Aborsiyon—Ang Kahibalo Nagadalag Responsabilidad
IKAW ba mosulti dihang ikaw may nasayrang matarong? Maayong buhaton kana, ilabina kon nameligro ang kaayohan sa uban. Tapos sa pagbasa sa usa ka artikulo sa ulohang aborsiyon sa usa ka nangaging isyu niining magasina, ang usa ka inahan sa Inglaterra misulat sa mosunod:
“Bag-o ko pang nabasa ang ‘Usa ka Sulat Gikan sa Inahan sa Usa ka Wala Matawong Bata’ sa Nobyembre 22 [1986] nga isyu sa Pagmata! ug kini nakapagun-ob sa akong kasingkasing.
“Ako wala pa sukad makaagig aborsiyon, apan dihang ako upat ka bulan sa pagkamabdos sa una kong anak, ang akong bayaw nga babaye mabdos ug duha ka bulan sa ikatulo niyang anak. Ang duha niya ka batang babaye bag-o pang nangeskuyla ug nakakita siyag trabahong maayog suweldo. May mga butang iyang gikinahanglan: mga adorno, mga video, bag-ong kotse, mga tanom alang sa hardin. Apan ang usa ka masuso magtapos sa trabaho ug sa ingon sa kinitaan sa pagpalit nianang tanang butang. Busa mihukom siya sa pagpataktak.
“Samtang nagkaduol ang adlaw sa aborsiyon, gibati siyag kalipay. Apan ako sa dugang ug dugang gibati sa kangil-ad sa hunahuna niana. Sa maomaong panahong gibati ko nga ang bata nagsugod sa pagpanindak sa akong tiyan, ug ako naghunahuna sa bata sa tiyan sa akong bayaw nga babaye nga nagtubo usab.
“Miabot ang adlaw una sa aborsiyon, ug ako naglaom nga mabag-o ang hunahuna sa akong bayaw nga babaye. Akong nahanduraw ang iyang anak, nga komportable ug luwas sulod sa tagoangkan nga namati sa hinay ug makapakalmang pinitik sa kasingkasing sa iyang inahan. Dayon ang akong hunahuna gingilaran sa hunahunang ang maong gamayng bata pagalangkaton gikan sa luwas nga gamayng kalibotan niini ug patyon. Ako naghilak sa kahiladman sa hunahuna niana. Nahitabo ang aborsiyon. Ang akong batang babaye dili gayod makaila sa ig-agaw nga kauban unta niya sa pagtubo, kay dili maglayo ang ilang mga edad.
“Komosta ang akong bayaw nga babaye? Nawad-an siya sa iyang trabaho apan nakakitag lain, ug siya nagbatog daghan sukad niadto. Nabatonan niya ang iyang mga video, iyang ba-ong kotse, iyang mga tanom, bag-ong mga sinina, ubp., apan iyang giagian ang ang-ang sa depresyon ug gibiyaan ang iyang bana ug mga anak, dayon mipauli tapos sa pila ka adlaw. Apan siya dili malipayon. Inigduaw niya nako, ang duha niya ka batang babaye makigdula sa akong anak babaye ug akong anak lalaki nga 11 ka bulan, ug sila moingon bahin sa akong anak babaye: ‘Dili ba matahom man siya, Mummy? Maayo untag kami may manghod pang babaye o lalaki.” Maoy sa maong mga pulong nga ako mangawat ug tan-aw sa iyang panagway. Akong bation nga buot ko siyang lipayon tungod kay sa panaon sa iyang aborsiyon siya wala gayod makaamgo kon unsay iyang gibuhat. Apan ang akong bayaw nga babaye nagpalabi sa kuwarta kay sa kinabuhi sa iyang anak, ug tungod niini karon nga akong gibati nga siya nagbasol niana.
“Ugaling, kini motultol sa pagsukna ko sa akong kaugalingon sa seryoso kaayong pangutana. Tingali ako maghunahuna nga ako usa na sa mga Saksi ni Jehova, bisan pag wala pa mabawtismohi. Apan akong hisabtang taas pa ang akong labrahonon, kay ang matuod nga mga Saksi maoy sama kang Jesus, nga mobati sa gugma ug kaluoy sa tanan, bisan pag unsa sila o kon unsay ilang nabuhat. Ako nangandoy sa adlaw dihang ako tinuod makaingon nga akong gibati ang sama sa ilang gibati sa uban ug magadala sa ngalan ni Jehova nga magarbohon. Tingali kon ako wala pa magduhaduha sa dugay kaayo, ako tingali may kaisog unta sa pagsangyaw ngadto sa akong bayaw nga babaye, ug ang bata maluwas unta tingali.”
Maoy sinserong paglaom sa mga magpapatik sa Pagmata! nga kining serye sa mga artikulo makaalagad nianang katuyoana mismo.