Pagpaniid sa mga Bituon Karong Adlawa

“GIKAN sa White House ngadto sa Wall Street, popular na kaayo ang astrolohiya.” Sugod pa sa report sa peryodiko bahin sa kaikag sa publiko sa astrolohiya sa Tinipong Bansa.

Ang paghisgot sa White House sa tino makapahunahuna sa mga magbabasa sa gibaniog nga asoy sa usa ka luyoluyo sa presidente niadto. Diha sa iyang librong For the Record, si Donald T. Regan misulat:

“Halos ang tanang dagkong lakang o desisyon nga himoon ni Reagan sa akong panahon ingong hepe sa kawanihan sa White House ginakonsulta una sa usa ka babaye sa San Francisco nga mosusi ug mga horoskopyo sa pagtino nga maayong pagkaangay ang mga planeta alang sa maong palakaw.”

Kon unsa pa may mahimo alang niana, nabutyag niadto ang dakong kaikag sa astrolohiya taliwala sa mga tawo sa Kasadpan, diin ang modernong siyensiya gituohan nga nakawagtang na sa kataposang marka sa astrolohiya. Palandonga kining mga kamatuorana:

◼ Sumala sa AFA (American Federation of Astrologers), dunay duolan sa 5,000 ka bug-os panahon, propesyonal nga mga astrologo ug labing menos 50,000 ka inoras nga astrologo sa Tinipong Bansa. Sa usa ka tuig, ang suhol nga ginabayad alang sa mga paghubad sa kahulogan moabot ug duolan sa $35 milyones.

◼ “Matag tuig sa Pransiya . . . kapin sa 10 milyones ka tawo mokonsultag usa gikan sa kapin sa 30,000 ka opisyal nga giilang mga astrologo o mga espiritista,” nagkanayon ang Toutes les Nouvelles, usa ka senemanang magasin sa Paris.

◼ Ang horoskopyo maoy regular nga bahin sa 92 porsiento, o kapin pa sa 1,500, sa adlaw-adlaw nga peryodiko sa Tinipong Bansa. Sa Alemanya, sa dihang ang adlaw-adlaw nga peryodikong Weser Kurier, wala mopatik sa tudling sa horoskopyo sa usa ka adlaw, nadawat ang mga tawag sa telepono gikan sa mga magbabasa “nga wala mahibalo kon magpabilin o mogawas ba sa balay sa maong adlaw, kon inegosyo ang ilang kuwarta, ug kon asa.”

◼ Dugang ug dugang mga astrologo migamit na ug mga kompiyuter. Ang Astro Intelligence sa Switzerland, pananglitan, makahatag ug 20-panid nga pagtuki sa horoskopyo diha sa imprinta sa kompiyuter sa kantidad nga 55 ka Swisong francs ($36, U.S.). Ang usa ka ilado nga Britanikong astrologo nagpadalag kapin sa 20,000 ka kompiyuterisadong personal nga mga horoskopyo sa usa ka tuig nga tag £10 ($18, U.S.) ang kada usa. Gani ang dayal-ug-horoskopyo nga mga serbisyo sa telepono mabatonan na karon diha sa mga siyudad sama sa New York. Ang Kompaniya sa Telepono sa New York mitaho nga duolan sa usa ka milyong mga tawag ang madawat kada bulan.

Nganong May Kaikag?

Niining katuigan sa katumanan-sa-kaugalingon, ang tanang butang nga nagasaad nga makahatag katin-awan sa kahulogan sa kinabuhi o sa dugang pagsabot sa kaugalingon piho nga dawaton. Busa, diha sa mga pulong sa usa ka tigpaniid, ang usa sa mga rason kon nganong ang mga tawo nadani sa astrolohiya mao nga “kini nagapatuo nga mosugid kanimo bahin sa labing importanteng tawo sa tanan, ikaw.”

Apan tinuod ba nga makahimo niini ang astrolohiya? Ug, labing hinungdanon, gigamhan ba gayod ang atong mga kinabuhi sa mga bituon? Atong tukion pag dugang kining butanga.