Gikan sa Among mga Magbabasa

Ang Kalibotan Sukad 1914

Nakadayeg kaayo ako kaninyo tungod sa inyong mga artikulong “Ang Kalibotan Sukad 1914.” (Marso 8 hangtod Hunyo 22, 1987) Kini nakapasabot nako nganong ang kanasoran nagpiangay, nagpatyanay, naglutosay, ug nagdalag mga kasakitan sa ilang kaugalingon. Ang tinuod nga utok luyo sa esena—si Satanas nga Yawa.

O. P. I., Nigeria

Ako nagbasang maikagon kaayo sa inyong serye sa mga artikulo bahin sa kalibotan sukad 1914. Sa unang panahon sa akong kinabuhi, ako gihatagag tin-awng paglantaw sa kasaysayan sa atong kaliwatan sa pila ra ka isyu.

E. E., Côte d’Ivoire

Balay ni Luther Naguba?

Ako nalisang! (“Nganong Naguba ang Balay ni Luther?” Septiyembre 8, 1987) Ako suod sa akong mga paryente nga nagapuyo pa sa Alemanya. Ako 40 anyos ug Luterano. Ang akong apohan usa ka Luteranong ministro ug ang duha nako ka igsoong babaye nangaminyo sa Luteranong mga ministro. Ang nakapalisang kanako bahin sa inyong mga artikulo mao nga nagtinguha kamo sa pagdaot sa akong pagtuo ug sa pagtuo sa akong mga apohan. Nakapangahas uroy kamo! Ang kadaghanang sulirang inyong gihisgotan mao ang mga suliran sa halos matag kongregasyon sa nawong sa yuta. Ako nakabatog ubay-ubayng mga pakighisgot nga teolohikanhon uban sa akong mga bayaw nga lalaki, mga magtutudlo sa Bibliya—ngatanan mga Luterano. Wala pa gayod ako makahibalag ug usa kinsa huyang o nagkalandrakas o bisan hain sa laing makauulawng mga adhetibo nga inyong gigamit.

R. D. B., Tinipong Bansa

Gipahayag sa sinugdan sa serye nga ang kahimtang gibatbat, bisan tuod naghisgot sa Luteranong Iglesya sa Alemanya, naghawas sa matuod nga kahimtang sa Protestantismo sa kadaghanang bahin sa kalibotan. Ang pagbatbat sa Protestanteng teolohiya ingong “huyang” ug “niini ug niana” gikutlo gikan sa mga tinubdan sa gawas ug malangkobong giila sa daghang Protestanteng tigpamaba sa Uropa. Ang among tuyo sa pagpatik sa materyal mao ang tim-os nga paningkamot sa pagtabang sa mga magbabasa sa tanang relihiyon sa pag-usisa sa ilang mga pagtuo sa kahayag sa kamatuoran sa Bibliya. Si Jesus miingon: “Kamo mahibalo sa kamatuoran, ug ang kamatuoran magapahigawas kaninyo.” (Juan 8:32) Bisan ang iladong Alemang Luteranong klerigo si Dietrich Bonhoeffer nagpasiugda diha sa iyang mga wali: “Sa relihiyon usa lang ka butang ang hinungdanon, nga kini matuod.” “Kini [ang iglesya] kinahanglang magtinguha sa kaputli sa pagtulon-an.” ‘Sa Adlaw sa Paghukom, ang Diyos tinong mangutana kanato: “Namati ba kamo sa akong Pulong ug nagbantay niini?”’—ED.

Salamat kaayo sa inyong mga artikulong “Nganong Naguba ang Balay ni Luther?” Nagpahayag kana sa tukma sa akong mga gibati. Angay ninyong ibutang sa hunahuna nga ang akong amahan Luteranong ministro hangtod siya pensionado na sa duha ka tuig nga miagi, ang akong inahan magtutudlo sa relihiyosong edukasyon, ug hangtod 18 ako gilibotan sa mga kalihokan sa balay sa Luteranong pastor. Apan bisan pag ako niadto 11 o 12 lamang, tungod sa wala-matubag nga mga pangutana, pagkasalingkapaw, ug sa espiritu sa pagkawalay-mahimo sa katingad-anan gibati ko ang kawalay katagbawan. Tapos sa hago nga pagpangita sa kamatuoran, sa kataposan akong nakaplagan ang butang akong gipangandoy sa ako pang pagkabata, ang katawhan nga tinuod nahigugma sa Diyos ug nagasugot sa iyang mga balaod, ang mga Saksi ni Jehova.

D. B., Pederal nga Republika sa Alemanya