Gikan sa Among mga Magbabasa

Pagkawalay-Alamag sa Siyensiya Natingala ako sa pangangkon nga 6 porsiento lamang sa mga Amerikano ang maalamon sa siyensiya. (“Pagpaniid sa Kalibotan,” Hunyo 8, 1989) Busa gidumala ko ang akong kaugalingong gamay nga pagsurbi sa 12 ka hamtong nga kasarangan ang kinitaan. Ang tanan gawas sa tulo naghunahuna nga ang adlaw nagabiyo sa yuta! Sa gipangutana unsa ka dugay “kini” makabiyo, nabatonan ko ang mga tubag sama sa “matag 18 ka oras,” “24 oras,” “48 oras,” “365 ka tuig,” ug “daghang light-years.” Ang kinalabwan mao ang usang miingon kanako: “Ang yuta dili na mobiyo . . . Kini nagapondo sa orbito.”

J. W. H., Tinipong Bansa

Pagbugno sa Krimen Ingong panalipod batok sa mga tulisan, ang inyong mga magbabasa gitambagan sa pagsira sa tanang pultahan sa sakyanan kon magadrayb. (Abril 22, 1989) Kini mahimong peligroso. Kon mahitabo ang aksidente o ang sakyanan mahulog sa tubig, ang mga tigluwas maglisod sa pag-abot sa mga biktima.

C. M., Netherlands

Ang Auto Club of America nagsulti sa “Pagmata!” nga ikapulo lang sa 1 porsiento sa mga aksidente sa kotse sa Tinipong Bansa naglangkit sa pagkatuslob sa tubig. Busa, sa mga dapit nga daghag krimen, ang kapeligrohan sa pagdrayb nga dili sirado ang pultahan molupig sa riyesgo nga dili makagawas sa usa ka kotse. Bisan pa sa ingon, ang mga tigluwas kasagarang makalibre sa naprisong mga biktima pinaagi sa pagbuak sa mga bentana sa kotse.—ED.

Homoseksuwalidad Kinahanglang ipahayag ko ang akong pagpasalamat alang sa instruksiyon ug pagdasig sa artikulong “Homoseksuwalidad—Nganong Dili?” (Hulyo 8, 1989) Kadto dili pag-atake sa tawo apan sa linihokan sa tawo. Ako may kiling sa homoseksuwalidad. Ako niadto naghunahuna, ‘Ikaw mahimong ingon niana o dili kaha.’ Apan mga lima ka tuig nga miagi, misugod ako sa pagtuon sa Bibliya uban sa mga Saksi ni Jehova. Sa sinugdan gitagoan ko ang akong problema. Apan sa kataposan ako nakigsulti sa duha ka Kristohanong ansiano, ug gitabangan nila ako nga makakuwalipikar sa bawtismo.

Giila ko nga kinahanglan ang kapikas sa kaminyoon, apan kinahanglan una nga maugmad ko ang pagpugong-sa-kaugalingon. Sa tabang ni Jehova ug sa makapalig-ong instruksiyon sa iyang organisasyon, ako makalahutay.

R. T., Netherlands

Binabang Pasipala Salamat sa inyong artikulo mahitungod sa binabang pasipala. (Hunyo 8, 1989) Ang akong mga ginikanan wala gayod magdayeg o magpakita kanako nga sila nahigugma kanako, gawas sa pagtaganag materyal nga mga butang sama sa pagkaon, sinina, o kuwarta. Akong naamgohan karon nga ang pagpugong sa akong dila makapaarang-arang unta sa kahimtang. Ang artikulo tukma gayod sa panahon.

S. M., Australia

Nahiubos ako sa artikulo. Bisan pag unsa ka lisod ang adlaw sa usa ka ginikanan, siya walay katungod nga ipahungaw kana sa anak. Inay nga ang artikulo magaingon nga kinahanglang mag-usab ang mga biktima, palihog hatagi kamig artikulo nga maghisgot sa lintunganay sa suliran: ang mga ginikanan.

M. W., Tinipong Bansa

Nasabtan namo ang imong mga komento. Ugaling, ang artikulo wala tuyoa nga mohisgot sa ‘lintunganay sa suliran’ kondili gisulat sa pagtabang sa mga batan-on sa pagsagubang sa lisod nga kahimtang. Ang artikulo dugang miingon: “Walay katarongan gayod ang mapasipad-anong mga sinultihan.” Busa ang mga biktima sa pag-abusar sa ginikanan dili kinahanglang mobati nga sila maoy responsable. Bisan pa niana, pinaagi sa paglihok nga maalamon, ang batan-ong mga biktima mahimong makapahimulos sa labing maayo niining daotang kahimtang.—ED.

Ang artikulo tinuod nga makapadasig, ug ako nanghinaot nga unta akong nabatonan kana sa dihang ako nagtubo. Ang akong amaama nagpasipala kanako sa binaba sa daghang paagi. Iya akong singgitan ug sultihan sa mga butang nga tinuod masakit. Ako matulog nga maghilak. Si Jehova nagtabang nako sa paghikalimot sa nangagi, pagbugnaw sa akong kayugot, ug pagkinabuhi alang Kaniya.

Y. M., Tinipong Bansa