Ang Hunahuna sa Bibliya

May Sinugdanan ba ang Diyos?

Ang maduhaduhaong Pranses nga lalaki, nga mibarog nga tul-id kaayo atubangan sa iyang balay, mitan-awng direkta sa mata sa usa sa mga Saksi ni Jehova ug miingon: “Kon makatug-an ka kanako kon diin gikan ang Diyos, manimati ako kanimo.” Nga wala mabalisa, mitubag ang Saksi: “Ang pila ka makataronganon kaayong tawo midangat sa samang konklusyon sama sa ika-18ng-siglong Pranses nga pilosopo si Voltaire, kinsa mipahayag: ‘Kon walay Diyos, kinahanglan siyang imbentohon.’ Nakapalandong ka ba sukad nganong ang usa ka lalaking sama ka utokan ni Voltaire makapahayag niana?”

Giangkon sa tawo nga siya wala makapalandong ug iyang gipadayon ang Saksi. Gihan-ay sa Saksi ang iyang pangatarongan subay sa mosunod nga mga ideya.

Magmakataronganon Kita

Sama kang Voltaire, daghang tawo nagtuo nga ang kinabuhi ug ang uniberso may nagpahinabo gayod. Aron makaarang sa paggama sa mga butang atong makita, ang maong nagpahinabo kinahanglang nakabaton sa tinong mga gahom ug mga hiyas, sama sa enerhiya, katakos sa pag-organisar, salabotan sa katahom, gugma, ug kaalam. Ngano man? Kay ang mga butang makita sa uniberso, ilabina ibabaw sa atong planetang Yuta, nagabanaag niining mga kinaiyaha. Karon, kini dili ang mga hiyas sa mga butang, kondili sa mga persona. Busa mosangpot kita sa ideya sa Usa nga Supremo—ang Diyos.

“Makataronganon man,” mitubag ang dili-matinuohon nga Pranses, “apan diin gikan ang Diyos?”

Walay Absolutong Sinugdanan

Giatubang nato ang makitang kamatuoran sa usa ka materyal nga uniberso ug sa daghang nagkadaiyang matang sa kinabuhi sa yuta. Diin sila gikan? Ang pila ka siyentipiko, bisan tuod dili tanan, nagaingong kining mga dagway sa kinabuhi sulagmang mitungha. Apan ang nagkalaing mga teoriya sa mga siyentipiko kanunayng nagpangagpas sa paglungtad sa usa ka butang, bisan pag unsay ilang pagngalan niana. Sila nagaingon, ug husto man, nga ang materya maoy usa ka matang sa enerhiya. Pinasukad niana, ilang gibati nga ang materyal nga uniberso mitungha gayod nga sulagma. Apan dili sila mopatin-aw sa unsang paagi mitungha ang unang hugpong sa mga kahimtang. Anaa kanunay ang butang nga naglungtad daan nga ang sinugdanan niana dili sila makasarang sa pagsaysay.

Busa ang mga ateyista nagapangagpas sa kalungtaran sa usa ka butang, samtang ang mga magtutuo sa Diyos nagadahom daan sa paglungtad sa usa ka persona. Tungod sa tanang mga balaod sa kinaiyahan, matematikanhong katukma, organisasyon, ug kaalam nga makita sa yuta ug sa tibuok uniberso, nakita sa mga Saksi ni Jehova nga mas makataronganon ang paghinapos nga ang Unang Nagpahinabo maoy usa ka Persona inay usa ka butang, usa ka intelihenteng Maglalalang inay usa ka buta nga gahom. Ginapalabi nila ang unang mga pulong sa Bibliya, “Sa sinugdanan ang Diyos“ inay ang pamahayag sa ateyismo, ‘Sa sinugdanan ang usa ka butang.’—Genesis 1:1.

“Nasayod ko nga ikaw mokutlo gayod sa Bibliya,” matud sa maukitong Pranses.

Ang matuod mao nga nasabtan sa mga Saksi ni Jehova nga ang hunahuna sa Bibliya mahitungod sa paninugdang mga kasayoran maoy makataronganon ug nahiuyon sa makitang mga kamatuoran. Atong susihon ang pipila.

Ang Usa ka Butang Dili Mahimong Gikan sa Wala. Walay siyentipiko ang nakasarang sa paggamag usa ka butang gikan sa wala. Ang tawo makausob o makatukod lamang sa nagalungtad nga materyales. Sa susama, walay usang maayog panimuot ang mosugyot nga basta nahimo ang usa ka ginama nga butang. Ang Bibliya nagapahayag ingong dayag-sa-kaugalingong kamatuoran: “Hinuon, ang matag balay may nagtukod.” Unya kini nagapadayon sa makataronganong paghinapos: “Apan ang nagtukod sa tanang butang mao ang Diyos.” (Hebreohanon 3:4) Ang pag-ila nga ang usa ka balay nagkinahanglag usa ka arkitekto ug usa ka magtutukod ug, sa samang panahon, pag-angkong ang usa ka komplikadong atomo, molekula, o selula mitungha gikan sa wala yanong dili makataronganon gikan sa hunahuna sa Bibliya. Ang Bibliya makataronganong nangutana: “Ang butang gibuhat magaingon ba mahitungod sa magbubuhat niini: ‘Ako wala niya buhata’?”—Isaias 29:16.

Ang Kinabuhi Nagagikan sa Kinabuhi. Bisan tuod ang pipila ka tawo nagpadayon sa pagtuo nga ang kinabuhi kinaiyanhong mitungha gikan sa dili-buhing materya, kinahanglang makita pa nato nga gibalhin sa mga pabrika ang tinaraktarak nga kemikal ngadto sa ginamang buhing mga selula. Kon ang kinabuhi mitunghang kinaiyanhon, nganong ang tawo dili makasubli ug makaugmad sa paagi? Sa yano tungod kay ang mga kamatuoran nagapadayag nga ang tanang nailhang buhing butang nagagikan sa naglungtad-nang buhing mga butang. Giila sa Bibliya nga ang karaang Unang Nagpahinabo usa gayod ka buhing Persona, nga nagaingon: “Gikan sa panahong walay katinoan ngadto sa panahong walay katinoan ikaw mao ang Diyos.” “Uban kanimo mao ang tinubdan sa kinabuhi.”—Salmo 90:2; 36:9.

Ang Materya Maoy Usa ka Matang sa Enerhiya. Ang Bibliya hingpit nahiuyon sa napamatud-ang siyentipikanhong kamatuoran nga ang materya maoy usa ka matang sa enerhiya. Nadiskobrehan sa tawo kon unsaon pagpahigawas sa enerhiya gikan sa materya diha sa iyang mga bomba atomika ug sa iyang mga estasyon sa nukleyar nga enerhiya. Ang Bibliya nagapadayag nga ang Diyos mao ang tinubdan sa enerhiyang nasulod sa materyal nga uniberso. Atong mabasa: “lyahat ang imong mga mata ug tan-awa [ang mga planeta sa solar nga sistema, mga bituon, mga galaksiya], Kinsay naglalang niining mga butanga? Ang Usa nga nagapatungha sa panon niana nila nga tinagdaghan. . . . Tungod sa kadagaya sa dinamikong kusog, kay siya dako usab sa kagahom, walay mausa ang nakulang.” (Isaias 40:26) “Siya mao ang Magbubuhat sa yuta pinaagi sa iyang gahom.”—Jeremias 10:12.

Ang Uniberso Nagahatag Ebidensiya sa Katuyoan. Sa kasinatian sa tawo, ang kahusay dili gayod magagikan sa kalibog. Busa, makataronganon ba ang pagtuo nga ang kahusay nga makita sa yuta, uban sa mga yugto sa panahon ug mga siklo o cycles nga kinahanglanon kaayo sa talamnon, kahayopan, ug katawhan, mitunghang sulagma? Hinunoa, dili ba kining mga butanga nagahatag ug ebidensiya sa desinyo ug katuyoan? Ang Bibliya nagapahayag: “Kini ang giingon ni Jehova, ang Maglalalang sa mga langit, Siya ang matuod nga Diyos, ang Mag-uumol sa yuta ug ang Magbubuhat niana, Siya ang Usa nga malig-ong nagtukod niini, wala lamang maglalang niini sa walay kapuslanan, nga nag-umol niini aron pagapuy-an.”—Isaias 45:18.

Usa ka Kahibulongang Katuyoan Alang sa Yuta

Ang maduhaduhaong Pranses namasin: “Gilalang man kun wala, mopatim-aw gayod nga mosangpot nga walay magapuyo sa yuta.”

Daw may katarongan ang iyang mga kahadlok. Busa ang kapilian karong adlawa maoy tali sa nawad-ag paglaom nga pagkawalay-pagtuo ug ang nangatarongang pag-ila sa walay-kataposang Maghahatag-Kinabuhi, kansang sinulat nga Pulong nagatanyag sa paglaom sa pagpuyong walay kataposan sa yuta sa usa ka tibuok-yutang paraiso. (Mateo 6:10; Salmo 37:9, 11, 29) Tinong kanang kalaomana takos pagasusihon.

[Letrato sa panid 17]

“Kon ang Diyos wala maglungtad, kinahanglan siyang imbentohon.”—Pranses nga pilosopong si Voltaire