Gikan sa Among mga Magbabasa

Pagluwas sa mga Bata Salamat sa artikulong “Minilyong mga Kabataan Mangamatay.” (Septiyembre 22, 1988) Nakahigayon ko sa paggamit sa impormasyon bahin sa Oral Rehydration Therapy sa dihang ang akong dos-meses nga bata nagkalibang. Sa kadiyut lamang, nakita ko ang kausaban. Siya mikalma ug natulog dayon.

S. S., Tinipong Bansa

Holocaust Ingong sanong sa inyong mga artikulo, ako nagapadala kaninyog usa ka pulyetong nag-ulohang Did Six Million Really Die? (Abril 8, 1989) Ang ubay-ubayng tigrebisar nga mga historyano nakahinapos nga ang Holocaust wala gayod mahitabo, nga ang unom-ka-milyong numero gipasobrahan sa labing menos usa ka libo ka pilo, nga wala gayoy mga gas chamber nga gibuhat aron sa paglaglag sa mga Hudiyo pinaagi sa mga Nazi.

R. B., Canada

Sinati kami kaayo sa mga hunahuna sa tigrebisar nga mga historyano. Bisan pa niana, anaa ang pamatuod sa libolibong naluwas—nga ginatos kanila maoy mga Saksi ni Jehova—nga sa daghang kaso nakakita sa pagpamatay diha sa kampo konsentrasyon. Bisan pag ang eksaktong gidaghanon niadtong gipatay sa Holocaust tingali dili gayod mahibaloan, nga nahitabo ang holocaust dili ikalimod nga kamatuoran sa kasaysayan.—ED.

Gibati ko nga dili ako makahimo sa pagpahimutang niining isyu sa uban tungod sa mga letrato sa mga panid 2 ug 3. Ang maong mga esena gipadayag sa bag-ong mga dokumentaryo sa TV; labing menos ang usa ka tawo makapalong niini. Ang epekto sa pinatik nga panid labi pang dako, ug mataktikanhon pa unta ang pag-isyu ug pasidaan sa mga tawo nga wala maanad sa matag adlaw nga mga dosis sa makalilisang nga hitabo.

V. S., Inglaterra

May panahon nga ang kamatuoran dili maayo, nga makalilisang. Bisan ang Bibliya nagagamit sa tin-aw kaayo—usahay makalilisang—nga pinulongan kon gikinahanglan kana sa ulohan. Ug ang ulohan nga Holocaust tinong nagakinahanglag realistikong paghisgot. Ang letrato sa ingon nagsilsil diha sa among mga magbabasa sa kamatuoran ug kamakalilisang sa Holocaust sa paagi nga dili mahimo sa mga pulong lamang. Kini nagasilsil usab diha kanato nga ang pagmando sa tawo napakyas ug ang Diyos sa bug-os makataronganon sa paglaglag sa dili madugay niining daotang sistema sa mga butang ug pagpuli niini sa pagmando sa iyang Gingharian.—Daniel 2:44; Mateo 6:9, 10; 2 Pedro 3:13.—ED.

Ang imong bag-ong artikulo bahin sa Holocaust halos hingpit. Bisan pa niana, kadto nasentro kaayo sa dakong Hudiyong pundok ug sa minoriyang pundok sa mga Saksi ni Jehova. Kadto maoy sa kadaotan sa ubang pundok nga nag-antos, sama sa Gypsies.

A. G., Pransiya

Ang ubay-ubay nga ubang pundok nag-antos ilalom sa pagmandong Nazi. Hinuon, ang mga Saksi ni Jehova maoy linain sa pagkaagi nga sila unta makagawas kon isalikway pa nila ang ilang pagtuo. Ang pagdumili nila sa pagbuhat niana sa ingon nagapadayag nga sila mga martir, dili lamang mga biktima.—ED.

Homoseksuwalidad Sa wala pa ang inyong artikulo gibati ko ang labihang pag-inusara. (Abril 8, 1989) Sa dihang ako dili pa tin-edyer, ako nagsugod sa pagbatog homoseksuwal nga mga kasinatian uban sa pipila nako ka higala. Gipadayon ko kini hangtod sa pagkatin-edyer hangtod nga misugod ako sa pagtuon sa Bibliya uban sa mga Saksi ni Jehova. Apan usahay bation ko gihapon ang daotang mga pagbati nga nagpabilin sa akong kahiladman. Gibati ko pa gani nga ako dili gayod mahimong tinuod nga lalaki, labi pang dili usa ka ansiano sa kongregasyon. Apan sa dihang akong nabasa ang pangutlo gikan ni Jason diha sa artikulo, mihilak ako kay siya karon maoy usa ka ansiano sa kongregasyon, ug siya nagbaton usab ug susamang mga suliran sa nangagi! Gibati ko nga ako bahin sa organisasyon ni Jehova karon.

M.M., Tinipong Bansa