kagaw ug sa pagtugot sa sistema sa panagang sa lawas sa pagbalik sa pagpalig-on sa kaugalingon, ang kadaot sa utok malagmit magpabilin.”

Ang AIDS, nga sa karon, dili pa matambalan, ang mga kaso pilopilong midoble matag tuig, nga kanunayng makamatay, ug mikaylap sa tibuok yuta. Ilabinang motakod kini sa mga homoseksuwal, ug sa tiggamit ug mga drogang ipaagi sa dagom ug sa mga dumadawat sa mga pag-abuno sa dugo o mga produkto sa dugo. Maingon man sa mga masuso nga matawo sa mga inahan nga nataptan sa kagaw. Mokaylap pinaagi sa mga likido sa lawas, ang kagaw makita diha sa dugo, sa tuhos, sa ihi, laway, ug sa mga luha. Dugay kining mahingkod. Daghang katuigan ang kal-ang sa pagkaladlad sa kagaw ug sa pag-atake sa AIDS, nga imposibleng matiktikan ug sayo. Ang kagaw magpahiluna sa sulod, usa ka time bomb nga naghulat sa pagbuto—apan kinsay nasayod kanus-a mobuto?

Mibuto na kini karon sa tibuok yuta. Kapin sa usa ka milyong mga tawo—ang uban miingon nga duolan sa duha ka milyon—sa Tinipong Bansa ang gibanabanang natakdan sa kagaw sa AIDS. Kapin sa 14,500 ka kaso sukad sa 1981, kapin sa 7,000 ang nangamatay. Nagtubo ang mga kaso sa tibuok kalibotan—Uropa, Asia, Australia, mga nasod sa Caribeano, hapit 20 ka Aprikanong mga nasod, ug 15 ka nasod sa Amerika. Sa miaging tuig ang numero sa mga nasod nga mitaho sa mga sakit sa AIDS sa World Health Organization sa Geneva milukso gikan sa 40 sa Agosto ngadto sa 71 sa Oktubre, uban sa ihap sa natakdan niadtong panahona nga duolan sa 17,000.

Usa ka Estilo sa Kinabuhi nga Dili Madawat ni Jehova

Ang homoseksuwalidad dili usa ka kapiliang estilo sa kinabuhi nga madawat ni Jehova nga Diyos. Kasagaran, tuison sa homoseksuwal ug liberal nga mga magwawali ang kasulatan sa walay kapuslanang mga paningkamot sa paghimo nga madawat kini. (2 Pedro 3:16) Libolibong katuigan kanhi gilaglag ni Jehova ang Sodoma tungod kay gibuhat kini sa kadaghanang mga lalaki niadtong siyudara. (Genesis 19:4-25) Sa milabay ang mga siglo gipakasama ni apostol Pedro ang mga lalaki nga misuhid niadtong mga taga Sodoma nga “walay pangisip nga mga hayop nga kinaiyahang nangatawo aron lamang pagadakpon ug pagapatyon.”—2 Pedro 2:6-13.

Sa klarong pinulongan, ang pagkabayot ug pagkatomboy gitunglo sa dinasig nga apostol Pablo: “Gitugyan sila sa Diyos ngadto sa mga pangibog nga makauulaw, kay ang ilang mga kababayen-an nanag-usab sa kagamitan nga tiunay sa ilang pagkababaye ngadto sa kagamitan nga supak sa kinaiyahan; ug ang mga lalaki usab nanagbiya sa ilang tiunayng kagamitan sa babaye ug nangaut-ot sa ilang pangibog alang sa usag usa, mga lalaki sa masigkalalaki, nanag-unay sa pagbuhat sa makauulaw ug nanagpakaagom diha sa ilang kaugalingon sa balus nga angay sa ilang kalapasan.”—Roma 1:26, 27.

Si Pablo misulat usab: “Ayaw kamo pagpalimbong. Walay mga makihilawason, o mga tigsimbag mga diyosdiyos, o mga mananapaw, o mga lalaki nga gitipigan alang sa dili kinaiyanhong mga katuyoan, o mga lalaki nga mohigda ipon sa lalaki, o mga kawatan, o mga dalo, o mga palahubog, o mga tigpasipala, o mga tikasan ang makapanunod sa gingharian sa Diyos.” (1 Corinto 6:9, 10) Ang ubang mga hubad sa Bibliya naghubad sa ekspresyong “mga lalaki nga mohigda ipon sa mga lalaki” sa nagkalainlaing mga paagi, sama sa mosunod: sodomanhon, mga tawong hiwi, mga tawong hiwi sa sekso, mga hiwing homoseksuwal, mga hiwing mga buhat sa sekso, ug yanong mga homoseksuwal.

Usa ka Malipayong Estilo sa Kinabuhi nga Walay Kataposan

Walay kasadya bahin sa ani sa pagkahimong masadya. Malikayan kini pinaagi sa pagpamati kang Jehova: “Ako, si Jehova nga imong Diyos, ang Usa nga nagatudlo kanimo sa pagpahimulos sa imong kaugalingon, ang Usa nga nagamando kanimo sa dalan diin ikaw angay nga moagi. Oh kon mamati ka lang unta sa akong mga sugo! Nan ang imo untang pakigdait mahisama sa usa ka suba, ug ang imong pagkamatarong mahisama sa mga balod sa dagat.”—Isaias 48:17, 18.

Apan ang pipila ka sikyatrista ug ang uban, miingon nga dili “matambalan” ang homoseksuwalidad, bisag magbag-o ug relihiyon. Tingali malisod kaayo, apan dili imposible. Gipakita kini ni apostol Pablo dihang siya misunod sa pag-ingon: “Ug kaniadto ang uban kaninyo ingon niini. Apan kamo nalabhan na.” (1 Corinto 6:11) Busa gihimo kini sa unang mga Kristohanon. Ug nahimo usab kini karon. Himoon usab kini sa uban pang mangayog panabang kang Jehova: “Mahimo ko ang tanang butang pinaagi kaniya nga nagapalig-on kanako.” (Filipos 4:13) Busa, “hukasa ang inyong daang personalidad, uban ang mga batasan niini ug isul-ob ang bag-ong personalidad, nga ginabag-o pag-usab pinaagi sa tukmang kahibalo sibo sa dagway sa Usa nga nagabuhat niini.”—Colosas 3:9, 10.

Gidumtan ni Jehova ang daotan, apan andam siya nga mopakitag kaluoy sa mga indibiduwal nga maghinulsol sa ilang sayop nga buhat. Gidumtan usab sa mga Saksi ni Jehova ang daotan, lakip sa ilang kaugalingong unodnong mga dili-kahingpitan, apan wala nila dumti ang ilang kaugalingon o ubang mga indibiduwal nga nagabuhat sa pagkadaotan. Dumti ang sala apan dili ang makasasala nga maoy lagda ni Jehova ug sa iyang mga magsisimba. Ang magsusulat sa Bibliya nga si Judas miingon: “Padayon sa pagpakitag kaluoy sa uban, buhaton kini uban ang kahadlok, nga pagadumtan bisan pa ang besti nga nabuling sa unod.”—Judas 23; tan-awa usab ang Salmo 97:10, Mateo 5:43-48, ug Roma 7:15-25.

Sumala sa gisulat ni apostol Pablo sa Roma 3:23: “Ang tanan nakasala ug nakabsan sa himaya sa Diyos.” Apan ang tanang mga makasasala, lakip sa mga homoseksuwal, nga magkuhag tukmang kahibalo sa Bibliya ug molihok niana makaani ug mga kaayohan karon ug makabaton ug kinabuhing walay kataposan diha sa usa ka paraisong yuta.—Salmo 37:10, 11, 29; Mateo 6:10; Juan 17:3; Pinadayag 21:3-5.

[Blurb sa panid 14]

Ang homoseksuwalidad dili na tinago. Kadtong mosupak niana mao ang gimaymayan

[Blurb sa panid 15]

“Gitugyan sila sa Diyos sa mga pangibog nga makauulaw . . . mga lalaki uban sa mga lalaki, nagabuhat ug kalaw-ayan.”—Roma 1:26, 27