Pagtagamtam ug Mainit nga Relasyon sa Ugangan ug Umagad
SI Fujiko, ang natugaw nga umagad-nga-babaye nga gihisgotan sa nag-unang artikulo, sa kataposan nakadani sa iyang bana sa pagpahawa sa apartment sa iyang mga ginikanan ug sa pagbalhin diha sa sunod nga pultahan. Apan wala gihapon moarang-arang ang kahimtang. Ang pagpanghilabot sa iyang ugangan-nga-babaye nagpadayon, ug ang iyang kaguol nagpabilin. Unya usa ka adlaw giduaw siya usa ka estranghero.
Kana nga pagduaw nagpasugod kang Fujiko ug sa usa ka dalan nga misangpot sa kausaban sa personalidad, ug kini nagpauswag sa iyang relasyon sa uban. Siya misugod sa pagtuon sa Bibliya uban sa mga Saksi ni Jehova. Sa kadugayan, ang iyang tinamdan nausab ug dako nga gumikan niana ang iyang ugangan nga lalaki gustong motambong sa mga pagtuon aron iyang makita mismo kon ‘unsang matanga sa relihiyon kadto nga nagpausab ug dako sa iyang personalidad.’
Pag-ila sa Bag-ong Bugkos
Ang Bibliya naghatag tin-awng hulagway sa Kasulatanhong kahikayan sa kaminyoon. Human nga gilalang sa Diyos ang unang paris ug naghiusa kanila, iyang gitukod ang mosunod nga prinsipyo: “Ang lalaki mobiya sa iyang amahan ug sa iyang inahan ug siya mopuyo ipon sa iyang asawa ug sila mahimong usa ka unod.” (Genesis 2:24) Busa angayng ilhon sa bag-ong magtiayon nga sila misulod sa usa ka bag-ong bugkos. Sila kinahanglang magpabilin sa usag usa ingong usa ka gawasnong yunit bisan pag sila tingali nag-ipon ug puyo uban sa ilang mga ugangan.
Ang pagbiya sa amahan ug inahan, hinunoa, wala magpasabot nga ang mga anak sa dihang magminyo na motalikod sa ilang mga ginikanan ug dili na kinahanglan nga sila motahod ug mopasidungog kanila. “Ayawg tamaya ang imong inahan tungod kay siya tigulang na,” nagtambag ang Bibliya. (Proverbio 23:22) Oo, diha sa kaminyoon, adunay pagpasibo sa mga relasyon. Basta isilsil kinig maayo sa matag membro sa pamilya sa hunahuna, ang batan-ong magtiayon makabatog kaayohan gikan sa kasinatian ug sa kaalam sa mga ginikanan.
Si Timoteo, ang iladong batan-ong lalaki nga kauban ni apostol Pablo sa iyang misyonaryong panaw, gimatuto sa usa ka Hudiyohanong inahan, nga si Eunice. Apan, ang iyang apohan nga babayeng si Lois dayag nga mitabang usab sa pag-ugmad sa iyang kinabuhi. (2 Timoteo 1:5; 3:15) Kini wala magpasabot nga ang mga apohang babaye adunay katungod sa pagpanghilabot sa pagbansay sa anak ug maghimog mga sukdanan nga lahi sa mga ginikanan. Adunay maayong paagi nga ang tigulang nga mga ugangan makatabang sa mga umagad sa pagbansay sa mga anak.—Tito 2:3-5.
“Ang Tinuod nga Babayeng Maalamon”
Kon ang duha ka kaliwatan mag-abagay sa talandogong isyu sama sa pagbansay sa bata, ang duha angay nga molihok diha sa kaalam. “Ang tinuod nga babayeng maalamon nagatukod sa iyang balay,” nagaingon ang sanglitanan sa Bibliya, “apan ang buangbuang magaguba niana diha sa iyang kaugalingong mga kamot.” (Proverbio 14:1) Sa unsang paagi makatukod ang usa ka babaye sa iyang balay? Si Tomiko miingon nga ang komunikasyon ang mitabang kaniya sa pag-ayo sa iyang relasyon uban sa iyang umagad-nga-babaye, nga si Fujiko. “Diin walay pagtambag ang mga tinguha makawang,” mitambag ang Bibliya.—Proverbio 15:22.
Ang komunikasyon wala magpasabot nga isulti ang tanan nga anaa sa imong hunahuna nga walay pagtagad sa mga pagbati sa uban. Dinhi nga ang kaalam ikapasundayag. “Ang maalamong tawo magapatalinghog” kon unsay isulti sa uban. Usahay ang imong mga ugangan-umagad adunay ikasulti, apan sila magpanukong mopadayag sa ilang gibati. Magmasinaboton, ug ‘kuhaa ang ilang mga hunahuna.’ Unya ‘pamalandong’ sa dili ka pa mosulti.—Proverbio 1:5; 15:28; 20:5.
Ang panimpo hinungdanon kaayo. “Ang usa ka pulong nga ipahayag sa hustong panahon sama sa mga mansanas nga bulawan diha sa linala nga salapi,” nagaingon ang sanglitanan sa Bibliya. (Proverbio 25:11) Si Tokiko ug ang iyang umagad-nga-babaye miingon nga sila naghulat hangtod sa hustong panahon sa dili pa nila isulti ang mga opinyon nga tingalig makapasuko sa uban sa sayop nga paagi. “Naningkamot ako sa paghunahuna sa dili pa mosulti sa dihang adunay butang nga gusto kong isulti sa akong umagad-nga-babaye,” miingon si Tokiko. “Ibutang ko sa hunahuna ang mga punto ug mosulti sa dihang anaa siya sa maayong buot ug wala gutoma. Abi nimo, dali kang masuko kon ikaw gigutom.”
Ang babayeng maalamon magpugong sa pagsultig daotan sa iyang mga umagad-ugangan. “Bisan kon kita mga ugangan-nga-babaye o mga umagad-nga-babaye, angay natong hisayran nga bisan unsa nga daotan nga isulti nato bahin sa usa kanila, kini sa kadugayan ilang mahibaloan,” miingon si Sumie Tanaka, usa ka Haponesa nga magsusulat kinsa nagpuyo uban sa iyang ugangan-nga-babaye sa 30 ka tuig. Hinuon, maoy iyang gipasiugda ang pagsultig maayo bahin sa iyang mga ugangan sa direkta o dili-direkta nga paagi.
Apan, komosta, kon ang imong mga umagad ug mga ugangan dili mosanong sa imong mga paningkamot?
Magmapasayloon
Ang seryosong mga suliran tali sa mga umagad ug mga ugangan kasagarang moresulta gikan sa mga butang nga dili unta mahimong suliran kon gibuhat o gisulti pa sa uban. Sanglit kitang tanan dili-hingpit ug “mapandol sa pulong,” usahay kita ‘mosulti nga walay paghunahuna nga sama sa mga duslak sa usa ka espada.’ (Santiago 3:2; Proverbio 12:18) Apan, maalamon nga dili masuko sa matag pulong nga isulti nga wala hunahunaa.
Sila nga nakabuntog sa umagad-ugangan nga mga suliran namati sa tambag sa Bibliya: “Padayong mag-inantosay ang usag usa kaninyo ug kon adunay pagmahay ang usa batok sa usa kaninyo magpinasayloay kamo.” (Colosas 3:13) Tinuod, dili sayon ang pag-antos sa inyong mga umagad-ugangan ug pasayloon sila, ilabina kon adunay hinungdan sa pagreklamo. Apan ang lig-ong pangawhag sa pagbuhat niana mao ang pasalig nga kita makadawat ug kapasayloan gikan sa Diyos mismo alang sa atong mga kasaypanan.—Mateo 6:14, 15.
Bisan diha sa mga nasod sa Silangan, diin ang mga tawo sa naandan nagasunod sa Buddhismo, Taoismo, Confucianismo, ug Shinto, adunay daghan nga nagtuon sa Bibliya ug nakasabot sa kamatuoran bahin sa mahigugmaong Maglalalang. Ang maong pagsabot nagtabang kanila sa pagbuntog sa daw dili-mabuntog nga mga pagbati sa kapait.
“Ang Gugma Dili Mapakyas”
Ang malipayon umagad-ugangan nga relasyon nagkinahanglag usa ka malig-on nga pundasyon. Ang pagtabang sa usa ka tigulang o masakiton nga ugangan tungod kay obligasyon kini dili kanunay mosangpot sa maayong relasyon. Nakat-onan kini ni Haruko sa dihang ang iyang ugangan-nga-babaye nagkasakit ug kanser. Iyang gigugol halos ang iyang tibuok adlaw sa ospital aron sa pag-atiman sa iyang ugangan-nga-babaye, ug dugang pa, iyang ginaatiman pa ang iyang kaugalingong pamilya. Siya nailalom sa hilabihang kalisod nga sa kadugayan siya hapit nga maupaw.
Usa ka adlaw samtang nanghinguko sa iyang ugangan-nga-babaye, wala tuyoa nga siya nasakitan. “Wala gayod kay pagtagad kanako!” singhag sa ugangan-nga-babaye.
Nakuratan niadtong dili-mapabilhong mga pulong, wala kapugngi ni Haruko ang iyang mga luha. Unya siya naghunahuna nga ang mga pulong masakit gayod tungod kay iyang gibuhat ang tanan alang sa iyang ugangan-nga-babaye tungod kay gibating usa kini ka obligasyon. Busa siya mihukom nga ang nagapalihok nga gahom sa iyang pag-atiman mao ang gugma. (Efeso 5:1, 2) Kini nagtabang kaniya sa pagbuntog sa nasakitan nga pagbati ug miresultag napasig-uling relasyon uban sa iyang ugangan-nga-babaye hangtod nga siya namatay.
Sa pagkamatuod, ang gugma nga gibatbat sa Bibliya mao ang yawi sa pagbuntog sa kabingkilan sa pamilya. Basaha kon unsay gipamulong ni apostol Pablo bahin niana, ug tan-awa kon dili ka ba mouyon. “Ang gugma mapailubon ug maluluton,” siya misulat. “Ang gugma dili abughoan, dili tigpagawal, dili tigpaburot, dili magalihok nga binastos, dili mahunahunaon sa iyang kaugalingong kaayohan, dili masuk-anon. Kini dili madumtanon. Kini wala magakalipay tungod sa dili matarong, apan nagamaya sa kamatuoran. Kini mopailob sa tanang butang, motuo sa tanang butang, molaom sa tanang butang, moantos sa tanang butang.” Dili ikatingala nga si Pablo midugang: “Ang gugma dili mapakyas.” (1 Corinto 13:4-8) Sa unsang paagi maugmad nimo kana nga gugma?
Ang Bibliya naglista sa “gugma” ingong bahin sa “mga bunga” sa espiritu sa Diyos. (Galacia 5:22, 23) Busa, dugang sa imong mga paningkamot, hinungdanon nga batonan ang espiritu sa Diyos kon gusto mong maugmad kining matanga sa gugma. Dugang pa, ikaw makapangayo kang Jehova, ang Diyos sa Bibliya, sa pagtabang kanimo nga dugangan kag gugma nga sama sa iyang gugma diha sa imong personalidad. (1 Juan 4:8) Kining tanan, siyempre, nagkinahanglan nga ikaw mokat-on bahin kaniya pinaagi sa pagtuon sa iyang Pulong, ang Bibliya. Ang mga Saksi ni Jehova malipayon gayod nga motabang kanimo, sama sa ilang gibuhat kang Fujiko ug sa daghan pang uban.
Samtang ipadapat nimo ang imong nakat-onan gikan sa Bibliya, imong makita nga dili lamang ang imong relasyon sa Diyos ang mouswag kondili ang imong relasyon usab uban sa mga tawo nga anaa sa imong palibot, lakip na ang imong mga umagad-ugangan. Imong matagamtam ang gisaad sa Bibliya, nga mao, “ang kalinaw sa Diyos nga molabaw sa tanang pagpanabot.”—Filipos 4:6, 7.
Si Fujiko ug ang uban nga gihisgotan niining artikuloha nakatagamtam niana nga kalinaw—ug mahimong ikaw makatagamtam usab niini. Oo, pinaagi sa pagpangita kang Jehova nga Diyos ug pagsunod sa tambag diha sa iyang Pulong, ang Bibliya, ikaw usab makatukod ug makahupot ug mainit nga relasyon sa imong mga umagad-ugangan.
[Kahon sa panid 8, 9]
Ang Bana—Tighupot-sa-Kalinaw o Tigbungkag-sa-Kalinaw?
Kon ang duha o tulo ka kaliwatan mag-ipon ug puyo sa usa ka balay, ang katungdanan sa bana sa paghupot sa kalinaw sa pamilya dili pagakalimtan. Mahitungod sa usa ka tipikong bana nga naglikay sa iyang responsabilidad, si Propesor Tohru Arichi sa Kyushu University, usa ka espesyalista sa sosyolohiya sa pamilya, misulat:
“Kon ang magtiayon mag-ipon ug puyo [sa inahan], ang inahan makamatikod sa panginahanglan sa iyang anak nga lalaki, ug iyang atimanon dayon nga wala tuyoa ang iyang anak nga lalaki kon iyang makita ang maong mga panginahanglan. Dawaton sa anak kana nga pag-atiman nga walay pagpanuko. Kon dugang pang hunahunaon sa anak ang situwasyon sa iyang asawa ug ibutang ang iyang inahan tukmang dapit bahin sa iyang pagpanghilabot, ang suliran masulbad. Makasubo ug sa kasagaran, ang anak dili makaamgo niana.”
Nan, sa unsang paagi ang bana makahimog aktibong papel sa paghupot sa kalinaw sa iyang pamilya? Si Mitsuharu miingon nga ang iyang pagpadapat sa mga prinsipyo sa Bibliya nakatabang sa iyang pamilya. “Ang bugkos tali sa usa ka inahan ug sa iyang anak nga lalaki lig-on kaayo bisan pag mitubo na siya sa pagkahamtong,” siya miadmiter, “busa ang anak kinahanglan maningkamot gayod sa ‘pagbiya sa iyang amahan ug sa iyang inahan ug moipon sa iyang asawa.’” Iyang ipadapat ang prinsipyo pinaagi sa paghisgot sa mga butang bahin sa pag-atiman sa anak ug pagbansay sa iya lamang nga asawa, ug wala niya itandi ang iyang asawa sa iyang inahan kon bahin sa buluhaton sa balay. “Karon,” siya mipadayon, “kami ug ang akong mga ginikanan nagtahoray sa usag usa. Ang matag usa kanamo nasayod kon diin ang pagpanghilabot kapungtan ug diin ang tabang ug pagpaluyo kalipayan.”
Dugang sa ‘pag-ipon sa iyang asawa,’ ang bana kinahanglang tigpataliwala sa iyang inahan ug sa iyang asawa. (Genesis 2:24) Siya kinahanglan nga usa ka maayong tigpatalinghog ug awhagon sila sa pagsulti kon unsay anaa sa ilang mga kasingkasing. (Proverbio 20:5) Usa ka bana, kinsa nakakat-on sa tukmang pag-atiman sa mga situwasyon, nagatino usa kon unsay gibati sa iyang asawa. Unya, sa presensiya sa iyang asawa, siya mopakigsulti sa iyang inahan bahin sa mga isyu nga nalangkit. Pinaagi sa pagtuman sa iyang katungdanan ingong tighupot sa kalinaw, ang anak nga lalaki makatabang sa pag-ugmad ug mainit nga relasyon sa balay tali sa duha ka babaye nga iyang gihigugma.
[Hulagway sa panid 9]
Pamati ug pakigkomunikar
[Hulagway sa panid 10]
Ang gugma, dili ang pagbati nga obligasyon, ang makatukod ug maayong relasyon