Mga Batan-on Nangutana . . .

Hinungdanon ba ang Pagkahimong Higala sa Diyos?

USA ka espesyal nga tawo ang usa ka higala. Gihubit sa Bibliya ang usa ka tinuod nga higala ingong usa nga kasaligan kay sa igsoon, malig-on sa iyang pagkamaunongon ug panaghigalaay, motabang sa iyang kauban nga anaa sa kalisod, ug motambag kaniya diha sa pagkamatinumanon. (Proverbio 17:17; 18:24; 27:6, 9) Duna bay labaw pa nga relasyon kay niini?

Daghang mga batan-on tim-os nga nagtuo nga ang pagkahimong higala sa Diyos dunay daghang ikatanyag. Apan, tingali mouyon ka sa uban kinsa mibati nga kining relasyon uban sa Diyos imposible ug dili-praktikal. ‘Daghang mga tawo nangangkon nga sila nagatuo ug Diyos,’ tingali moingon sila, ‘apan bisan ang mga magtutuo nagaantos ug nagakinabuhi sama niadtong walay pagtuo kaniya.’

Busa, may kalainan ba? Bililhon ba gayod ang pagkahimong suod sa Diyos? Ang pagkahimong higala ba sa Diyos makahatag kanimog kaayohan? Ang eksperyensiya sa ubang mga tin-edyer karon nagpakita nga ang mga kaayohan sa pagkasuod uban sa Diyos tagsaon ug molabaw pa sa pagkasuod nga imong maugmad sa ubang higala. Sa unsang paagi?

Pag-atubang sa Kalisod

Ang ubang mga batan-on, nga karon nagapangagpas ug mas suod nga relasyon sa Diyos, miingon nga ang pagkahimong higala sa Diyos nakatabang kanila sa pagpugong sa daotang mga pagbati. Ang disiotso anyos nga si Virginia, nga naapektohan kaayo sa panagbulag sa iyang mga ginikanan, miingon: “Nasilag ako sa akong amahan. Nasuko ako kanunay. Ingong resulta, misugod ako sa pagdumot sa ubang mga tawo. Gihasol nako ang akong mga higala. Buot kong ipabati sa uban ang akong giantos!”

Karon, human nga nakatuon sa Pulong Diyos, si Virginia malipayong midawat: “Pagkadako nga kausaban kini alang kanako! Wala na ako masuko sa akong Papa. Nasabtan na nako nga usa lamang siya ka biktima sa dunot nga sistema nga gipaluyohan ni Satanas nga Tawa. Gitahod nako siya ug makamao na ako sa pagpaangay sa tanan karon.” Oo, ang kahibalo sa Bibliya makatabang sa mga batan-on sama kang Virginia sa pagsabot sa katarongan sa mga kabalaka karon ug sa pagkakat-on kon unsaon sa pagsagubang kanila.

Ang pagkahimong suod sa Diyos makatabang kanimo sa pag-atubang sa daw dili-madaog nga kalisod. Si Juana maoy 19-anyos nga dalaga ug may alkoholikong amahan. “Usahay mopauli si Papa nga hubog ug bunalan kami,” siya miingon. Sa unsang paagi iyang naantos kining situwasyona? “Dihang bation ko ang kaguol, nahibalo ako nga makadangop ako kang Jehova nga Diyos diha sa pag-ampo ug bation ko ang kalig-on.” Ang pagkaila sa Diyos ug ang pagsunod sa iyang maayong mga hiyas—sama sa kalulot ug pag-antos—nakatabang usab kang Juana sa pagkakat-on kon unsaon sa pag-atubang sa iyang amahan.—Galacia 5:22, 23.

Dili gayod masayon alang kanimo ang pagpakitag pagtahod sa imong mga ginikanan ug sa paghatag kanila sa angay nga pasidungog. Apan makatabang kanimo ang pagtuo sa gahom sa Pulong sa Diyos, ang Bibliya. Si apostol Juan miingon nga ang lig-on sa espirituwal nga “batan-ong mga lalaki” sa kongregasyon nga iyang gisulatan “nakabuntog sa usa nga daotan” tungod kay ‘ang pulong sa Diyos nagpabilin diha kanila.’ (1 Juan 2:14) Busa, ang tambag sa Bibliya sama sa mosunod ang nakatabang sa mga batan-ong sama kang Juana ug Virginia: “Sa diha nga pasipalahag sulti, kami manalangin lang; sa diha nga kami lutoson, kami mopailob lang; sa dihang kami butangbutangan, kami magapakilooy lang.”—1 Corinto 4:12, 13.

Lain pa, si apostol Pedro miingon nga ang maayong sulondan—“maligdong nga batasan uban ang dulot nga pagtahod”—basin makadani niadtong nagapiit kanimo. (1 Pedro 3:1, 2) Bisag gitumong kining mga pulonga ngadto sa Kristohanong mga asawa, ikaw usab makakuhag kaayohan niining tambaga.

Siyempre, dali masayon ang pagsagubang sa kalisod, apan ang pagbubo sa imong kasingkasing kang Jehova diha sa hustong pagkamotibong pag-ampo makahupay sa kalisod. Pagkamakapapresko ang pagkasayod nga si Jehova motabang ug siya may gahom “sa paghimo ug labaw pa kay sa atong gipangayo, o mahunahunaan”! (Efeso 3:20, Today’s English Version; Jeremias 9:24) Dugang pa, ang Bibliya nagpasalig kanato nga ang Diyos “dili halayo gikan sa matag usa kanato.” (Buhat 17:27) Oo, ikaw makabaton ug higala nga haduol ra kaayo.

Mas Hataas nga mga Sukdanan sa Moral

Ang pagkahimong higala sa Diyos nakatabang usab sa mga batan-on sa pagpalambo ug mas hataas nga mga sukdanan sa moral nga mohatag katagbawan ug kalinaw sa hunahuna. (Mateo 6:13; Salmo 141:3, 4) Ang disisayis-anyos nga si Sofia miadmiter nga nakaagi siya ug seksuwal nga relasyon sa usa ka lalaki dihang 14 anyos pa lamang siya. Nagapanumdom, si Sofia miingon: “Hangtod na lamang nga nagsugod ako sa pagtuon sa Bibliya nga mihunong ako sa pakigdeyt kaniya.” Sukad niadto, iyang gisuklan ang imoral nga paggawi ug miingon nga ang kahibalo sa Bibliya nakalig-on sa iyang relasyon kang Jehova.

Ang sekso sa dili pa magminyo komun diha sa daghang mga bahin sa kalibotan. Sa Mexico lamang, 90 porsiento sa mga batan-on ginaingon nga nakaagi ug seksuwal nga relasyon sa wala pa maminyo! Ingong resulta, daghang mga tin-edyer ang nag-antos sa mga sangpotanan, sama sa sayo nga pagminyo o napaangkan. Sa usa lamang ka tuig, kapin sa usa ka milyong mga bata ang natawo sa tin-edyer nga mga babaye sa Mexico!

Karon, adunay dakong pagpiit sa seksuwal nga relasyon sa linghod nga panuigon. Imbes moambak ngadto sa seksuwal nga imoralidad, nganong dili una susihon ang mga sangpotanan? Gawas sa dihadihang pisikal nga mga resulta, palandonga kon unsang paagi maapektohan ang Diyos kon atong lapason ang iyang sugo. Gihagit ni Satanas ang Diyos, nangangkon nga ilalom sa pagsulay ang mga tawo dili makapadayong magmaunongon Kaniya. Busa si Jehova miawhag: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Palandonga kana: Lapason ba nimo ang sugo sa Diyos ug lipayon si Satanas ug pasub-on ang Diyos?—Itandi sa Salmo 78:38-41.

Ang labing dakong panalipod batok sa imoralidad mao ang imong pagpalambo sa personal, suod nga relasyon kang Jehova.

Walay Labaw-tawhanong Pagpanulay

Sa laing bahin, ang ubang mga batan-on nagapanuko sa paglangkit sa Diyos. “Nahadlok kaayo ako,” miingon ang 14-anyos nga babaye, “nga kon akong dawaton ang Diyos, bug-os nga siya na ang mangibabaw. Independente kaayo ako, apan buot kong buksan ang akong kasingkasing. Tinuod nga nabahin ako ug nalibog. Buot kong makakat-on ug hinayhinay nga magsugod. Akong gibati nga kon ako dalidalion, mahadlok unya ako ug mohunong.” Ingon ba niini ang imong gibati?

Kon mao, mahupayan ka sa kamatuoran nga tabangan ka sa Diyos sa bisan unsang problema sa kinabuhi. “Kaninyo walay makaabot nga labaw-tawhanong pagpanulay,” nagaingon ang Bibliya. “Ug ang Diyos kasaligan ug dili niya itugot kamo nga pagpanulayon sa labaw sa inyong maarangan, apan uban sa pagpanulay siya magatagana usab ug lutsanan sa paglikay, aron inyo kining maantos.” (1 Corinto 10:13, An American Translation) Unsa pay imong pangayoon?

Apan dili ka makaampo sa pagpangayog tabang ug dayon mobasag imoral nga basahon, motan-aw ug imoral nga mga salida, o magpangdamgo o mobirigbirig sa usa sa kaatbang sa sekso. Bisan pa nga kinahanglan kaayo ang pag-ampo—sama nga kinahanglan ang komunikasyon diha sa bisan unsang personal nga relasyon—kinahanglan paningkamotan mo kanang imong gihangyo diha sa pag-ampo!—Lucas 11:9, 13.

Masanagong Palaabuton!

Apan, ang kantidad nga imong pagabayran—ang paningkamot sa pagpatunhay sa imong relasyon sa Diyos—gamay ra kon itandi sa sa daghang umaabot nga mga panalangin nga gisaad sa Diyos. Miingon ang 17-anyos nga si Noe: “Si Jehova nagtanyag kanato ug masanagong palaabuton: kinabuhi diha sa walay kataposang kalipay sa paraiso sa yuta! Usa kini ka butang nga walay tawo ang makatanyag!”

Ang Pulong sa Diyos nagsaad nga sa “dili madugay, ang mga daotan mangawala . . . Ang mga matarong magapanunod sa yuta, ug sila magapuyo niana sa walay kataposan.” (Salmo 37:10, 29) Ingong abundang Tighatag sa “tanang maayong gasa ug sa tanang hingpit nga mga regalo,” malipay si Jehova sa pagganti sa iyang matinumanon batan-ong mga Saksi ug mga panalangin.—Santiago 1:5, 17; Salmo 35:27; 84:11, 12; 149:4.

Busa ang pagkahimong higala sa Diyos hinungdanon. Ang Diyos may pagtagad kanimo. Kon ikaw adunay suliran, gusto siya nga motabang. Anaa siya kanunay. Siya may gahom sa pagtabang kanimo sa bisan unsang suliran sa kinabuhi. Ug si Jehova lamang ang makahatag kanimog kinabuhing dayon—ang bugtong kabtangan sa mga higala sa Diyos.—Pinadayag 21:3, 4; Mateo 25:46.

[Letrato sa panid 18]

“Si Abraham gitawag nga ‘higala ni Jehova.’ Gitawag ni Jesus ang iyang mga sumusunod nga ‘akong mga higala.’ . . . Busa ako usab mahimong ilang higala!”