Usa ka Bag-ong Kalibotan nga Walay Pag-antos

“Ang unang mga butang dili na pagahinumdoman, ni motungha pa kini sa kasingkasing. Apan managmaya, kamong katawhan, ug managlipay sa walay kataposan tungod sa akong ginalalang.”​—Isaias 65:17, 18.

KANANG mga pulong sa tagna giinspirar sa Diyos kapin sa 2,700 ka tuig nga miagi. Kana nagabatbat, sa bahin, kon sama sa unsa ang kinabuhi sa umaabot. Kanus-a ba? Tapos sa paglaglag sa Diyos sa presenteng sistema sa mga butang. Daghang tagna sa Bibliya nagapatin-aw nga katuyoan sa Diyos nga wagtangon kining presenteng sistema sa mga butang sa dili na madugay ug pulihan kinig usa ka bag-ong kalibotan nga wala nay pag-antos.

Pagkalahi unya sa kinabuhi nianang bag-ong kalibotan kon itandi sa kinabuhi sa tibuok nangaging kasaysayan sa tawo! Ang matagnaong Pulong sa Diyos nagatug-an kanato nga kini bug-os libre sa gubat, krimen, kakabos, ug inhustisya. Mawala na ang sakit ug kamatayon sa walay kataposan. Wala na unyay makapabahing mga gobyerno, mga relihiyon, o mga sistema sa ekonomiya nga napamatud-an nga kulang kaayo. Ang mga luha sa kalipay mobanos sa mga luha sa kasub-anan kay mawala na ang pagkadaotan ug pag-antos sa walay kataposan.

Gilandongan Diha sa mga Tagna sa Bibliya

Matikdi sa unsang paagi kanang mga kahimtanga gilandongan niining sampol sa mga tagna sa Bibliya:

Wala nay Gubat: “Siya nagapahunong sa mga gubat hangtod sa kinatumyan sa yuta.” (Salmo 46:9) “Ang nasod dili na mobakyaw ug espada batok sa nasod, ni sila makakat-on pa sa gubat.”​—Isaias 2:4.

Hustisya Alang sa Tanan: “Himoon ko ang hustisya nga latid ug ang pagkamatarong nga pamato.”​—Isaias 28:17.

Kagawasan Gikan sa Kahadlok: “Sila magalingkod, ang matag usa sa silong sa iyang parras ug sa silong sa iyang kahoy nga igira, ug walay magapakurog kanila.” (Miqueas 4:4) “Sila magapuyo nga may kasegurohan sa ilang yuta.”​—Ezekiel 34:27.

Gutom Mawagtang: “Aduna unyay daghang trigo sa yuta; sa tumoy sa kabukiran aduna unyay pag-awas.” (Salmo 72:16) “Ang kahoy sa kapatagan mohatag sa iyang bunga, ug ang yuta mismo mohatag sa iyang abot.”​—Ezekiel 34:27.

Wala nay Pagkatigulang o Sakit: “Himoa nga ang iyang unod mabag-o kay sa diha sa pagkabata; pabalika siya sa mga adlaw sa iyang batan-ong kusog.” (Job 33:25) “Walay molupyo ang magaingon: ‘Ako masakiton.’”​—Isaias 33:24.

Kamatayon, Pagbalata, ug Kasakit Mawala na Hangtod sa Hangtod: “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang nangagi na.”​—Pinadayag 21:4.

Dili Apektado sa Nangagi

Ang umaabot nga bag-ong kalibotan nga hinimo sa Diyos mahimong makapatagbaw kaayo nga ang pagkalipay sa mga molupyo sa yuta sa kinabuhi dili mabalda, bisan sa ngil-ad nga mga pahinumdom sa nangaging pag-antos. Ang daghang makapalig-ong mga hunahuna ug mga buluhaton nga mao unya ang matag-adlawng kinabuhi sa mga tawo nianang bag-ong yugto anam-anam nga magpapas sa nangaging daotang mga pahinumdom. Ang saad sa Diyos mao: “Ang unang mga butang dili na pagahinumdoman, ni motungha pa kini sa kasingkasing.” Ang mga tawo “magmalipayon sa walay kataposan” diha sa butang nga ipasulod sa Diyos sa tibuok yuta. “Ang tibuok nga yuta mipahulay, nga nahigawas sa kasamok. Ang mga tawo nanagmaya uban sa mga pag-awit.”​—Isaias 65:17, 18; 14:7.

Karong adlawa, “ang gilaoman nga nalangan makapadaot sa kasingkasing,” sumala sa ginaingon sa Bibliya. Apan ang kahimtang mabalit-ad sa bag-ong kalibotan. Nianang panahona “ang butang gitinguha [mao unyay] usa ka kahoy sa kinabuhi sa dihang modangat kini.” (Proverbio 13:12) Ang kasingkasing dili na mabug-atan sa pag-antos o sa mga paglaom nga wala matuman. Hinunoa, sila mahupong sa katagbawan ug kalipay tungod sa daghang kahibulongang butang itagana sa Diyos alang sa tawhanong pamilya.

Lahi nga Pagmando

Inay magbaton sa dili-makapatagbaw tawhanong pagmando nga bulag sa Diyos, ang bag-ong kalibotan magbatog bug-os lahi nga pagmando. Ang awtoridad sa pagmando kuhaon gikan sa mga tawo. Sila dili na gayod tugotan sa pagmando nga bulag sa Diyos.

Ang tagna sa Bibliya nagaingon: “Sa mga adlaw niadtong mga haria [ang mga magmamando nga karon nagagahom] ang Diyos sa langit magatukod sa usa ka gingharian [sa langit] nga dili gayod malaglag. Ug ang gingharian mismo dili igahatag sa ubang katawhan [kay wala nay tawhanong pagmando]. Kini magadugmok ug magalaglag niining tanan nga gingharian [nga karon nagalungtad], ug kini mismo mobarog sa mga panahon nga walay katinoan.”​—Daniel 2:44.

Gitudloan ni Jesus ang iyang mga sumusunod sa pag-ampo alang sa bag-ong pagmando sa yuta sa miingon siya: “Paanhia ang imong gingharian. Mamatuman ang imong kabubut-on, ingon nga natuman sa langit, dinhi usab sa yuta.”​—Mateo 6:10.

Kana mao unya ang bag-ong kagamhanan sa katawhan​—ang langitnong pagmando sa Diyos pinaagi sa iyang Gingharian diha sa mga kamot ni Kristo. Ug sa yuta, ang maunongong tawhanong mga alagad sa Diyos magdumala sa mga kahikayan sumala sa pagtultol sa Diyos. (Isaias 32:1) Si apostol Pedro naghisgot niining bag-ong kahikayan ingong “bag-ong mga langit ug usa ka bag-ong yuta nga atong ginapaabot sumala sa iyang saad, ug niini ang pagkamatarong magapabilin.” (2 Pedro 3:13) Ang pagmando sa maong Gingharian mao ang pangunang pagtulon-an sa Bibliya.

‘Ang Kalalangan Gipahigawas’

Kining bag-ong pagmando bug-os magagahom sa mga puwersa sa kinaiyahan. Ang ‘mga pagbuot sa kinaiyahan’ sama sa mga linog, mga unos, mga baha, o mga hulaw dili na makapahinabog kalisod. Si Jesus mismo nagpasundayag sa iyang gahom sa pagsugo sa maong mga puwersa. Sa usa ka okasyon, pananglitan, sa dihang hapit matikyaob ang sakayan nga gisakyan ni Jesus ug sa iyang mga tinun-an tungod sa bagyo, iyang gipalinaw ang hangin ug ang dagat. Ang natingalang mga tinun-an mipahayag: “Unsang matanga kini sa tawo, nga bisan ang mga hangin ug ang dagat mosugot man kaniya?”​—Mateo 8:23-27.

Busa ang yuta, ingon man ang tawhanong kalalangan niini, makakaplag ug dili-hitupngang kagawasan. “Ang kalalangan mismo pagawson gikan sa kaulipnan sa kadunotan ug makabaton sa mahimayaong kagawasan sa mga anak sa Diyos. Kay kita nahibalo nga ang tibuok nga kalalangan nagapadayon sa pag-agulo ug gisakitan hangtod karon.”​—Roma 8:21, 22.

Makatino ba kita nga ang tawhanong pagmando sa dili madugay matapos na ug ang bag-ong kagamhanan sa Diyos mopuli sa pagdumala sa tanang kahikayan sa yuta? Makatino gayod kita, kay ang Unibersohanong Soberano naghatag sa iyang pulong: “‘Ang akong kaugalingong tambag magabarog, ug himoon ko ang tanan ko nga kahimut-an’; . . . ako na nga gisulti; ako usab nga pagapahinaboon kini. Ako nga giumol kini, ako usab nga pagahimoon kini.”​—Isaias 46:10, 11.

“Usa ka Tinudlong Panahon”

Sa unsang paagi kana matuman? Kanus-a ba kana mahitabo? Ang Pulong sa Diyos nagaingon: “Adunay usa ka tinudlong panahon alang sa tanang butang.” (Ecclesiastes 3:1) Kini nagaapil sa usa ka tinudlong panahon nga moingon ang Diyos ‘igo na!’ ug sa pagtapos sa pagkadaotan ug pag-antos. Si Daniel nagtumong sa “ang tinudlong panahon sa kataposan.” (Daniel 8:19) Si Jesus naghisgot usab bahin sa usa ka “tinudlong panahon.”​—Marcos 13:32, 33.

Oo, ang Diyos nagtakda ug tinong panahon nga siya magbalda sa tawhanong kahikayan ug magpapha sa alaot nga eksperimento sa tawhanong pagmando nga nahibulag kaniya. “Ang matuod nga Diyos magahukom sa matarong ug sa daotan, kay adunay panahon alang sa tanang kalihokan.” (Ecclesiastes 3:17) Ug ang ebidensiya ingong katumanan sa tagna sa Bibliya nagapaila nga ang gigahing panahon sa Diyos sa pagtugot sa pag-antos duol nang matapos. Inigkatapos nianang gitagal nga panahon, iyang dugmokon hangtod malaglag ang dili-makapatagbawng sistema sa tawhanong pagmando nga sa kaliboan ka mga tuig nagdalag dakong pag-antos alang sa tawhanong pamilya.​—Mateo 24:3-14; 2 Timoteo 3:1-5, 13; Pinadayag 19:11-21.

Inigpatuman ni Jehova sa iyang mga paghukom, matikdi kon unsay mahitabo niadtong nagapasakop sa iyang pagmando, kon itandi niadtong wala magpasakop: “Sa makadiyut na lamang, ug ang daotan mawala na; . . . apan ang mga maaghop mismo magapanunod sa yuta, ug sila makakaplag sa ilang tumang kalipay sa kadagaya sa pakigdait.” “Mahitungod sa mga kaliwat sa mga daotan, sila pagaputlon. Ang mga matarong magapanunod sa yuta, ug sila magapuyo ibabaw niana sa walay kataposan.” “Kanunay nga tan-awa ang matul-id, kay ang umaabot nianang tawhana magmalinawon. Apan ang mga makasasala mismo pagalaglagon sa tingob.”​—Salmo 37:10, 11, 28, 29, 37, 38; tan-awa usab ang Proverbio 2:21, 22; Mateo 5:5.

Apan komosta ang libolibo ka milyong tawo nga nangamatay na? Sa unsang paagi sila makabenepisyo gikan sa usa ka bag-ong kalibotan? Pinaagi sa pagkabanhaw, usa ka pagpasig-uli sa kinabuhi dinhi mismo sa yuta. Sila mobalik gikan sa lubnganan ug hatagag higayon sa pagpahimulos sa kinabuhi sa walay kataposan. Ang Pulong sa Diyos nagagarantiya: “Adunay pagkabanhaw sa mga matarong ug sa mga dili-matarong.” (Buhat 24:15) Ug gipasundayag kini ni Jesus pinaagi sa pagbanhaw sa mga tawong patay, sama kang Lasaro ug sa anak lalaki sa balong babaye sa Nain.​—Juan 11:38-44; Lucas 7:11-16.

“Balos”

Pagkamakalipay ang pagkahibalo nga katuyoan sa Diyos nga taposon ang pag-antos ug pasudlon ang usa ka matarong bag-ong kalibotan! Hunahunaa nga mabuhi sa milyonmilyong katuigan​—sa pagkamatuod, sa walay kataposan​—diha sa hingpit nga panglawas ug kalipay taliwala sa paraisonhong mga palibot, diin ang pagkadaotan ug pag-antos mahimong mga butang sa kagahapon sa walay kataposan!

Dili ka ba mouyon nga ang maong “balos” sa Diyos sa katawhan​—hangtod sa hangtod​—molabaw kaayo sa pila ra ka libong katuigan nga gitugotan sa Diyos ang pag-antos? Ug dili ba usab kini molabaw kaayo sa 70 o 80 ka tuig nga pag-antos​—o menos pa​—nga ato tingaling giantos sa matag usa sa atong tibuok kinabuhi?

Layog-Abot nga Panglantaw

Sa iyang layog-abot nga panglantaw sa mga butang, ang Maglalalang nahibalo nga hinungdanon ang paghusay una sa bililhon kaayong mga butang maylabot sa iyang katungod sa pagmando ingong Unibersohanong Soberano ug sa pagkamatarong sa iyang pagmando. Ug hinungdanon ang paghusay sa butang maylabot sa tukma ug dili-tukmang mga paggamit sa kagawasan sa pagpili. Kinahanglanon usab ang pagpasundayag nga ang iyang paglalang maoy hingpit sa pagkaaging ang mga tawo nga maunongong magpasakop sa iyang matarong nga mga balaod makahupot sa integridad nganha kaniya ilalom sa paglutos ug pagsulay pinaagi sa kalibotanong mga magmamando, nga ang dakong panig-ingnan niini mao ang kaugalingon niyang Anak, si Jesus, samtang dinhi sa yuta.

Kay nakahusay na sa tanang isyu, dili itugot sa Diyos nga ang pagkadaotan ug pag-antos mopatim-aw na usab sa pagdaot sa malinawong uniberso. “Ang kasakitan dili motungha sa ikaduhang panahon.”​—Nahum 1:9.

Sa panahong walay kataposan nga umaabot, ang Diyos makagamit sa nahitabo niining nangaging libolibong katuigan nga samag usa ka sulay nga kaso nga gidesisyonan sa ‘korte suprema.’ Ang naunang panghitabo niini ikapadapat sa bisan unsang panahon sa umaabot, bisan diin sa uniberso, kon ugaling motungha ang mga pagduhaduha bahin sa pagkasoberano sa Diyos o sa tukmang paggamit sa kagawasan sa pagpili.

Unsay Imong Pilion?

Kita may kapilian karong adlawa. Kita makagamit sa atong kagawasan sa pagpili sa usa sa duha ka paagi: Kita makapili sa dili pagpanumbaling sa mga katuyoan sa Diyos, nga matagbaw sa dili-hingpit tawhanong pagmando ug makaambit sa dulnganan niini, o kita makagamit sa atong kagawasan sa pagpili sa pagkat-on kon unsa ang mga katuyoan sa Diyos ug kon unsay kinahanglan natong buhaton aron pahimut-an siya ingong debotadong mga sakop sa iyang Gingharian.

Si Jesus miingon ngadto sa Diyos diha sa pag-ampo: “Kini nagkahulogan sa kinabuhing walay kataposan, ang ilang pagkuhag kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Busa kon gusto nato ang kinabuhi diha sa bag-ong kalibotan, kinahanglang maningkamot kita sa pagkat-on sa kamatuoran bahin sa Diyos, sa iyang mga katuyoan, ug sa iyang mga kinahanglanon. Matikdi kon giunsa kini pagpahayag sa Bibliya: “Si Jehova nagauban kaninyo samtang kamo uban pa kaniya; ug kon inyong pangitaon siya, inyo siya nga hikaplagan, apan kon inyo siya nga biyaan, iya usab kamong biyaan.”​—2 Cronicas 15:2.

Ang panahon talitapos na alang niining daang kalibotan; ang usa ka bag-ong kalibotan taliabot na: “Ang kalibotan lumalabay ug mao usab ang pangibog niini, apan siya nga nagabuhat sa kabubut-on sa Diyos nagapabilin sa walay kataposan.” (1 Juan 2:17) Hain ang imong pilion​—ang taligawas nga daang kalibotan o ang umaabot nga bag-ong kalibotan?

Ang Pulong sa Diyos nagaingon: “Gibutang ko ang kinabuhi ug ang kamatayon sa imong atubangan, ang panalangin ug ang tunglo; ug kinahanglang pilion mo ang kinabuhi aron ikaw makapadayong buhi, ikaw ug ang imong mga kaliwat, pinaagi sa paghigugma kang Jehova nga imong Diyos, pinaagi sa pagpamati sa iyang tingog ug pagpabilin kaniya; kay siya mao ang imong kinabuhi ug gitas-on sa imong mga adlaw.”​—Deuteronomio 30:19, 20.

Imo bang tinguha nga matagamtam ang mga panalangin nga gitagana sa Diyos alang niadtong nagapahiuyon sa ilang kabubut-on sa iyaha? Ang mga magpapatik niining magasina o mga Saksi ni Jehova sa bisan diin sa kalibotan malipay nga motabang kanimo, nga walay bayad, sa pagkasayod sa dugang bahin niini.

[Blurb sa panid 12]

Ang mga patay makabaton sa higayon nga makapuyo sa bag-ong kalibotan sa Diyos pinaagi sa pagkabanhaw gikan sa lubnganan