Naangkon Ko ang Akong Kagawasan—Sa Bilanggoan!
MIGINHAWA akog lawom sa preskong hangin nga lahi gikan sa bilanggoan nga akong gibiyaan. Daw dili katuohan . . . Libre na ako sa kataposan! Libre sa pagbiya sa bilanggoang Pranses sa Villenueve-sur-Lot. Libre sa pagbalik ngadto sa akong yutang-natawhan, sa Espanya.
Nabilanggo ako sa panuigong 23 ug migawas sa panuigong 28, sa 1976.
Sa migawas ako sa bilanggoan, ang maanindot nga pagbati sa pagkabaton sa kagawasan dugang ug dugang nagkalalim. Sa makausa pa milingi ako sa pagtan-aw ug dugay niadtong makahahadlok nga mga paril. Usa ra ka hunahuna ang nangibabaw sa akong kaisipan—bisan diha pa sa bilanggoan, naangkon ko ang akong kagawasan!
Sulod sa panahon sa akong pagkabilanggo, gibutang ako sa lima ka nagkalainlaing silotanang mga institusyon. Apan nganong nabalhog man ako sa prisohan sa Pranses? Sa dayag dili kadto sa halangdong hinungdan. Usa ako ka delingkuwente. Ang dili maayong tuig sa pagkabatan-on ug sa bungkag nga panimalay ug nagkasumpaking relihiyosong edukasyon ang nag-umol sa akong sukihan ug makiawayong personalidad. Dili gayod ako makauyon sa mahigugmaong Diyos kinsa nagasakit sa iyang mga linalang diha sa dili-mapalong nga kalayo. Nahimo akong problemang anak. Gipagawas ako gikan sa lima ka nagkalainlaing primariyang mga tunghaan.
Natawo sa Barcelona, nagdako ako diha sa magubot nga palibot. Sa nagsayis anyos ako, nagbulag ang akong mga ginikanan, ug gipiyal ako sa akong amahan. Apan, wala ako niya hatagi ug malig-ong pagtultol nga akong gikinahanglan, ug sa ulahi, tungod sa akong masukihon ug dili-kapiyalang kinaiyahan, iyang gibutang ako sa repormatoryo.
Dili nako malikayan ang pagmahay nga akong gibati sa akong amahan. Mibati ako nga gitalikdan. Busa dili na kinahanglang isulti pa, migawas ako sa repormatoryo nga wala marepormar.
Sundalong Pranses o Bilanggoan sa Espanya?
Makaduha sa usa ka tuig nga gidakop ako tungod sa komung mga sala. Tapos niadto naapil ako sa pagpayuhot ug kontrabando ug miikyas ngadto sa Pransiya. Niadtong panahona 20 anyos ako. Nadakpan ako sa gendarmerie (polisiya) sa Pransiya, ug gipapili ako—sa pagsulod sa Foreign Legion sa Pransiya o itugyan ngadto sa kapolisan sa Espanya. Gipili ko ang Lehiyon.
Ang tulo ka tuig nga pagserbisyo sa Lehiyon wala makabag-o sa akong personalidad. Dihang natapos ko ang akong unang militaryong kampaniya, gihatagan akog tulo ka bulan nga bakasyon. Ning higayona, nakakuyog ako sa kaubang mga sundalo sa paglipaylipay. Aron makapaigo sa kinitaan ug sa pagsuportar sa among malaagon ug bagdoybagdoyng paagi sa kinabuhi, nangawat kami. Sinati kaayo ako nianang “trabahoa.” Sa pipila ka adlaw sa ulahi gidakop kami sa mga polis.
Gipasakaan akog daghang mga sumbong, lakip kanila mao ang pagpalsipikar sa mga dokumento ug, labing seryoso sa tanan, ang armadong pagpangawat ug pangidnap. Ning higayona dako ang akong gibayad sa akong tinguha sa kagawasan ug independensiya—walo ka tuig nga sentensiya sa bilanggoan! Gidala ako sa seksiyon sa militar sa bilanggoan sa Les Baumettes, Marseilles, sa habagatang Pransiya. Didto gitudlo ako sa pagsilbi sa pagkaon sa mga kriminal gikan sa selda ug selda, 63 ka selda ang tanan. Ako usab ang manghinlo sa mga selda ug sa mga alagianan.
Tagsaong Engkuwentro
Usa ka adlaw samtang nag-apod-apod ako sa mga pagkaon sa pipila ka mga selda ang miubang opisyal miingon: “Mga Saksi kini sila.” Niadtong higayona dili ko sila makita, tungod kay dalidaling itunol man ang mga pagkaon diha sa gamayng gawang sa matag pultahan sa selda. Apan, ang unang misantop sa akong hunahuna mao, ‘Kon mga saksi sila sa usa ka krimen, nganong napriso man sila?’ Siyempre, sila mga Saksi ni Jehova ug nagatutol tungod sa konsensiya.
Sa milabay ang pipila ka adlaw, samtang nanglimpiyo sa ilang mga selda, ang akong kauban sa trabaho nakakitag libro sa Pranses nga asul ug hapin. Gibalhin ang mga Saksi sa laing selda, ug tingali may nagbilin niini. Iyang gihatag kini kanako, ug gibutang sa akong mga gamit. Sa ulahi, sa panahon niadtong makalaay, makapuol nga mga adlaw, gisugdan ko kini sa pagbasa. Kadto mao Ang Kamatuoran nga Nagatultol sa Kinabuhing Dayon. Katunga pa lang sa ikaduhang kapitulo, gilaayan ako. Apan, sa wala pa nako kini ibutang, nakapakli ako ug pipila ka mga panid. Ang larawan diha sa panid 95 nakakuha sa akong pagtagad: “1914,” “Kaliwatan,” “Kataposan.” Naikag ako ug gibasa ang enterong kapitulo.
Sa ulahi, miadto ako sa librarya, diin nahibalo ako nga didto akong makita ang mga Saksi. Miatubang sa usa kanila, nangutana ako, “Ipakita kanako sa inyong Bibliya kining bahin sa 1914.” Ang Saksi, nga natingala, miingon kanako: “Una, basaha kining laing libro, ug imong makita ang tubag.” Iyang gitunol kanako ang librong “Matuman ang Imong Kabubut-on sa Yuta.”
Sa pagkasunod adlaw sa panahon sa ehersisyo, nangayo ako ug dugang impormasyon kanila. Gisugdan ang pagtuon sa Bibliya—kada adlaw! Walay kataposan ang akong mga pangutana: “Unsay ikasulti bahin sa pagpanugal?” “Kahakog ug kadalo kana, ug dili kana Kristohanong mga hiyas” mao ang tubag. (Colosas 3:5) Ug busa mipadayon kadto, dugang ug dugang mga pangutana bahin sa mga paggawi, sa moralidad, mga doktrina. Ang tanang tubag gipaluyohan sa Bibliya.
Gibati kong gibadbaran ko ang akong kaugalingon sa mga pisi ug mga talikala, daw nakaikyas ako gikan sa usa ka hulma nga nagpiit halos sa tibuok nakong kinabuhi. Akong gibati nga daw ang mga paril sa bilanggoan wala na sa ibabaw nako. Kadtong mga kamatuoran sa Bibliya mibukas ug bag-ong kapunawpunawan alang kanako. Akong nakat-onan nga ang tawhanong katilingban, “ang sistema sa mga butang” nga naglungtad karon, pulihan sa bag-ong katilingban sa mga tawo nga nahigugma sa balaod ug hustisya sa Diyos. Nausab ang akong personalidad. Sulod sa bilanggoan mibati akog kagawasan!—Mateo 24:3; 2 Pedro 3:13.
Selda ug Selda nga Kampaniya sa Pagsangyaw
Ang pagpangombertir gidili sa bilanggoan. Apan, siyempre, awtorisado ako sa pag-apod-apod sa mga pagkaon ngadto sa mga selda. Akong gibati ang pangagda sa pagpaambit sa uban sa samang pagbati sa kagawasan nga akong gibati. (Juan 8:32) Busa bisan ug manilhig ako sa salog o nag-apod-apod ug mga pagkaon, akong paksan ug mga magasin ang ilalom sa mabug-at nga mga pultahang puthaw. May rekord ako sa matag selda aron mahinumdoman ko kon unsang isyuha sa magasin ang akong gibilin. Misugod ang akong maayong mga adlaw.
Gikan niadtong bilanggoana gibalhin ako sa daghang mga bilanggoan, lakip niadtong usa sa Paris. Gibutang ako didto aron maobserbahan sa makadiyut kon unsa ako ka peligro. Sanglit nagpaabot ako nga ibalhin sa laing bilanggoan, miaplay ako nga ipadala sa Eysses sa habagatan-kasadpan sa Pransiya. Gisultihan ko nga adunay mga Saksi didto.
Tinuod man, dihay usa ka igsoong lalaki, apan sulod sa tulo ka tuig nga didto ako, wala gayod kami magkita. Atua siya sa usa ka seksiyon nga dili nako masudlan. Apan gihikay ko ang akong kalihokan kutob sa akong maarangan. Misugod ako sa pag-apod-apod ug mga magasin sa bilanggoan ug nakasugod ug daghang mga pagtuon sa Bibliya. Nakadumala pa gani ako ug pagtuon sa Ang Bantayanang Torre uban sa duha ka isigkabilanggo matag Dominggo. Sa ulahi, nakabaton akog tulo ka pagtuon sa Bibliya—usa ka Pranses, usa ka Espanyol, ug ang ikatulo taga Morroco.
Mga Pagsulay sa Neyutralidad Diha sa Bilanggoan
Bisan haing bilanggoan ang espiritu sa panaghiusa maoy usa sa mga prinsipyo sa mga kriminal. Adunay mga higayon dihang ang imong nangaging kinabuhi, rasa, ug nasyonalidad mawala, ug bation sa matag bilanggo nga siya nabugkos sa komung ‘pusod’ sa managsamang ‘inunlan’—ang bilanggoan. Ingon nga daw pinaagi sa paghimo niyag krimen, ang usa nahimong sakop sa ‘Orden sa mga Kriminal.’ Kining komung interes nagpaobligar kanimo sa pag-apil sa mga rayot sa bilanggoan—pagsunog sa imong selda, pagsukol, ug mga welga—kon mao kanay gusto sa kadaghanan. Apan, karon mibulag na ako sa ‘orden.’ Kinahanglang magpabilin akong neyutral ug dili mag-apil-apil sa ubang mga kalihokan sa kriminal.
Tungod sa akong neyutralidad, giantos ko ug pipila ka panimalos. Tulo ka besis nga gikulata ako, dihay higayong gibuboan ang akong higdaanan ug usa ka baldeng tubig, gihulga akong patyon. Apan, nahibulong ako, kay mao man kanay akong gipaabot nga maoy mahitabo kanako. Ang uban gidunggab o gibun-og tungod sa ilang dili pag-apil sa mga pag-alsa. Nan nganong wala man ako unsaa? Sa milabay ang panahon, akong nahibaloan nga may tigpanalipod ako. Sa unsang paagi?
Sa gibalhin ako gikan sa bilanggoan sa Paris ngadto sa Eysses, nasangyawan nako ang usa ka kriminal diha sa grupo. Impluwensiyado siya nga binilanggo, kay membro man siya sa mafia. Nagsugod kami sa pagtuon sa Bibliya. Naikag siya sa mensahe sa Gingharian apan dili igo kaniya sa pagbag-o sa iyang paagi sa kinabuhi. Mihunong siya sa pagtuon. Apan, nahimo siyang tigpanalipod kanako! Dihang magplano ang mga kriminal ug demonstrasyon, mangilabot siya alang kanako, nagpasidaan kanila sa dili paghilabot kanako. Apan gibalhin siya sa laing bilanggoan.
Niining higayona dihay laing giplanong rayot. Nagplano sila sa pagsunog sa bilanggoan. Mihangyo ako nga ibutang sa bartolina aron dili ako panimaslan. Siyam ka adlaw nga walay makaestorya kanako. Sa ikanapulong adlaw mibuto ang kasamok, nga gitapos sa pagsunog. Bug-os ang kalumpagan ug nangilabot ang puwersa sa panalipod. Maayo na lang kay walay pisikal nga kadaot ang midangat kanako.
Ang labing tagsaon alang kanako mao ang kamatuoran nga bisan pa niining tanan, nakaorganisar gihapon akog mga kampaniya sa pagsangyaw diha sa bilanggoan. Bisan pa nga gidili ang pagpangombertir, gipaluyohan ako sa direktor sa bilanggoan, nga nag-ingon, “Dili makadaot kining ideyaha sa uban.” Mihangyo usab ako sa kasaligang mga binilanggo sa matag seksiyon aron ilang maapod-apod ang mga tract nga akong gimakinelya. Makasulod sila sa mga dapit nga dili nako kasudlan. Bayran nako ang ilang tabang ug mga garapon sa kape.
Bawtismo ug Nakabatog Kagawasan sa Bug-os
Giduaw ako sa mga igsoon sa lokal nga kongregasyong Pranses. Sa ulahi, gipadayag ko sa mga igsoon ang akong tinguha nga magpabawtismo. Apan, unsaon namo sa paghimo kini? Walay posibilidad nga mahimo kini diha sa bilanggoan. Mosugot kaha sila sa pagpagawas kanako alang niini? Daw damgo lamang ang maong ideya. Usa ka asembliya ang himoon diha sa lungsod sa Rodez, duol kaayo sa bilanggoan. Nangisog ako ug nangayog permiso sa pagtambong.
Wala dahoma, gihatagan ako ug tulo ka libreng adlaw gikan sa bilanggoan ug ubanan sa mga igsoon gikan sa lokal nga kongregasyon. Misupak ang ubang mga opisyal sa desisyon. Kombinsido sila nga dili na ako mobalik. Apan nahatag na ang permiso.
Sa Mayo 18, 1975, gipasimbolohan ko ang akong dedikasyon sa Diyos pinaagi sa bawtismo sa tubig. May kagawasan na gayod ako sa bug-os! Siyempre, mibalik ako sa bilanggoan—sa dakong katingala sa mga tawong misupak sa paghatag kanakog permiso. Tapos niadto, gihatagan akog dugang duha ka permiso nga may unom ka adlaw ang matag usa. Gigamit nako kadtong mga adlawa sa pagsangyaw ug sa pakigtigom uban sa mga igsoon. Pagkalalim nga pagbati sa tinuod nga kagawasan!
Sa Enero 1976, gipagawas ako sa kataposan sa bilanggoan nga gikuhaan ug tulo ka tuig ang akong sentensiya tungod sa maayong paggawi. Sa kataposan, akong gitabok ang utlanan sa Pranses ug Espanya. Ang lima ka grabeng mga tuig sa akong kinabuhi gibiyaan. Sa dihang miabot ako sa Barcelona, nakakontak dayon akog kongregasyon sa mga Saksi ni Jehova. Pagkadako sa akong pangandoy ug normal nga kinabuhi!
Ang Dalan sa Tinuod nga Kausaban
Minyo na ako karon. Kami may duha ka batang lalaki ug usa ka babaye, ug gitagamtam ko ang wala nako matilawi sa akong pagkabatan-on—usa ka nahiusa ug malipayong pamilya. Ako nahibalo nga si Jehova nagpakita ug dakong kaluoy kanako. Sa magbasa ako sa Salmo 103, bersikulo 8 ngadto sa 14 nga ‘wala niya buhata kanato ang angay sa atong mga sala, kay dako ang iyang mahigugmaong kalulot,’ akong nasabtan nga ang Diyos lamang sa gugma ang makapuli niining presente dunot nga sistema sa mga butang.
Sumala sa akong naagian, matin-aw alang kanako nga ang mga bilanggoan walay gahom sa pag-usab sa bisan unsang panahon. Kanang gahoma kinahanglang magagikan sa kinasulorang puwersa ug motibo nga makapalihok sa hunahuna. (Efeso 4:23) Daghan ang misamot sa pagkadaotan diha sa bilanggoan, ug dihang pagawason sila dakong bahin na ang nadaot kanila, sa moral ug sa emosyonal nga paagi.
Makalilipay, sa akong bahin kadtong dili-masugok nga mga paril sa prisohan dugay nang nalumpag sa wala pa ako pagawasa. Walay butang ang makapugong sa kamatuoran sa Pulong sa Diyos, ug dili usab kini mabilanggo. Nahibalo ako niana, tungod kay naangkon ko ang kagawasan samtang diha pa sulod sa bilanggoan!—Sumala sa giasoy ni Enrique Barber Gonzáles.
[Letrato sa panid 21]
Kanhing kriminal si Enrique Barber Gonzáles nga nagtuon sa Bibliya uban sa iyang asawa ug mga anak