Mga Batan-on Nangutana . . .

Unsa ang Sekreto sa Pagpilig Angayang Sinina?

SI Mike maantigong mopilig mga biste nga dekalidad—ug sa unsang paagi mapalit kanang barato. Usahay ang mga membro sa iyang pamilya mohangyo kaniya sa pagpamalit alang kanila! Sa usa ka pagpamalit, gipilian niyag mga sinina ang iyang inahan, minyo nga igsoong babaye, ug otso-anyos nga pag-umangkong babaye—diha sa hustong mga gidak-on ug sa mga moda nga nagustohan nila! Samtang siya namalit, mipili siyag usa ka bag-ong bata de banyo alang sa iyang kaugalingon sa un-kuwarto sa regular niyang prisyo. Alang kang Mike, kadto dili lisod nga trabaho apan makapahimuot pa.

Tingali wala nimo mabatoni ang kaikag ni Mike sa pagpamalit. Apan sama sa kadaghanang batan-on, basin gusto nimo nga maayo ang imong dagway diha sa eskuylahan, sa trabahoan, ug sa pagdula. Ang suliran mao, ang kamatuoran lamang nga ang usa ka urog giisip nga uso sa mga batan-on wala magpasabot nga kini ang angayng isul-ob, ni ang pagpalit sa “butang nauso” mao gayoy labing maayong paagi sa paggamit sa imong kuwarta. Busa, pananglit kon ang imong mga ginikanan mohatag nimog kagawasan sa pagpili sa imo mismong sinina, aniay pila ka sugyot kon unsaon pagpili ug pagpalit sa angayang mga sinina.

Pagpili sa Angayang “Biste”

Nahauna, ihiklin nato ang ideya nga puwede ang bisan unsa kon bahin sa sinina. Ikaw nagakaedaran na, ug ang kalaoman nga mangitag pangabuhi ug tingali magbuhig pamilya anaa sa imong unahan. Ang imong sininaan magaapektar dili lamang sa imong kalaoman sa panarbaho kondili sa paagi usab sa pag-isip ug pagtagad sa uban kanimo. Labing hinungdanon, kitang mga Kristohanon kinahanglang “dili magpahimuot sa atong kaugalingon,” kondili kita angay mabalaka kon sa unsang paagi nga ang atong ginabuhat—o ginasul-ob—magaapektar sa uban.—Roma 15:1.

Ang Proverbio 25:20 nagahisgot sa usa nga “nagahukas ug sapot sa usa ka adlaw nga tingtugnaw.” Pagkadili angay! Samang dili angay nga isul-ob ang makiurog nga biste nga yanong dili angay sa okasyon. Ang usa ka aktor sa usa ka dula sa entablado nagapilig maayo sa biste nga mohaom sa iyang papel. Ug sa tinuod nga kinabuhi, ang mga papel nga atong ginadula kasagaran nagapangayog lainlaing “mga biste.” Pananglitan, ikaw ba magpainterbiyo sa usa ka trabaho? Nan ang bisteng pang-opisina tingali mao ang angayang biste. Moeskuyla ka ba? Nan ang dagway nga gusto nimo tingali kaswal apan hapsay.

Si Millie, nga usa sa mga Saksi ni Jehova, nag-eskuyla sa usa ka eskuylahan diin kaylap ang kabangisan. Ang pagbiste nga daw moadto sa usa ka Kristohanong tigom maghimo niyang sobra ka tataw. Mao nga nagsul-ob siyag kasarangang jeans panahon sa mga oras sa tingtungha, kay kana gidawat man sa iyang eskuylahan. Apan sanglit siya nakigbahin man sa edukasyonal nga buluhaton sa Bibliya human sa mga klase, siya nagdalag sinina. Kausaban sa papel, kausaban sa biste.

Ang mga batan-on sa mga Saksi ni Jehova nagahunahuna ilabina kon unsay ilang isul-ob sa Kristohanong mga tigom ug sa ilang publikong buluhaton sa pagsangyaw. Pananglitan, ang jeans ug tenes nga sapatos, nga tingali mapuslanon sa tunghaan, wala sa lugar panahon sa pormal nga pagsimba; kana makadaot sa pangangkon sa usa nga ministro sa Diyos.—Itandi ang 2 Corinto 6:3.

Ang Bili sa Pagbisteng Konserbatibo

Ang pilosopiya sa batan-ong si Rudy tingali makapatingala kanimo. Matud niya: “Gusto ko ang matang sa sinina nga ginasul-ob sa mga tawo sa miaging 50 anyos.” Kinaraan kaayo? Dili gayod. Nasayran ni Rudy nga bisan pag ‘ang talan-awon sa kalibotan nagakabalhin,’ ang pasukaranang mga estilo talagsa rang mausab. (1 Corinto 7:31) Ang iyang lagda mao: Ayaw pagsul-ob sa nauso kaayo nga sa taudtaod mahimong karaan! “Niining paagiha, ikaw kanunay nga anaa sa uso,” maoy tambag ni Rudy.

Mouyon ang mga eksperto. Pananglitan, ang konsultant nga si Amelia Fatt nag-ingon nga ang konserbatibong mga estilo maoy “maarang-arang nga pangapital.” Kana dili daling makaraan kay ang dagway dili kaayo tino. Ingong pakapin, kasagaran mas sayong ipabagay ang konserbatibong mga estilo sa uban nimong mga igsusul-ob.

Ang pila ka modernong estilo dili angay sa mga Kristohanon. Ang uban maanindot. Pananglitan kon uyon ang imong mga ginikanan, kon imong hikaplagang ang usa ka makiurog nga sapot dili lang mobagay nimo apan mobagay sa uban nimong igsusul-ob, basin maghunahuna ka sa pagsul-ob niana. Apan pagbantay nga maulipon sa urog! Ang konsultant sa urog nga si Carole Jackson miingon: “Kon mosunod ka sa mga urog nga ‘nauso,’ bisan pag ang presenteng uso dili moangay nimo, imong gilimbongan ang imong kaugalingon.”

Adunay ubang bentaha sa pagkakonserbatibo sa sinina. Ang pila ka dalaga nakadiskobre nga kini nagadasig sa seksuwal nga paghasi diha sa eskuylahan ug sa trabahoan. Dugang pa, ang usa ka batan-ong mosunod sa naandang mga estilo mas lagmit isipon sa uban ingong hamtong, lig-on, nga dili sama sa usa nga itugpotugpo sa tanang hangin sa uso ug urog.

Si Tammy, pananglitan, maoy usa ka dalagang nagaalagad nga bug-os-panahong magwawali. Bisan pag ang mugbong sinina mao ang gikabuangan sa dapit nga iyang gipuy-an, siya miingon, “Alang kanako, ang ubos ug diyutay sa tuhod mao ang komportableng gitas-on.” Kini nahiuyon sa Kristohanong pagkamakasaranganon. (1 Timoteo 2:9) Hinuon, nagkalainlain ang mga sukdanan sa pagkamakasaranganon sa tibuok kalibotan. Ug kon nagaduda ka kon kaha ang usa ka estilo angay o dili, ipakigsulti kana sa usa ka ginikanan o sa gulanggulang nga higala.

Listong Pagpamalit

“Pinaagi sa mahanasong pagtultol himoa ang imong pakiggubat,” nagatambag ang Bibliya sa Proverbio 20:18. Ang mahanasong pagtultol gikinahanglan bisan sa mga butang nga yutan-on sama sa pagpamalit. Pananglitan, naglisod ka ba sa pagpangitag sinina nga makapahimuot nimo? Makakuha kag mahanasong pagtultol pinaagi lamang sa pag-adto sa publikong librarya ug paghimog panukiduki! Adunay mga libro ug mga artikulo nga makatabang nimo sa paggamit sa lainlaing mga tabas, mga kolor, ug mga estilo sa sinina aron mabakwi ang mga suliran sa porma sa nawong, gitas-on sa liog, porma sa lawas, ug uban pa.

Komosta ang kalidad sa mga biste nga imong ginapalit? Bisan pag si Jesu-Kristo pobre sa materyal samtang dinhi sa yuta, lagmit gisul-ob niya ang usa ka bisteng dekalidad nga ang mga nagpatay kaniya nagripa kon kinsay makatag-iya niadto! (Juan 19:23, 24) Sa susama, angay kang maningkamot sa pagpalit sa mga bisteng dekalidad bisan pag limitado ra ang imong kuwarta ug kinahanglang magtigom ka sa dili pa mopalit. Sa kadugayan, ang mas mahal dekalidad nga biste nga imong magamit sa daghang katuigan mas barato kay sa daling-madunot nga “baratilyo.”

Sa unsang paagi maugmad nimo ang katakos sa pag-ila sa kalidad? Sulayi ang pagpanan-aw sa mas mahalong mga tindahan nga nagaespesyalista sa dekalidad nga mga biste. Ilha ang hitsura ug hikap sa maayong sinina. Matud sa librong Elegance: “Ayaw pagpalimbong sa usa ka etiketa; ang sinina kinahanglang makabarog sa kaugalingon . . . Ang dili-maayong kalidad, bisan pag unsay etiketa niana, dili baratilyo.” Hikapa ang materyal. Susiha ang kuwelyo, layning, ug mga ohales. Pangitaa ang lig-ong pagkatahi.

Si Mike (nga gihisgotan sa sinugdan) nakaugmad sa katakos sa pag-ilag kalidad. Busa, nailhan niya nga ang baratilyong bata de banyo tinuod nga baratilyo! Bisan pa niana, “ayaw pagkahaylo sa ‘mga baratilyo,’” nagpasidaan si Amelia Fatt. Ang switer nga wala kunhori ang prisyo nga ikasul-ob uban sa ubay-ubayng panapot basin mohatag nimog labawng serbisyo kay sa “baratilyong” switer nga walay mabagayan. Ang Proverbio 21:5 nagaingon: “Ang tagsatagsa nga madalidalion tinong nagapadulong sa kawalad-on.” Likayi ang pagpalit sa dihang ikaw nagadali. Pamalit sa dihang dili daghag tawo ang mga tindahan. Hibaloi daan kon unsay imong gipangita. Kon labaw nga anaa sa imong kaisipan ang panapton, estilo, kolor, ug prisyo nga gusto nimo, menos ang purohan nga ikaw mahitipas ngadto sa pagpalit sa butang wala kaayo nimo kinahanglana.

Ang mga tindera makatabang ug dako kon isulti nimo ang imong tinong mga panginahanglan. (Sa pagkamatuod, maoy uban sa tabang sa usa ka tindera nga si Mike nakapalit ug biste alang sa babayeng mga membro sa iyang pamilya.) Apan ayaw paulog-ulog sa mga tindera nga mahasupak sa maayo nimong panghukom. “Si bisan kinsang walay kasinatian motuo sa matag pulong, apan ang usang maalamon magapalandong sa iyang mga tikang.”—Proverbio 14:15.

Pagbiste ug pamostura sa tukma sa dihang ikaw mamalit. Sa unsang paagi mailhan nimo nga maayong tan-awon ang usa ka amerkana kon imo kanang isukod ibabaw sa T-shirt? O sa unsang paagi makahukom ka kon kaha ang usa ka terno o bestida maanindot kon nagasul-ob kag tenes nga sapatos? Ang usa ka magsusulat nagpatuo pa nga kon dili ka maayong mamiste, ang mga tindera lagmit “magtuo nga ikaw usa ka tawong limitadog katakos sa pagpili ug/o walay kuwartang ikapalit,” ug mohatag sa bug-os nilang pagtagad sa ubang pumapalit.

Sa kataposan, basin hidiskobrehan nimo nga kadaghanan “ang duha labi pang maayo kay sa usa” dihang mamalit. (Ecclesiastes 4:9) Ang usa ka higala o ginikanan makatug-an kanimo unsay hitsura sa biste gikan sa likod, kon kaha luag kaayo, hugot kaayo, o sa ubang paagi dili desente.

Ang Labi Pang Hinungdanong mga Butang

Sa Filipos 1:10, ang mga Kristohanon gitambagan nga “tinoa ninyo ang labi pang hinungdanong mga butang.” Ang tinuod hinungdanong mga butang sa kinabuhi nahasentro sa pagbatog kahibalo sa Diyos—dili sa biste. Ikasubong isulti, ang pila ka batan-on tingali maayo kaayong mamiste apan dimatinagdanon sa ilang katakos sa paghimog publikong pagpahayag sa ilang pagtuo.

Busa bisan pag maayo nga mahimong listong tigpamalit ug magbatog presentableng panagway sumala sa itugot sa imong panalapi, ibug-os ang pagtagad sa pagkahimong hamtong nga Kristohanon. Magtuon sa pagkinabuhi sa maong papel, ug ang pagbiste alang niana mahimong kinaiyanhon.

[Letrato sa panid 10]

Ang mga biste nga makiurog daling mabiya sa uso. Ang konserbatibong mga estilo alang sa lainlaing mga okasyon lagmit molungtad