Ang Konstitusyon sa Tinipong Bansa ug Mga Saksi ni Jehova

Ang tuig 1987 nagtimaan sa ika-200 nga anibersaryo sa Konstitusyon sa Tinipong Bansa. Tungod sa atensiyon nga gihatag niining ikaduha-ka-gatos nga kasumaran, ang mga Saksi ni Jehova sa Tinipong Bansa ug sa tibuok kalibotan gipahinumdoman sa ilang pakigbisog nianang nasora sa pagpanalipod ug sa pagtukod sa legal nga paagi sa ilang katungod sa pagpakaylap sa ilang relihiyosong mga hunahuna.

UNSAY kahulogan sa Konstitusyon alang kanimo? Sa pag-ilustrar, ingnon ta nga diha sa imong komunidad gusto nimong iapod-apod diha sa mga dalan ug sa balay-balay ang pinatik nga impormasyon nga imong gihunahuna nga may kalabotan sa katawhan. Apan komosta dihang imong mahibaloan nga ang pag-apod-apod sa maong materyal maoy paglapas sa mga balaod nga gihimo sa paghatag sa publiko ug kalinaw ug kahusay? Komosta kon kinahanglan kang mangayog permiso sa paghimo niini, ug dili mohatag ang mga opisyal? O kinahanglang mopalit kag lisensiya ug sa paghimo niini mohatag kabug-at sa panalapi alang kanimo?

Nakita sa mga Saksi ni Jehova nga mao kini ang ilang kahimtang balik sa katuigang 1930 ug 1940. Gusto nilang iapod-apod ang pinatik nga basahon nga nasudlan sa ilang relihiyosong mga hunahuna. Apan, diha sa daghang mga komunidad ang lokal nga mga balaod ug mga ordinansa gigamit sa pagsanta kanila. Busa, dihay gihimong mga apelasyon pinasukad sa Konstitusyon sa T.B., nga naghatag ug garantiya sa kagawasan sa pagsulti ug sa prensa. Apan aron mabatonan kining mga katungod sa konstitusyon, ilang gipasaka kining mga butang sa hukmanan. Atong tan-awon kon sa unsang paagi nagapasalig ang Konstitusyon ug indibiduwal nga mga katungod.

Pagbaton ug Indibiduwal nga mga Katungod

Sama sa tanang mga plano, ang konstitusyon naghikay ug plano aron ipatuman ang usa ka katuyoan—niining kasoha ang kagamhanan sa katawhan. Sumala sa gipahayag diha sa Deklarasyon sa Independensiya sa Tinipong Bansa, ang mga kagamhanan gimugna tali sa mga tawo aron mabatonan sa mga sakop ang pila ka “dili-maagaw nga mga Katungod.”

Ang Pasiuna sa Konstitusyon sa T.B. mikuha niining temaha ug miingon nga ang Konstitusyon gibaod ug gitukod aron makuha “ang mga Panalangin sa Kagawasan” alang sa katawhan. Ang kataposang plano sa Kontitusyon natapos diha sa Independence Hall sa Philadelphia, Pennsylvania, sa Septiyembre 17, 1787. Tagsaon kining maong Konstitusyon tungod kay kini ang labing karaan nga nasulat nga konstitusyon nga ginasunod gihapon.

Ang Konstitusyon sa T.B. ilado sa pagkawalay pagsalig niini sa sobra ka gamhanang gobyerno ug gituboy niini ang indibiduwal nga mga kagawasan nga dili arang pangilabotan sa kagamhanan. Taliwala sa labing iladong mga bahin sa Konstitusyon mao ang garantiya niini sa kagawasan sa relihiyon, kagawasan sa pagsulti, ug kagawasan sa prensa. Kining maong mga kagawasan wala hisgoti sa Konstitusyon dihang unang gilaraw ug giaprobahan. Gidugang kini sila sa 1791 ingong una sa napulong mga kausaban, nga nailhang Bill of Rights.

Ang mga kagawasan nga maayong pagkapamulong diha sa Bill of Rights iya sa mga indibiduwal ug wala magdepende sa panugot sa kagamhanan ni mapugngan sa kagamhanan. Nan, nganong ipakig-away pa sa mga tawo ang ilang mga katungod diha sa mga hukmanan? Tungod kay may mga panahon nga ang mga lawas sa mga magbabalaod, nga nagalihok sa ilang giisip nga alang sa kaayohan sa kinabag-an, nagpakanaog ug mga balaod nga nagpiot niadtong maong mga katungod.

Sama sa gipahayag sa usa ka pederal nga hukmanan sa Tinipong Bansa: “Ang panglupig sa mayoriya batok sa mga katungod sa mga indibiduwal o walay mahimong mga minoriya gidawat nga usa sa labing dakong mga kapeligrohan sa popular nga kagamhanan.” Kanang panglupiga mao ang giatubang sa mga Saksi ni Jehova sa Tinipong Bansa sa katuigang 1930 ug 1940.

Mga Magwawali o Tigpamaligya?

Sa nagsingabot ang ikaduhang gubat sa kalibotan, ang buluhatong pagsangyaw sa publiko sa mga Saksi ni Jehova nahimong sentro sa dakong pagsupak. Ang gipakanaog nga mga ordinansa sa munisipyo nga kinahanglang magkuhag permiso ang mga manunukot ug mga tigpamaligya sayop nga gipadapat diha sa buluhaton sa pagsangyaw sa mga Saksi. Nahibalo nga ang pagpadapat niining maong mga balaod nagalapas sa ilang konstitusyonal nga mga katungod, gihagit sa mga Saksi kining maong mga ordinansa pinaagi sa pagpadayon sa ilang buluhatong pagsangyaw nga walay pagkuhag mga permiso. (Marcos 13:10; Buhat 4:19, 20) Ingong resulta, daghang mga Saksi ang gidakop.

Kon ang sentensiya sa ubos nga hukmanan batok kanila, wala mobayad ang mga Saksi ug multa apan nagpapriso. Padayon nilang giapelar ang ilang mga kaso diha sa mas hataas nga sistema sa hukmanan kutob sa mahimo aron makatukod ug malig-on paborableng mga desisyon nga makasumpo niining supak sa batakang balaod nga pagpanghilabot sa ilang buluhaton. Sa milabay ang panahon, sunodsunod nga gikuha kining mga ordinansaha sa Korte Suprema sa T.B. ingong supak sa batakang balaod o sayop nga pagpadapat, ug ang mga sentensiya batok sa mga Saksi ni Jehova nabaliskad.

Gawas pa sa mga ordinansa sa pagpangayog permiso, ang mga balaod sa pagbuhis sa lisensiya gigamit sa pagsanta sa buluhatong pagsangyaw sa mga Saksi. Naglantaw sa buhis ingong temporaryong pagdili sa hinatag sa Diyos nga buluhaton sa pagsangyaw, midumili ang mga Saksi ni Jehova sa pagbayad niini. Sa makausa pa, daghang mga Saksi ang gidakop, ug sa makausa pa, ang Korte Suprema mihukom pabor sa mga kagawasan sa pagsulti ug sa pagsimba.

Ang Korte miingon nga ang pribilehiyo sa libreng pagsangyaw sa relihiyosong mga pagtuo pinaagi sa pinatik nga panid “gawas na sa awtoridad sa estado. Kini mihatag ug garantiya sa katawhan pinaagi sa pederal nga konstitusyon.” Sa yanong pagkasulti, ang Estado dili makakuha sa nahatag na sa Konstitusyon.

Ang Pagsaludo sa Bandera

Ang mga Saksi ni Jehova sa tanang panahon masinundanong mga lungsoranon nga walay tuyo nga magpakitag pagkawalay-pagtahod pinaagi sa ilang pagdumili sa pagsaludo sa bandera sa bisan unsang nasod. Ang mga Saksi nagtuo nga ang ilang pangunang katungdanan ug pagkamaunongon iya sa ilang Diyos ug Maglalalang, si Jehova. (Lucas 4:8) Ang pagpanumpa ug bug-os nga pagkamaunongon sa bisan unsang yutan-ong awtoridad maoy pagbutang pag-una sa kalibotanong mga intereses kay sa espirituwal nga intereses. (Buhat 5:29) Bisan pa niining tim-os nga motibo, ang pagdumili sa mga Saksi sa pagsaludo sa bandera wala hisabti ug gigamit ingong basehanan sa paglutos.

Sa nagsingabot ang ikaduhang gubat sa kalibotan, ang lokal nga mga hunta sa tunghaan ug mga magbabalaod sa estado sa Tinipong Bansa miproklamar ug pinugos nga mga programa sa pagsaludo sa bandera aron mapalambo ang panaghiusa ug kasegurohan sa nasod. Bisan pa sa balod sa popular nga opinyon sa pagpaluyo niining mga kinahanglanon sa pagsaludo sa bandera, malig-ong midumili ang mga Saksi ni Jehova sa pagkompromiso sa ilang binase sa Bibliya nga mga prinsipyo.

Sa pagrepaso niining mga kasoha, ang Korte Suprema sa T.B. midawat nga samtang ang mga hunta sa tunghaan sa walay duhaduha may hinungdanon ug dakong mga kaakohan, kadtong maong kaakohan kinahanglang himoon sulod sa mga utlanan sa Konstitusyon. Ang hunta sa tunghaan walay katungod sa pagpanghilabot sa pundamental konstitusyonal nga mga katungod nga gigarantiya sa indibiduwal. Busa ang Korte Suprema sa T.B. miingon nga ang mga ideya sa hunta sa tunghaan bahin sa mga paagi sa pagpasilsil ug pagpabili sa bandera ug nasodong panulondon dili pagpangibabaw sa konstitusyonal nga katungod sa estudyante sa kagawasan sa konsensiya maylabot sa relihiyon.

Nahibalo ang Korte Suprema sa kabug-at sa desisyon niini tungod sa paningkamot sa nasod sa gubat nga gihimo niadto. Apan wala talikdi sa Korte ang ilang kaakohan ug misaysay nga ubos sa Konstitusyon sa T.B., “ang kagawasan sa pagpalahi dili limitado diha sa mga butang nga dili kaayo hinungdanon. Kana maoy landong lamang sa kagawasan. Ang pagsulay sa bili niini mao ang katungod nga malahi may kalabotan sa mga butang nga makaapekto sa naglungtad nga kahimtang.”

Gitapos sa Korte Suprema ang opinyon niini bahin sa pagsaludo sa bandera pinaagi sa mosunod nga mga pulong: “Kon may tino nga bitoon diha sa atong konstitusyonal nga mga balatik, walay opisyal, hataas man o ubos, ang makamando kon unsa ang ginadawat diha sa politika, nasyonalismo, relihiyon, o ubang opinyon o pugson ang mga lungsoranon sa pagpahayag pinaagi sa pulong o buhat sa ilang pagtuo.”

Ang Kontribusyon sa mga Saksi

Sa katibuk-an, nakadaog ang mga Saksi ni Jehova diha sa 23 ka apelasyon ngadto sa Korte Suprema sa T.B. Sila nakahimo ug daghang kontribusyon sa konstitusyonal nga pamalaod sa Tinipong Bansa, sumala sa namatikdan sa daghang mga eskolar sa balaod. Ug imposible unta kini kon dili pa andam ang mga Saksi ni Jehova sa pag-antos sa mga pagpakaulaw, mga pagdagmal, ug pagkapriso diha sa ilang mga paningkamot sa pagsunod sa ilang Diyos.

Nga ang konstitusyonal nga mga katungod sa kagawasan sa relihiyon, kagawasan sa pagsulti, ug kagawasan sa prensa napauswag ug dugang nga napatin-aw tungod sa pag-antos sa mga Saksi maoy bunga lamang sa mas hataas nga katuyoan sa mga Saksi sa pag-alagad kang Jehova sumala sa iyang Balaang Pulong.

Mapasalamaton ang mga Saksi ni Jehova sa pribilehiyo sa pag-alagad sa Soberano sa Uniberso, si Jehova nga Diyos, ug ilang gigamit ang daghang mga paagi, lakip sa mga panalipod nga gihatag sa 200-ka tuig nga Konstitusyon sa T.B., aron matuman kanang katuyoana.

[Kahon sa panid 27]

Gipaluyohan Pag-usab sa Konstitusyon ang mga Saksi

Sa Hunyo 10, 1987, ang mga hukmanan sa makausa pa mihukom pabor sa relihiyosong kagawasan sa mga Saksi ni Jehova pinasikad sa konstitusyonal nga mga katarongan. Sumala sa gitaho diha sa “The New York Times,” ang U. S. Court of Appeals for the Ninth Circuit mihukom nga ang kagawasan sa paglihok kaharmoniya sa ilang relihiyosong mga pagtuo “tugotan sa katilingban, ilalom sa Konstitusyon, ‘ingong kantidad nga takos ibayad sa pagpanalipod sa katungod sa relihiyosong mga kalainan nga gitagamtam sa tanang mga lungsoranon.’” Ang kaso nalangkit sa katungod sa mga Saksi sa pagsunod sa sugo sa Bibliya sa ‘dili pagdawat ngadto sa inyong balay o sa pagtimbaya’ niadtong “dili magpabilin sa mga pagtulon-an ni Kristo.”—2 Juan 9:11.

[Letrato sa panid 25]

Independence Hall, Philadelphia, diin dinhi gihimo ang Konstitusyon

[Tinubdan]

Philadelphia Convention and Visitors Bureau

[Letrato sa panid 26]

Ang orihinal nga Konstitusyon gitago diha sa National Archives

[Tinubdan]

U.S. National Archives

Architect of the Capitol, Washington, D.C.