Ang mga Cassette sa Self-Hypnosis Mao ba ang Sulbad?
May suliran ka ba sa pagkatulog? Ikaw ba tambok kaayo? Naningkamot ka ba sa pagbuntog sa daotang mga kinaiya? Kon mao, ang tabang sama ra ka layo sa imong cassette recorder, mao ang pangangkon sa mga tiggamag mga cassette sa self-hypnosis.
Ang usa ka kilid sa cassette nasudlan sa adlaw nga bersiyon ug ang pikas sa gabii nga bersiyon. Ang adlaw nga bersiyon nasudlan sa musika nga gikomposo alang sa imong linaing suliran ug angay ipatokar kanunay, matud sa mga tiggama, bisan pag ang usa ka tawo wala mamating tinuyo. Ang tuyo niini mao ang paghimo sa kaisipan nga mas madawaton sa mensahe sa gabii nga bersiyon.
Ang gabii nga bersiyon, gisugyot, angay ipatokar lamang sa dihang ang usa makarelaks, ilabina sa paghigda sa magabii. Tapos sa mubong panahon, ang tingog sa tighipno magpaduka kanimo ngadto sa hinanok nga pagkatulog. Ang imong dili bug-os nga salabotan o subconscious mind dili gayod matulog, matud sa anunsiyo, mao nga kini modawat sa iyang mga mensahe bisan pag ikaw natulog.
Bisan pa niana, si Alan Baddeley, direktor sa British Medical Research Council’s Applied Psychology Unit sa Cambridge, Inglaterra, misulat nga ang dibug-os nga salabotan limitado kon unsay mahimo niini. Siya miingon nga gipanghimakak sa mga pagsusi ang pagkaepektibo niining giingong mga sistema sa pagtudlo samtang natulog. Iyang konklusyon: “Nan mopatim-aw nga kon buot nimong makakat-on, maayo nga nahigmata sa maong panahon.”
Ug labi pang hinungdanong bahin nga pagatagdon mao ang koneksiyon sa maong mga cassette sa hipnotismo. Ang pagtugyan sa kaisipan ug kabubut-on sa usa ngadto sa laing tawo, niining kasoha ang tighipno, peligroso. Ang sulbad sa pagbuntog sa mga kahuyangan wala diha sa pagtugot sa atong hunahuna nga maneobrahon sa musika ug mga tingog sa mga tawong dili makita. Ang sulbad anaa sa pagbatog tukmang kahibalo sa Pulong sa Diyos ug dayon pagsunod sa mga paggiya sa iyang balaang espiritu. (Roma 12:2; Efeso 4:22-24) Labaw sa tanan, kini mohatag kanato sa paglaom sa kinabuhing walay kataposan diha sa walay-suliran bag-ong sistema sa mga butang sa Diyos nga karon haduol na.—Pinadayag 21:3-5.