SIDS—Adlaw-adlawng Gikahadlokan sa mga Ginikanan
“Ang kalit, wala damhang kamatayon sa usa ka mahimsog nga bata tingali mao ang labing masakit ug malaglagong hitabo nga moagpas sa batan-ong magtiayon—apan diha sa katilingban sa Kasadpan mao usab kini ang labing komung matang sa kamatayon sa bata human sa unang semana sa kinabuhi.”—Propesor Bernard Knight, “Sudden Death in Infancy—The ‘Cot Death’ Syndrome.”
ALAS 4:00 s.b. kadto sa Disyembre 22, 1984. Gilili ni Ken Eberline ang lawak sa pagsusi sa kahimtang sa pito-ka-bulang Katie. Si Inday Katie mao ang panganayng garbo ug kalipay ni Ken ug Tottie, nga anaa sa ilang sayong panuigong 30. Hinanok nga natulog ang bata. Migikan si Ken sa balay. Magmaneho pa siya sa halayo paingon sa Las Cruces, New Mexico, aron sa pagtudlo sa seminar.
Mibangon si Tottie sa alas 7:30 s.b. ug miadto sa pagsusi kang Katie. Sa katingalahan mahilom si Katie. Mitan-aw pag-usab si Tottie, iyang gihikap siya, ug nahibalo sa labing mangil-ad. Patay na si Katie. Namatay siya tungod sa crib death, kun SIDS (Sudden Infant Death Syndrome). Kining kalit, hilom nga kamatayon) nahitabo sa libolibong mga pamilya matag tuig.
Usa ka Malulutong Mediko Legal
Unsay reaksiyon ni Tottie ug Ken sa kamatayon sa ilang anak? Miingon si Tottie sa Pagmata!: “Dihang nahibaloan ko ang nahitabo, gitawag ko ang 911, nga maoy mga serbisyo sa emerhensiya. Miabot dayon ang mga paramedics ug ang kapolisan uban sa mediko legal. Maluluton ug maluluy-on kaayo silang tanan. Siyempre, mitungha sa akong hunahuna ang mga pagduhaduha—unsay akong nahimo ug wala mahimo nga nakapahinabo niini?
“Gihupay sa mediko legal ang akong mga kahadlok. Siya miasoy nga namatyan siyag anak sa samang kahimtang sa miaging nuybe ka tuig. ‘Wala kay mahimo nga mapugngan kana,’ gipasaligan niya ako. ‘Bisag nagtindog ka pa sa tapad sa kuna nga may monitor, dili ka gihapon makaluwas kaniya.’ Siya midugang: ‘Dili nimo kana madahom ug dili ka malikay niana. Diha sa pila ka kaso, ang tanan mokalit lamang sa paghunong, ug sa pagkakaron wala gayoy paagi nga mahibaloan ang hinungdan.’ Nakaseguro ako nga ang iyang mga pulong nakahupay kanako sa dakong pagbating sad-an.”
Sa unsang paagi gisagubang ni Ken ug Tottie ang pagkamatay sa ilang anak? Tubagon kana sa ulahi nga artikulo. Apan dunay ubang mga pangutana nga gustong matubag sa tanang ginikanan sa bata: Unsay mopahinabo sa SIDS? Duna bay mga pasidaang mga signal? Mapugngan ba kini?