Ang Li River—Dili Mahubit sa mga Pulong

GIKAN sa tuboran sa mga tubig niini sa kabukiran, nagabuhagay ang Li River pahabagatan. Sa panahon nga moabot kini sa nagkisaw nga siyudad sa Guilin sa habagatang-sidlakan sa Tsina, kini milapad ug hinayng nagaagos niining karaang siyudad nga nahimutang sa pangpang sa kasadpan.

Lahi ang Guilin sa mga siyudad sa Kasadpan. Sa trapik kaayong panahon ang mga karsada niini puno sa bisikleta. Adunay panagsang mga taksi ug trak nga misiot sa masa sa tawo, nga nanagbusina. Ang mga siklista malipayong nagsikad sa pedal, wala manumbaling nga hapit silang mabangga. Walay nasuko, walay pagsinggitay, walay pag-ulbo sa mga kasuko. Lahi gikan sa oras sa mabagang trapiko sa New York, o Roma o sa Mexico City. Lahi kini, ug daghang mga pulong ang ikahubit alang niini.

Sa kadaplinan sa Li, gagmayng mga komunidad ang nagtungtong sa mga pangpang. Diha sa tampi sa suba, nanagdula ang mga bata ug namabay sa mga lantsa sa turista nga nagkanogkanog pahabagatan. Nanglaba ang mga babaye ug nanghugas sa mga utanon. Gitugway sa mga lalaki ang kabaw sa daplin sa suba. Sa laktod nga dalan pailaya, nagtrabaho ang mga mag-uuma sa basakan, ang uban nananom pinaagi sa kamot, ang ubang nanagdaro pinaagig kabaw. Lahi, apan mahubit.

Apan pulos bukid ang tanang tampi sa Li River, sunodsunod ang ilang linya, nga nanuybo hangtod sa panganod. Lahi kaayo kining mga bukira ug dili-mahubit. Sa tanang lahi nga mga talan-awon sa paglawig sa barko sa Li River gikan sa Guilin ngadto sa Yang-shuo, dunay mga pulong nga igong ikahubit kanila, apan alang niining katingalahang mga bukid kini dili gayod mahubit sa pulong.

Sulod sa 5 oras ug 80 kilometro milawig ang lantsa sa suba sa Li, ug sulod sa 5 oras ug 80 ka kilometro wala gayod mawala sa panan-aw kadtong mga bukira. Sunod-sunod nga naglinya sila, daghang pang mga linya sa likod nila, ug daghan pang linya sa bukid sa unahan pa, hangtod nga hanap nga silang tan-awon sa halayo nga daw dili na sila tinuod tan-awon. Aron makuha kanang dili mahubit sa mga pulong, nanghagtik ang mga kamera ug kusog kaayong gikaon ang daghang mga rolyo sa film. Siyempre, aniay letrato nga makahubit ug libolibong mga pulong!

Apan wala usab makuha sa kamera ang makapanglimbawot sa pagbati niining makalilisang sari-saring mga taluktok kutob sa makita sa panan-aw. Midalit ang tripulante sa lantsa ug mainit nga paniudto. Ang tanan nanaog aron makakaon gawas niining usa nga nagpadayon sa pagtan-aw, nga nabihag kaayo sa pagbiya sa upper deck. Makakaon ra siya sa tanang panahon; kining piyesta sa iyang mata molabay ra. Ang nasipyatan sa iyang kamera, kinahanglang ipabilin sa iyang panumdoman.

“Sumala sa geolohikal nga surbi,” ang usa ka pulyeto sa biyahe nag-ingon: “Sa sinugdan usa ka halapad kaayong dagat ang Guilin. Ingong resulta sa mga kalihokan sa yuta, ang mga tisa diha sa dagat mitubo ug nahimong yuta. Sa mikankan ang yuta tungod sa klima ug sa pag-ulan, ang mga tisa mipormag mga lasang sa mga tumoy sa bukid, nag-inusarang mga taluktok, suba sa ilalom sa yuta ug mga langob. Kining tagsaong pagporma sa Karsta ang nakahimo sa talan-awon sa Guilin nga labing katingalahan sa kalibotan.”

Kon paghinobra kanang kataposang pulong, mapasaylo kini nga paghinobra. Sa tinuod, kining lasang sa mga taluktok sa tisa nga niini nagaikis-ikis ug nagalikoliko ang Li River dili gayod makalimtan. Dili gayod kami makaseguro kon sa unsang paagi mitungha kini, apan makatino kami kon kinsa ang nagpatungha niini. Kon dili mahubit sa mga pulong ang kabukiran sa Li River, labi nang dili mahubit ang Magbubuhat niini. “Dako si Jehova ug takos gayod nga pagadayegon, ug ang iyang pagkadako dili gayod matukib.”—Salmo 145:3.

[Mga footnote]

[Kahon/Letrato sa panid 17]

Ang Labing Matahom nga Bahin

Daw mao kana alang kanamo. Tapos sa among panaw sa Li River miadto kami sa tunghaan sa mga bata sa Guilin. Diha sa lawak sa tunghaan nanagdula ang mga kuwatro anyos nga bata, nanayaw, ug dayon milingkod ug nalingaw samtang gikantahan sa bisitang Amerikana ang mga bata. Bahin kadto sa usa ka batang babaye ug sa iyang ‘minahal nga monyeka nga may sigang asul nga mga mata.’ Siyempre, wala sila makasabot sa mga pulong, apan nabihag sila sa mananoyng tingog ug sa masadyang tuno sa awit, nga gisundan ug aksiyon ang estorya nga nagsenina sa gamayng monyeka, migawas aron magdula, ug sa kataposan ‘gilaylayan hangtod nga nakatulog sa pagsalop sa adlaw.’ Ilang nasabtan ang kahimtang. Misanag ang mga dagway. Dihay mga pahiyom. Ang uban walay lihok nga nanglingkod, nga daw nalamat. Dihang milakaw na kami milipayon silang mibaybay sa ilang mga kamot?

Nabihag nila ang among kasingkasing.