Nganong Dili Sulayan ang Pagbakasyon Diha sa Balay?

IKAW dunay duha ka semanang bakasyon, ug ikaw gusto gayod ug kausaban! Apan ikaw dili makaabot sa galastohan sa pagbiyahe niining panahona. Unsay imong mahimo?

Buweno, hinumdomi, ang bakasyon maoy usa ka pahulay gikan sa rotina, panagsang pahulay o pahayahay. Busa nganong dili sulayan ang pagbakasyon sa balay? Sa pagkamatuod daghan kaayong butang ang imong mahimo didto. Ikaw makadibuho, o manguhag mga letrato, o buhaton ang ubang gikaikagang mga trabaho diin ikaw walay panahon niana. Adunay mga dapit ug mga butang nga anaa mismo sa inyong lugar nga tan-awon ug kalipayan. Ang pagbakasyon sa balay adunay daghang mga bentaha. Sa paghisgot lamang sa pipila:

▪ Dili kinahanglan ang pasaporte o bisa

▪ Dili na kinahanglang magpailis ug kuwarta

▪ Walay suliran sa ubang pinulongan

▪ Walay kahasol sa aduwana o imigrasyon

▪ Walay pag-impake

▪ Walay mahal nga plete sa ayroplano o gastos sa gasolina

▪ Walay bililhong panahong mausik sa pag-adto didto

Karon, dili ba mas maayo na ang imong gibati? Aw, ikaw gani makatulog sa gusto nimo sa imong kaugalingong komportableng kama nga imo nang naandan!

Ang importanteng butang bahin sa bisan unsang bakasyon mao ang pagplano niana. Alang sa uban ang pagpaabot maoy ingon kaukyab sa kamatuoran mismo. Ang pagbakasyon sa balay nagkinahanglan usab ug maayong pagpangandam aron ikaw makabuhat ug butang hinungdanon nga imong kalipayan kaayo ug nga makapatagbaw kanimo.

Kon Unsay Mahuhat Diha sa Balay

Sa panahon sa bakasyon daghang tawo ang nanguhag mga letrato ingong handumanan sa okasyon. Sila mobiyaheg kaliboan ka kilometro aron sa pagkuhag letrato sa mga butang nga anaa mismo sa imong lugar. Sulayi pagkuhag mga letrato sa usa ka umahan sa mga daisy, sa pagkuhag duol nga letrato dandelion, o sa usa ka gamayng insekto sa sanga. Tingali gusto nimong letratohan ang imong daang eskuylahan, o sa balay nga imong gidak-an, o sa karaang balay sa uma sa imong Lola nga dili halayo sa lungsod, apan wala kay panahon sa pagkuhag letrato niini. Buhata kini karon!

Ug kon maghisgot bahin sa mga letrato, komosta kadtong mga kahon sa mga letrato sa pamilya nga imong giplanohang ibutang sa mga album? Mao na kini ang higayon sa pagbuhat niini. Ang tibuok pamilya malipay sa pagtan-aw niining mga handumanan sa nangagi. Kon makakita ka ug maayong pagkakuha nga mga letrato sa pamilya o sa mga higala, pagkamakapalipay nga mapadalhan sila ug kopya niini!

Ang mga biyahedor kasagarang mangolektag mga sobenir. Karon, unsay imong makita sa balay? Tingali talagsaong mga bato alang sa terrarium o usa ka panaksang puno niini ingong butang nga kokabildohan. Mahibulong ka sa kalipay sa gagmayng kabataan bisan sa mga bato lamang! Duna ka bay laing mahunahunaan? Mga kinhason? Mga dahon sa tinghunlak? Mga anot ug mga tanom (bisan mga sagbot!) nga paugahon alang sa dekorasyon?

Komosta kadtong mga membro sa pamilya o mga higala nga gusto nimong duawon? Imbitaha sila alang sa usa ka tasang kape o tsa. Hangyoa ang mga tigulang sa pag-asoy ug mga sugilanon sa bata pa sila aron makadungog ang mga bata. Nganong dili irekord ang mga sugilanon? Basin si “Ingko Ben” dili na magdugay sa kalibotan.

Kon nagabakasyon, daghan ang nagpadala ug mga postkard ngadto sa mga minahal ug mga higala. Alang sa bakasyon sa balay, basli kanang bangan sa mga sulat diha sa hunos sa lamesang-sulatanan. Pahibaloa ang imong mga higala nga ikaw sa gihapon nahigugma kanila ug wala makalimot kanila.

Kon Asa Moadto Diha sa Inyong Lugar

Kon dunay bisitang moabot sa imong lungsod o siyudad, asa man nimo sila dalha? Unsay ilang makita? Tingali sa sinugdan ikaw walay mahunahunaang lugar nga makapaikag sa inyong dapit, apan tungod kana kay ginabali-wala nato ang atong lungsod. Pagsusi kon unsay anaa dinha. Tan-awa kon unsay irekomendar sa lokal nga buro sa mga turista o sa kamara sa komersiyo sa mga turista. Tingali mahibulong ka kon unsay adtoan.

Aduna bay museo sa duol? O usa ka pabrika nga nagtanyag ug mga pagpasiyo? Ang ubang pabrika sa kendi o tsokolate dili lamang mohatag ug mga pasiyo sa pabrika kondili nagpatilaw usab! May mga pabrika sa bino nga ingon niini. Ang lokal nga mag-uuma tingalig malipay nga magpakita sa imong mga anak sa mga hayop​—unsaon sa paghipos sa mga itlog gikan sa mga manok, o kon unsaon sa paggatas sa baka. Maayong ilang mahibaloan nga ang gatas wala magagikan sa usa ka botelya o sa usa ka karton.

Tingali imong papahulayon si Mama sa pagluto pinaagi sa pag-adto sa mga restawrang etniko. Ang ilang partikular nga pagkaon​—Intsik, Hapon, Italiano, Grego​—ug sa ilang adorno, ug tingali ang awit, imong mahanduraw dayon nga nagkaon ka diha sa usa ka langyawng yuta.

Apan komosta kon walay ingon nianang klaseha sa mga restawran sa inyong lungsod? Nan nganong dili himoon kana nga eksperyensiya diha sa balay? Diha sa librarya makakuha kag mga impormasyon kon unsay pagpamesti ug pagkaon niining mga tawhana. Handurawa nga ikaw anaa sa India, pananglitan. Ang libro sa pagluto nga dunay mga resipe sa Indian nga potahe nga binutangag curry magpasugod kanimo alang sa usa ka pagkaon nga dili kaayo lisod andamon. Mahimong imong sundogon ang ilang paagi sa pagpamisti alang sa gabii.

‘Ah,’ moingon ka, ‘apan kadtong gustong magkamping diha sa pamilya dili moisip niana nga bakasyon gawas kon sila magkamping.’ Mahimo ba nga magkamping ka ning tuiga diha sa imong lagwerta? Tingali gusto kang magpasiyo sa duol nga banika ug samtang atua didto manguha ug ihalas nga mga bulak ug manan-aw ug mga hayop ug mga langgam.

Sanglit ang panahon sa bakasyon sa kasagaran maoy maayong panahon sa paglig-on sa bugkos sa pamilya ug sa pagbuhat sa mga butang nga tingob, dili ba mas maayo ang pagbuhat niana diha sa balay sa pamilyar nga palibot? Sulayi kini.

Pagbating Kahayahay Gikan sa mga Butang nga Nahimo

Unya anaa kanang mga trabaho sa balay nga ikaw daw walay panahon alang niana. Apan kana bang pisikal nga trabaho tinuod makapahayahay? Buweno, dili ba makapahayahay ang pagsugod na usab sa imong regular nga rotina human sa imong bakasyon nga nakontento nga sa kataposan naayo ang tulo sa atop, ang tanang mga gunitanan nataod na diha sa mga hunos, ug kadtong nagaagiot nga mga bisagra napahilom na gayod? Tingali walay nausik nimong kusog sa pagbuhat sa gikinahanglang trabaho kay sa imong pagdula, paglangoy, o pagbaktas.

Ug kinsa bay wala maghandom sa pagbasa ug pagtuon ug dugang? Kini dili makapuol. Pagdukiduki sa mga ulohang makaiikag kanimo. Kuhaa gikan sa imong estante sa mga libro ang mga tomo sa The Watchtower o Awake! Ayaw kahibulong kon imong makitang ikaw napasimang ug nagabasa sa ubang makapahimuot nga mga artikulo. Takulahaw lang oras na diay alang sa paniudto o sa panihapon. Ikaw dili makatuo nga dali ra kaayong molabay ang panahon. Apan relaks! Hinumdomi, ikaw nagbakasyon.

Ang Kalipay sa Pagbakasyon sa Balay

Paghimog butang bag-o, gamita ang imong handurawan, ug tingali sa dihang ang imong bakasyon matapos na, ikaw makaamgo: ‘Nalingaw gayod ako niini! Buhaton ko kini pag-usab!’

Busa karon, unsay imong hunahuna? Tingali imong tawgon ang pamilya ug planohon ang bakasyon sa balay. Kuhaa ang ilang mga ideya. Kon ikaw nag-inusara, pangimbitar ug suod nga higala sa pagplano niini. Unya sulayi ang pagbakasyon sa balay. Magsilbi kining panalagsang bakasyon nga halayo sa balay nga mohatag kanimo nianang gitinguhang pahulay sa imong okupado nga kinabuhi.

[Mga hulagway sa panid 23]

Ang pagpasiyo sa banika, pagduaw sa usa ka uma o museo, o bisan gani ang lingaw-lingaw nga pagbasa, mahimong malakip sa mga bakasyon sa balay