Gikan sa Among mga Magbabasa
Ang Homoseksuwal nga Paagi sa Kinabuhi
Buot lang akong mopahayag ug pasalamat sa inyong pagpatik sa artikulong “Ang Homoseksuwal nga Paagi sa Kinabuhi—Unsa ka Malipayon Kini?” (Agosto 22, 1986) Sanglit usa ako nga nakaagi niadtong paagiha sa kinabuhi, ako matinuorong makaingon nga dili lamang makasubo kadto kondili masakit kaayo kadto. Dako kaayong paningkamot alang kanako ang pagbag-o sa akong paghunahuna ug sa akong paagi sa pagkinabuhi, apan pinaagi sa pagsunod sa tambag sa Isaias 48:17, 18 ug sa pagdasig sa 1 Corinto 6:9-11, inubanan sa tinguha sa pagpahimuot kang Jehova nga Diyos ug sa pagdumot sa daotan (ug dili sa akong kaugalingon), nakatabang kanako sa paglibre sa akong kaugalingon. Ang si bisan kinsa nga malangkit sa samang paagi sa kinabuhi “matambalan” lamang kon mosalig siya kang Jehova ug magatinguha sa pagbuhat sa matarong sa iyang mga mata.
C. G., California
May homoseksuwal nga mga pagbati ako nga supak sa gikahimut-an ni Jehova. Nakaadto ako sa mga espesyalista, kanang gitawag nga mga Kristohanon ug dili Kristohanon. Dili sila makasabot kon nganong dili na lang ako motugyan sa akong mga pangibog. Simple kini—gimahal ko si Jehova. Ang pagbuntog niining mga pangiboga malisod kaayo—usahay daw imposible—apan mahimo kini. Ang pangutana nga gisukna ko sa akong kaugalingon mao: “Kinsa ang labi kong gihigugma, si Jehova o ang akong kaugalingon?” Akong gipili si Jehova. (Mateo 22:37) Mas malipayon na ako karon, nga nakatipig sa akong gugma ug pagkamaunongon kang Jehova, kay sa akong dakong pagmahal sa akong kaugalingon. Ang akong mensahe alang kanila nga nakigbuntog niadtong mga pagbatia mao: Kon imong gimahal ang Diyos sama sa imong kanunayng pag-ingong gimahal mo, makakat-on ka sa pagsalig sa iyang gugma ug kalig-on ug dili sa imong kaugalingong gugma sa kalingawan.
C. J., Montana
Salamat sa inyong artikulo “Ang Homoseksuwal nga Paagi sa Kinabuhi—Unsa ka Malipayon Kini?” Nag-alagad kang Jehova, ako karon adunay hinlong konsensiya, ug wala na akoy kabalaka pa sa makadaot nga mga epekto ug sa pagkawalay kasegurohan nga akong gikahadlokan sa nangalabayng mga katuigan. Ang inyong artikulo nakahatag kanakog pagsalig pag-usab nga ang homoseksuwal nga kinabuhi dili gayod malipayon ug nga ang tinuod nga kalipay makita lamang pinaagi sa pag-alagad kang Jehova nga Diyos.
A. G., California
Kon May Mamatay
Bag-o lang akong nakatapos sa pagbasa sa “Gikan sa Among mga Magbabasa” bahin sa ulohan “Kon ang Usa sa Imong Minahal Mamatay.” (Mayo 22, 1986) Naghikog ang akong anak nga lalaki sa miaging tuig, ug ikasulti ko ninyo nga ang artikulo mismo (Oktubre 22, 1985) ug sa mga tubag usab gikan sa inyong mga magbabasa nakatabang ug dako sa pag-ayo sa akong kasingkasing. Dihang nabasa nako ang artikulo sa Oktubre 22, 1985, mihilak ako! Gipugngan ko ang akong kaugalingon nga dili makahilak, aron sa pagpakita nga ang akong pagtuo sa atong Diyos malig-on! Pagkadakong sayop! Sa Iyang dakong gugma ug kaluoy, Iyang gipakita kanako kana, pinaagi sa inyong mga artikulo. Masaligon ako nga gisultihan niya ako sa paghilak. Salamat kaninyo!
H. T., Inglaterra
Paglutog Spaghetti
Buot ko lang ipahayag ang akong apresasyon sa inyong artikulo “Cooking Spaghetti Guilia’s Way.” (Enero 8, 1986 sa Ingles) Nag-inusara akong nagpuyo sulod sa pito ka tuig, ug ang mga lalaki sa naandan dili maayong mga magluluto. Ang espesyal nga mga resipe ni Giulia sa spaghetti ug sarsa nakadugang ug duha ka resipe sa akong menu. Busa, imbes mausik ang panahon sa pagtan-aw ug libro sa pagluto, akong gigugol ang akong panahon sa bililhong mga butang. Makawiwili kanunay ang pagbasa sa inyong mga magasin.
M. S., Australia