Kon Unsaon nga Imong Malikayan ang mga Kalisdanan sa Bakasyon

PANAHON sa bakasyon​—unsay mosantop sa hunahuna? Pagpahayahay diha sa init nga kabaybayonan, nga may labong nga mga kahoyng palma nga naghatag ug makapapreskong landong? O tingali ang kalipay sa paghanggab ug bugnaw, hinlong hangin sa bukid?

Apan, tingali mabalaka ka sa posibleng dili maayong panahon, mga pagkalangan diha sa erport, pagkadagaton, ug uban pa. Bisan unsa pay imong mga hunahuna, unsay imong mahimo aron sa paghimo sa imong bakasyon nga makalingaw kutob sa maarangan?

Pangandam Pag-ayo

Ang maalamong mga bakasyonista abanteng magplano. Magkuha sila ug mga papeles sa biyahe ug sa panglawas aron kini maandam na inigsugod sa ilang panaw. Ang pagpakisayod bahin sa mga kapeligrohan sa panglawas nga lagmit masagubang magtabang kanila sa paghukom kon unsang tambala ang dad-on nga makasanta sa sakit.

Sa pagpangandam sa pagpanaw ngadto sa mga dapit diin ang malarya maoy komon, daghan ang mosugod sa pagtomar ug batok-malarya nga mga tambal pipila ka adlaw una pa mogikan. Ingong panalipod, hinunoa, kasagarang gisugyot nga ilang ipadayon ang maong pagtambal sa tibuok nilang bakasyon ug bisan sulod sa upat ka semana human niana. Tungod kini kay ang mga parasito sa malarya mougmad sa lawas nianang gidugayona. Apan ang laing mga panagana hinungdanon usab.

Si Dr. Paul Clarke, sa London School of Hygiene and Tropical Medicine, nagtambag: “Samang hinungdanon mao ang mga pang-abog sa insekto nga ihaplas sa panit o pulsohan, ug mga sintas sa buolbuol nga gipatuphan ug pang-abog sa insekto, mga moskitero ug usa ka vapouriser sa insekto nga de-koryente.” Ang mga gamit nga sama niini kasagaran nga labing maayong paliton una pa mogikan alang sa imong bakasyon.

Ang pagkadagaton makadaot sa bisan unsang panaw. Unsay hinungdan niini? Usa ka tigdukiduki nangangkon nga ang pagkadagaton mahitabo sa dihang ang utok masobrahag karga ug bag-ong mga signal gumikan sa pagkaanaa diha sa dili pamilyar nga dapit. Kon ang pagkilingkiling sa barko, ang pagkurogkurog sa ayroplano, o ang paghagubhob sa makina sa imong sakyanan magpahinabo niining sulirana, sulayi ang pagtumong sa imong pagtagad sa usa ka butang nga wala maglihok, tingali sa kapunawpunawan o sa dalan sa unahan. Ang maayong bentilasyon magtaganag gikinahanglan pag-ayong oksiheno. Sa grabeng mga kaso sa pagkadagaton, ang antihistamine nga mga tambal mahimong makatabang sa pag-alibyo sa mga simtoma. Apan, kinahanglanon ang panagana: Pagbantay sa posibleng mga side effect, sama sa pagduka, sanglit ilalom sa pipila ka mga kahimtang kini magpameligro sa imong kahilwas.

Ang tagdugayng mga panaw sa kahanginan adunay mga kapeligrohan sa panglawas, sama sa pagkahurot sa tubig sa lawas. Alang sa uban, ang walay lihoklihok ug huot nga paglingkod sa daghang oras magpauswag sa risgo sa pagpanibug-ok sa dugo diha sa bitiis. Kon ang pagpanibug-ok sa dugo mokanat ug makaabot sa baga o sa kasingkasing, ang mga resulta mahimong ilabinang makuyaw. Busa, sa tagdugayng mga panaw sa kahanginan ang pipila tingali kinahanglang mag-ehersisyo pinaagi sa paglakawlakaw sa mga pasilyo o pinaagig pagtuyhadtuyhad sa hawak ug kaunoran sa bitiis samtang naglingkod. Ug aron makubsan ang pagkahurot sa tubig sa lawas, inom ug daghang dili alkoholikong mga ilimnon.

Ang nahisgotan ba sa ibabaw nagpalig-on lamang sa imong kahadlok sa pagbiyahe sa kahanginan? Kon mao, ikaw mahupayan sa kamatuoran nga ang pagbiyahe sa kahanginan may pagkaluwas. Kini gikatahong 500 ka pilong mas luwas kay sa pagmotorsiklo o 20 ka pilong mas luwas kay sa pagbiyahe pinaagig kotse! Apan, ang uban moingon nga ang maong mga estadistika gipasukad sa pagtandi sa mga distansiya nga napanaw ug dili sa tagsatagsang gidugayon sa panahon nga nagahin sulod sa panahon sa pagbiyahe.

Ang pagbiyahe uban sa gagmayng kabataan magpatunghag linaing hagit. “Planoha ang inyong panaw nga may katukma sa militaryong pagsulong,” mirekomendar ang magsisibya nga si Kathy Arnold. Bisan tuod dili ka makahimo sa pagdumala niana, pagdalag mga basahon, mga dulaan, o ubang materyal nga makadani sa pagtagad sa mga bata. Maghimo kini sa pagbiyahe nga mas makalingaw sa tibuok pamilya.

Sa Imong Pag-abot

‘Mokabat unag upat o lima ka adlaw sa pagpahiangay una pa ako mosugod sa pagkalingaw sa akong pagbakasyon,’ maoy komento sa daghang bakasyonista. Tinuod, ang pagpasibo sa bag-ong mga palibot nagkinahanglag panahon. Busa lagmit maalamon nga dili dayon maglaaglaag sa una o ikaduhang adlaw sa imong pag-abot. Tugoti ang imong lawas ug hunahuna sa pagpasibo sa laing eskedyul. Ang kapakyasan sa pagbuhat niini makatensiyon ug makadaot sa kaayohang mahimo sa imong bakasyon.

Sumala sa usa ka banabana, mga katunga sa daghang ginatos ka milyong tawo sa tibuok kalibotan nga nanimpalad sa ubang nasod matag tuig nag-antos ug usa ka porma sa balatian o kadaot. Busa, ingon sa pagsaysay ni Dr. Richard Dawood, editor sa Traveller’s Health, “ang pagsanta maoy estratehiya alang sa panglawas nga dili angayng kalimtan sa magpapanaw.” Sanglit ang lawas sa magpapanaw kinahanglang mopasibo sa nagkalainlaing mga matang sa bakterya diha sa atmospera, pagkaon, ug tubig, ilabinang hinungdanon sulod sa unang pipila ka adlaw nga ikaw mag-amping kon unsay imong kaonon.

“Ang pagkaon dili gayod isipong luwas,” nagpahimangno si Dr. Dawood, “gawas kon kini nasayrang presko ug naluto pag-ayo (naesterilisar sa kainit)​—bahin sa karne, hangtod nga wala nay pulang kolor nga nagpabilin.” Apan, bisan ang init nga pagkaon dili kanunayng luwas. Busa, “seguroha nga ang paniudto karong adlawa dili salin sa panihapon kagahapon, nga giinit ug gihikay pag-usab.”

Busa, kon ikaw nagbakasyon sa dapit nga lahi kaayo sa imong gipuy-an, dili ka gayod makahimo kanunay sa pagkaon kon kanus-a, asa, ug kon unsay imong gusto. Apan kini sa pagkatinuod maoy gamayng kahasol lamang aron malikayan ang kalibanga nga gikatahong nakaapektar sa dos kinto sa tanang internasyonal nga mga magpapanaw.

Kon bahin sa ilimnon, ang binotelyang tubig mas luwas kay sa mabatonang lokal nga tubig. Apan, aron malikayan ang mga suliran, maalamon nga ang binotelya ug de-latang mga ilimnon ablihan mismo sa imong atubangan. Maalamon usab ang paglikay sa yelo. Hunahunaa kanunay nga kini makadaot gawas kon masayran mong kini hinlo.

Hinungdanon Alang sa Makalingawng Bakasyon

Human makuha ang usa ka surbi sa iyang mga magbabasa, usa ka editor sa pagbiyahe mitaho: “Kon ang klima imong giisip nga mas hinungdanon kon nganong ang bakasyon malamposon kaayo o dili, ang mga kaubanan mas hinungdanon pa.” Sa pagkatinuod, “ang maayong kaubanan” giila ingong dakong butang nga makatampo sa usa ka makalingawng bakasyon nga “mas kasagaran kay sa episyenteng mga hotel, walay kakuliang mga panaw, lamiang pagkaon, ug makaiikag nga mga talan-awong makita.”

Apan asa ka man makahimamat ug bag-ong mga higala dihang nagabakasyon? Buweno, ang usa ka paagi sa paghimo niana mao ang pagsulat daan sa opisina sa Watch Tower Society nga nag-atiman sa nasod nga inyong giplanohang bakasyonan. Hatagan ka nilag adres sa Kingdom Hall sa mga Saksi ni Jehova nga labing duol sa imong destinasyon maingon man sa oras sa mga tigom didto. Ang pipila ka adres niining mga opisinaha makaplagan sa panid 5 niining magasina, ug ang mas taas nga listahan makaplagan pinaagi sa pagtan-aw sa bag-ong Yearbook sa mga Saksi ni Jehova.

Ang hinungdanong bahin aron malingaw sa imong bakasyon ug sa samang panahon malikayan ang bisan unsang mga pagbasol mao ang pagsunod sa maalamong tambag sa Bibliya: “Ayaw pagpahisalaag. Ang daotang pakig-uban nagadaot sa mapuslanong mga batasan.” (1 Corinto 15:33) Kon matugkan ka ug tinguha sa pagsalikway sa Kristohanong mga sukdanan ug mga kalihokan samtang anaa sa hilit nga dapit sa bakasyon, maalamong ilha kini ingon nga kahuyangan ug pangayog diyosnong tabang sa pagbugno nianang tinguhaa. Ang mga ginikanan usab kinahanglang magtagad sa kalihokan sa ilang mga anak. Hinumdomi, kini maoy “makuyaw nga mga panahong lisod sagubangon” bisan asa ka pa.​—2 Timoteo 3:1.

Kon mobakasyon kamo ingong usa ka pamilya, ayawg hunahunaa nga si Mama maoy mohimo sa tanan niyang normal nga ginahimo sa balay. Magmaandam sa pagtabang sa matag adlawng mga buluhaton. Ipakita ang matinabangong espiritu. Ang maong tinamdan makatampog dako sa kalipay sa tanan nga nagbakasyon.

Makalingaw ba unya ang imong bakasyon? Ang pipila ka piniling mga hulagway, postkard, ug mga sobenir, tingali bisan ang pipila ka baligya nga ginamag kamot, makapahinumdom gayod sa makalipayng mga handomanan. Ug ilabinang halandomon sa walay duhaduha mao ang bag-ong nakaplagang mga higala. Pakigkontak kanila. Pakigsinulatay aron iasoy ang makapadasig nga mga kasinatian. Adunay daghang paagi nga imong mahimo ang imong bakasyon nga usa nga imo gayong kahimut-an.

[Kahon sa panid 17]

Pipila ka Pahinumdom sa Pagbakasyon

Una ka pa mogikan

• Hupti ang tanang kinahanglanong balidong mga dokumento sa pagbiyahe ug sa panglawas

• Pagbaton ug mga suplay sa mga medisina sa pagsanta sa sakit

Panahon sa biyahe

• Inom ug daghang dili alkoholikong mga pluwido, ug pag-ehersisyo diha sa tagdugayng mga panaw sa kahanginan

• Pagdalag makaiikag nga materyal alang sa mga batan-on

Sa pag-abot

• Hatagig panahon ang imong lawas ug hunahuna sa pagpasibo

• Kaona lamang ang luwas nga pagkaon ug ilimnon

• Hupti ang pagkamabinantayon sa moral

• Tabang sa matag adlawng mga buluhaton uban sa mga membro sa pamilya

[Hulagway sa panid 16]

Dihang magbakasyon, pagbantay sa imong mga kaubanan