Gikan sa Among mga Magbabasa
Pagsimba sa Emperador Sa inyong artikulong “Paglubong sa Kanhi Usa ka Diyos” (Disyembre 22, 1989), nasayop kamo sa pagpahamtang sa pagbasol sa away tali sa Hapon ug sa Kasadpan. Kadto mao ang resulta sa mga paninguha sa Kasadpan nga gamhan ang Asia. Ang pag-uswag sa Hapon ingong usa ka gahom sa kalibotan nakapugong niini. Dili, si Emperador Hirohito dili usa ka diyos, apan tingali siya gigamit sa Ginoo ingong usa ka paagi sa pagtultol sa gidaugdaog nga katawhan sa Asia padulong sa kagawasan.
T. M., Tinipong Bansa
Dili makataronganon ang paghinapos nga gipasiugda sa Diyos ang makalilisang nga pagpatay nga gimugna sa maong away. (Habakkuk 1:13) Ang makapasubong pagmando ni Emperador Hirohito gigamit sa pag-ilustrar nga ang pagmando sa tawo mosangpot sa kadaot sa tawo ug ang tawo nagakinahanglan gayod sa pagmando sa Diyos. (Ecclesiastes 8:9)—ED.
Ang mga artikulo maayo ug angay bang basahon sa usa ka Kristohanon? Pinaagi sa pagbasa sa mga detalye mahitungod kang Emperador Showa, dili ba ‘ang atong mga hunahuna anaa sa mga buhat nga daotan’?—Colosas 1:21.
Y. F., Hapon
Hisabtan, ang mga artikulo tingali nakapukawg makapasakit nga mga handumanan, ilabina taliwala sa mga magbabasa nga nakasinati sa mga hitabo nga gibatbat niana. Bisan pa niana, gisulat ang mga artikulo aron iyagyag ang kabuangan sa pagsimba sa tawo ug pagpaliso sa mga magbabasa nganha sa “Diyos nga buhi.” (Buhat 14:15)—ED.
Pagpili sa mga Karera Salamat sa inyong tambag sa mga batan-on bahin sa bili sa edukasyon sa unibersidad. (Mayo 8, 1989) Sulod sa nangaging 22 ka tuig, ako usa ka propesor sa usa ka dakong unibersidad sa nasod, ug ako makapasalig sa inyong mga batan-ong magbabasa nga gawas sa seryosong espirituwal nga mga konsiderasyon, ang kadaghanan sa gitudlo diha sa mga unibersidad niining mga adlawa gamay rag praktikal nga bili. Mius-os ang akademikanhong mga sukdanan, ug kasagarang ang mga graduwado diyutay rag kahanas nga kinahanglanon sa panarbaho.
Gawas pa, sa nangagi, gihinapos sa pipila nga ang usa ka batan-ong Kristohanon pagasawayon tungod sa pagkuhag mga kurso sa unibersidad ubos sa bisan unsang mga kahimtang. Busa giapresyar ko ang timbang nga hunahuna nga gipahayag sa inyong artikulo.
F. S., Tinipong Bansa
Ang mga ginikanan kinahanglang maghukom unsa ka dakong edukasyon ang angayan alang sa ilang mga anak. Ug samtang ang karera diha sa ministeryo gisugyot alang sa Kristohanong mga batan-on, ang pila ka pagbansay sa panarbaho gawas sa ginatanyag sa hayskul dili daotan sa kaugalingon. Sa pila ka nasod, tingali praktikal o basin kinahanglanon ang pagdawat sa maong pagbansay. Kinahanglang timbangon sa mga ginikanan ang mga benepisyo kontra sa mga epekto nga tingali ipahinabo niini diha sa espirituwalidad sa ilang mga anak. Sa bisan unsang paagi, ang palabihon sa Kristohanon kinahanglang mao ang pagpauswag sa intereses sa Gingharian, dili ang kaayohang panalapi. (Mateo 6:33)—ED.
Ang akong mga ginikanan tigsulti nako sa pagkat-on sa usa ka pakamot nga trabaho sa eskuylahan, apan ako ra kanang hikalimtan. Sukad sa pagbasa sa inyong artikulo, ako nagakuhag mga kurso nga motabang nako sa pagbatog trabaho nga magustohan nako sa pagkatapos nako sa pag-eskuyla. Apan bisan unsang kahanas sa panarbaho nga akong makat-onan, ako nagaplano sa paghimo sa ministeryo nga akong karera.
V. L., Tinipong Bansa
Pagsabot sa Hubak Kinasingkasing akong nagapasalamat sa inyong artikulo. (Marso 22, 1990) Sa adlaw una namo kana madawat, ang among doktor naghukom nga ang among anak babaye hubakon. Busa ang artikulo nahisamag usa ka kahupayan. Akong gamiton ang daghan sa mga sugyot niana.
V. H., Inglaterra
Crossword Puzzles Ako regular nga magbabasa sa Pagmata! ug nagakahimuot ilabina sa mga crossword puzzles. Kana nagatabang nako sa pagsag-ulo sa mga kasulatan. May dugang bang pagapatikon?
J. W., Inglaterra
Oo, sila mopadayon sa pagpatik matag karon ug unya.—ED.