Ikaw Ba Nagasimba sa Usa ka Buhi nga Diyos?

BISAN pa nga natawo si Tadashi Ishiguro human sa Gubat sa Kalibotan II—human nga makasaysayanhong gisalikway sa Hapones nga imperador ang pagkadiyos—siya nagtuo gihapon nga balaan ang imperador. “Dili niya angay isalikway ang iyang pagkadiyos,” miingon si Tadashi.

Apan, ang iyang igsoong lalaki nangatarongan kaniya bahin niining butanga: ‘Ang imperador, sama sa ubang mga tawo, matigulang ug magkasakit. Siya dili makalingkawas sa kataposan sa tanang tawo: kamatayon. Siya dili makaluwas sa iyang kaugalingon, ilabina sa ubang tawo.’ Human niana nga panaghisgot, diin gikutlo sa igsoong lalaki ang Bibliya, mihukom si Tadashi sa pagtuki pag-ayo sa iyang mga pagtuo.—Ecclesiastes 3:19; Roma 5:12.

Sa ulahi, siya misugod sa pagkakita sa kaalam sa tambag sa Bibliya: “Ayaw pag-ibutang ang inyong pagsalig sa mga prinsipe, ni sa anak sa tawo.” Ngano man? Tungod kay, sumala sa gipamulong sa Bibliya, “kaniya walay kaluwasan. Mogula ang iyang gininhawa, sa yuta siya mobalik; nianang maong adlaw mahanaw ang iyang mga hunahuna.” (Salmo 146:3, 4) Sa pagkamatuod, ang pagsalig sa may kamatayon nga mga tawo ingon nga diyos motultol lamang sa kapakyasan, gani katalagman pa!

Ang kapupud-ang Hapones gituohan nga gilalang sa mga tulo sa tubig nga nangahulog gikan sa bangkaw ni Izanagi, ang amahan sa diyos-nga-adlaw si Amaterasu Omikami. Apan ang maong pagtuo walay matuod nga patukoranan. Nan, komosta ang pagtuo nga ang Hapones nga imperador maoy kagikan niining maong diyos ug busa balaan? Dili ba usa usab kini ka walay-pasukaranang sugilambong? Sanglit nagsimba man sila sa wala nila hiilhi, gihalad sa libolibong mga Hapones ang ilang kinabuhi alang sa usa nga dili makatabang kanila. Pagkamakapasubo!

Ingong resulta sa panaghisgot uban sa iyang igsoon, natin-awan si Tadashi nga ang atong matahom nga yuta, ug ang kinabuhi diha niana, maoy bunga sa usa ka makagagahom ug mahigugmaong Maglalalang. (Hebreohanon 3:4) Sumala sa Bibliya, ang matuod nga Diyos maoy “gikan sa walay kataposan ngadto sa walay kataposan.” (Salmo 90:2) Siya buhi sa walay kataposan. Ang iyang kinabuhi dili limitado sa gitas-on sa kinabuhi nga 70 o 80 ka tuig, ni nagasalig siya sa tambag sa iyang mga mananambag.—Salmo 90:10; Roma 11:34.

Hinunoa, ang Bibliya nag-ingon mahitungod sa Maglalalang: “Siya nagabuhat sumala sa iyang kabubut-on diha sa mga panon sa langit ug taliwala sa mga pumoluyo sa yuta. Ug walay makapugong sa iyang kamot kun makasulti kaniya, ‘Unsay imong ginabuhat?’” (Daniel 4:35) Pagkalahi gikan sa mga tawhanon kinsa gitagad isip mga diyos apan dili makatuman bisan sa ilang kaugalingong kabubut-on!

Samtang nagtuon si Tadashi sa Bibliya, ang iyang pagtuo sa Diyos nga maoy nagdasig niana mitubo. Kining maong Usa dili kay usa ka tinumotumo lang nga diyos. Hinunoa, siya maoy usa ka matuod, dili-makitang Persona. Diha sa Bibliya, nga gidasig sa Diyos ang mga tawo sa pagsulat, siya nagsulti kanato nga ang iyang ngalan mao si Jehova. (Salmo 83:18) Siya nagsulti usab kanato mahitungod sa iyang nahimo, bahin sa iyang katuyoan nga buhaton, ug bahin sa kon unsaon siya sa pagsimba. Apan, sa unsang paagi makatino ka nga si Jehova maoy usa ka buhi nga Diyos aron ang imong pagsalig kaniya dili makawang?

Buweno, sa nagpahayag sa iyang pagkalabaw batok sa tanan pang uban, si Jehova miingon: “Ako mao ang Balaan nga Usa ug wala nay lain pa nga Diyos, ni may sama pa kanako; ang Usa nga nagpasundayag sa kataposan gikan sa sinugdan, ug gikan sa karaang mga panahon sa mga butang nga wala pa mahimo; ang Usa nga nagaingon, ‘Ang akong tambag magapadayon, ug himoon ko ang tanan ko nga kahimut-an.’”—Isaias 46:9, 10.

Busa, ang iyang Pagkadiyos gilig-on pinaagi sa iyang katakos sa pagtagna sa umaabot ug sa pagtino nga ang iyang kabubut-on matuman. Siya makahimo sa pagpanalipod ug sa pagluwas sa iyang mga alagad, dili-sama sa mga tawo kinsa gisimba isip mga diyos apan kinahanglan nga panalipdan sa iyang mga ginsakpan. Busa, sa ulahi, si Tadashi midangat sa pagsimba sa Diyos sa Bibliya, miduyog sa iyang igsoong lalaki sa pag-alagad kang Jehova nga Diyos ingong usa sa Iyang mga Saksi.

Kinsay Imong Pagasimbahon?

Daghang mga diyos ang ginasimba karong adlawa, apil ang mga tawo nga giisip sa mga tawo nga may balaang mga gahom. Ang Bibliya nagaingon: “Kay dunay gipanagtawag nga ‘mga diyos,’ sa langit o sa yuta.” (1 Corinto 8:5) Didto sa karaang Gregong siyudad sa Atenas, pananglitan, ang usa ka altar gitukod nga diha niana dunay sinulat: “Alang sa usa ka Diyos nga Wala-Hiilhi.” (Buhat 17:23) Busa apil ang mga taga Atenas niadtong nagsimba nianang ilang giadmiter nga wala hiilhi.

Busa ang posibilidad naglungtad nga karong adlawa kita malangkit usab sa pagsimba sa wala nato hiilhi. Ang milyon-milyong Hapones nalangkit sa maong pagsimba, nalimbongan sa bakak nga mga ministro kinsa nagpasiugda sa pagtuo nga balaan ang imperador. Bisan ang imperador nalangkit sa paglimbong. Busa sayri ang leksiyon: Ang kamatuoran nga nagtuo ang atong mga ginikanan ug usa ka butang o nga ang mga ministro nag-ingon nga usa ka butang ang matuod dili makapahimo niini nga matuod. Kinahanglan mohimo kita ug pagsusi aron makatino nga nakaila gayod kita sa atong ginasimba.

Ang karaang mga taga Atenas, o Hapones nga nabuhi sa wala pa ang Gubat sa Kalibotan II, dili mao lamang ang nagasimba sa wala nila hiilhi. Bisan karon milyon-milyong mga tawo sa Kakristiyanohan nagasimba sa Trinidad. Kon usa ikaw sa maong tawo, pangutan-a ang imong kaugalingon: Nakaila ba gayod ako kon kinsa ang Diyos nga akong gisimba? Kinsay iyang ngalan? Sa unsang paagi mahimo siyang tulo ka persona diha sa usa ka Diyos? Unsa may tuboran sa akong pagtuo?

Ang mga magtutuo sa Trinidad tingali nagtuo nga gitudlo kini ni Jesu-Kristo ug sa iyang mga apostoles ug nga kini maoy usa ka pagtulon-an sa Bibliya. Apan dili. Ang New Catholic Encylcopedia miadmiter: “Ang han-ay sa ‘usa ka Diyos sa tulo ka Persona’ dili lig-on nga pagkatukod, nga sa pagkamatuod wala gayod malangkob sa Kristohanong kinabuhi ug sa pangangkon niini sa pagtuo, sa wala pa ang kataposan sa ika-4 nga siglo [gatos-gatos nga katuigan human nga si Jesus ug ang iyang mga apostoles dinhi pa sa yuta]. . . . Taliwala sa Apostolikong mga Amahan, wala gayod sila bisan gamay lang niining hunahunaa o panglantawa.”

Sa laing bahin, gatos-gatos ka katuigan sa wala pa moabot si Jesu-Kristo sa yuta ingong usa ka tawo, ang pagtulon-ang trinidad lig-ong natukod diha sa mga tawo kansang mga relihiyon gipasukad sa tumotumo. Pananglitan, ang karaang mga Ehiptohanon nagsimba sa trinidad nga Osiris, si Isis (iyang asawa), ug si Horus (iyang anak nga lalaki). Ug ang mga Hindu, bisan karong adlawa, nagsimba ug trinidad nga gilangkoban sa tuloy-ulo nga Trimurti sa Brahma, Vishnu, ug Siva.

Busa inay mopauyon-uyon lang ug mosimba sa paagi niadtong anaa sa imong palibot, susiha aron matino nga ikaw nakaila gayod sa imong ginasimba. Ang mga taga Atenas, kinsa nagsimba sa wala nila hiilhi, gisultihan nga ang Diyos “dili halayo gikan sa matag usa kanato,” ug nga siya makaplagan ni bisan kinsa nga tim-os nga magapangita kaniya. Busa, kita makasalig nga kon kita mohimog tim-os nga pagpangita sa matuod, buhi nga Diyos, atong makaplagan siya.—Buhat 17:27.

[Letrato sa panid 10]

Si Tadashi mihukom sa pagpasusi pag dugang sa iyang mga pagtuo