Ang Tanang Pag-antos Matapos Na sa Di-Madugay!

Sa usa ka higayon sa imong kinabuhi, tingali nakapangutana ka, ‘Nganong daghan kaayo ang pag-antos?’ Sulod sa libolibong katuigan, grabe na ang pag-antos sa katawhan tungod sa mga gubat, kakabos, katalagman, krimen, inhustisya, sakit, ug kamatayon. Sa milabayng usa ka gatos ka tuig, mas misamot ang pag-antos sa katawhan. Matapos ba kining tanang pag-antos?

Ang makahupay nga tubag maoy oo, ug hapit na gayod! Ang Pulong sa Diyos, ang Bibliya, nag-ingon: “Ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Hangtod kanus-a? “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”​—Salmo 37:10, 11, 29.

Human nga paphaon sa Diyos ang pagkadaotan ug pag-antos, ang yuta himoon nga paraiso. Dayon ang mga tawo mabuhi na sa walay kataposan diha sa hingpit nga panglawas ug kalipay. Ang Pulong sa Diyos nagtagna: ‘Pagapahiran sa Diyos ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.’​—Pinadayag 21:4.

Nianang bag-ong kalibotan, bisan ang mga patay pagabanhawon aron sila usab makatagamtam sa maong panalangin: “Aduna unyay pagkabanhaw sa mga matarong ug sa mga dili-matarong.” (Buhat 24:15) Maoy hinungdan nga nakasulti si Jesu-Kristo ngadto sa usa ka naghinulsol nga kriminal nga nagpakita ug pagtuo kaniya: “Ikaw makauban kanako sa Paraiso.”​—Lucas 23:43.

Nganong Nagsugod ang Pag-antos?

Kon matahom nga palaaboton ang katuyoan sa Diyos para sa mga tawo, ngano man nga gitugotan niya nga magsugod ang pag-antos? Nganong gitugotan niya kini sa dugay na kaayong panahon?

Sa dihang gilalang sa Diyos si Adan ug Eva, Iyang gihimo sila nga may hingpit nga lawas ug hunahuna. Iyang gipapuyo sila sa usa ka paraiso nga hardin ug gihatagan silag makalilipay nga buluhaton. Ang Bibliya nag-ingon: “Nakita sa Diyos ang tanan nga iyang gibuhat ug, tan-awa! kadto maayo kaayo.” (Genesis 1:31) Kon gituman pa nila ang Diyos, hingpit unta ang ilang mga anak, ug paraiso unta ang tibuok kalibotan, diin ang mga tawo mabuhi nga walay kataposan sa kalinaw ug kalipay.

Gibutang sa Diyos diha kang Adan ug Eva ang maanindot nga gasa nga mao ang kagawasan sa pagpili ingong bahin sa ilang tawhanong kinaiya. Dili sila sama sa robot nga walay utok, nga magsunodsunod lang. Apan, ang ilang malungtarong kalipay nagdepende sa ilang paggamit sa kagawasan sa pagpili sa hustong paagi​—sa pagtuman sa mga balaod sa Diyos. Sama sa giingon sa Diyos: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Ang sayop nga paggamit sa kagawasan sa pagpili moresulta ug kadaot, kay ang tawo wala lalanga nga magmalamposon kon siya mobulag sa Diyos. Ang Bibliya nag-ingon: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”​—Jeremias 10:23.

Makapasubo nga ang atong unang mga ginikanan nagtuo nga bisan pag mobulag sila sa Diyos, sila molampos gihapon. Apan sa dihang gisalikway nila ang paggahom sa Diyos, siya wala motugot nga sila magpabiling hingpit. Busa nagsugod pagkadaot ang ilang lawas hangtod nga sa kataposan sila natigulang ug namatay. Kay kita mga anak man nila, napanunod nato ang maong dili-kahingpitan ug kamatayon.​—Roma 5:12.

Ang Pangunang Isyu—Kinsa ang May Katungod sa Pagmando

Nganong wala laglaga sa Diyos si Adan ug Eva ug dayon maglalang pag-usab ug bag-ong paris? Tungod kay gihagit ang pagkasoberano sa Diyos sa uniberso, sa ato pa, ang iyang katungod sa pagmando. Ang pangutana mao, Kinsa ang may katungod sa pagmando, ug kang kinsang pagmando ang husto? Dugang pa, Mas maayo kaha ang kahimtang sa tawo kon mobulag sila sa paggahom sa Diyos? Sa paghatag kanila ug igong panahon sa pagsulay sa pagmando sa ilang kaugalingon nga may hingpit nga kagawasan, bug-os nga mapamatud-an sa Diyos kon mas maayo ba ang ilang kahimtang ilalom sa iyang paggahom o sa ilang paggahom. Ang panahong gilugway igo gayod aron masulayan sa tawo ang tanang matang sa politikanhon, katilingbanon, ekonomikanhon, ug relihiyosong mga sistema nga walay pagtultol sa Diyos.

Unsay resulta? Ang libolibo ka tuig nga kasaysayan sa tawo nagpamatuod kanato nga mas nagkadaghan ang pag-antos. Sa miaging siglo, naagoman sa katawhan ang kinagrabehang pag-antos. Milyonmilyon ang gipamatay panahon sa Holocaust. Kapin sa 100 ka milyon ang nangamatay sa mga gubat. Ang krimen ug kapintasan kaylap. Ang pag-abuso sa droga komon na sa tibuok kalibotan. Ang sakit nga mapasa sa pagpakigsekso nagpadayon sa pagpanakod ug daghang tawo. Tinagpulo ka milyon ang mangamatay tuig-tuig tungod sa kagutom ug sakit. Ang mga pamilya nabungkag ug ang sukdanan sa moralidad sa tawo nagkaubos bisan diin. Walay tawhanong gobyerno ang nakasulbad niining mga problemaha. Walay usa kanila ang nakasanta sa pagkatigulang, sakit, ug kamatayon.

Ang kahimtang sa katawhan nahisama gayod sa gitagna sa Bibliya nga mahitabo sa atong panahon. Gitawag sa Pulong sa Diyos ang atong panahon ingong “ang kataposang mga adlaw” niining sistema sa mga butang diin “moabot ang makuyaw nga mga panahong lisod sagubangon.” Ug sama gayod sa giingon sa Bibliya, ang ‘mga tawong daotan ug mga impostor mosamot pa ka ngil-ad.’​—2 Timoteo 3:1-5, 13.

Hapit Nang Matapos ang Pag-antos

Ang tanang ebidensiya nagpakita nga kita nagkaduol na sa kataposan sa makasubong pag-eksperimento sa tawo sa lainlaing matang sa pagmando nga walay paggiya sa Diyos. Bug-os nga napamatud-an nga ang pagmando sa tawo nga walay pagtultol sa Diyos dili gayod molampos. Ang pagmando lamang sa Diyos ang makapatunghag kalinaw, kalipay, hingpit nga panglawas, ug kinabuhing walay kataposan. Busa ang pagtugot ni Jehova sa pagkadaotan ug pag-antos hapit nang matapos. Sa dili madugay ang Diyos mangilabot sa tawhanong mga kalihokan pinaagi sa paglaglag niining bug-os walay-pulos nga sistema sa mga butang.

Ang tagna sa Bibliya nag-ingon: “Sa mga adlaw nianang mga haria [tawhanong mga pagmando nga naglungtad karon] ang Diyos sa langit magatukod ug usa ka gingharian [sa langit] nga dili gayod malumpag. . . . Kini magadugmok ug magatapos niining tanang gingharian, ug kini mobarog hangtod sa panahong walay tino.” (Daniel 2:44) Ang dugokan sa pagtulon-an sa Bibliya mao ang pagbindikar sa pagkasoberano ni Jehova, ang iyang katungod sa pagmando, pinaagi sa iyang langitnong Gingharian. Sa gitagna ni Jesus ang pangunang bahin sa ilhanan sa “kataposang mga adlaw,” siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”​—Mateo 24:14.

Kon moabot na ang kataposan, kinsay maluwas? Ang Bibliya nagtubag: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta.” (Proverbio 2:21, 22) Ang mga matul-id mao kadtong nakakat-on sa kabubut-on ni Jehova ug nagatuman niini. Si Jesu-Kristo miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, “ang kalibotan nagakahanaw . . . , apan siya nga nagabuhat sa kabubut-on sa Diyos magpabilin hangtod sa kahangtoran.”​—1 Juan 2:17.

Gawas kon gipaila, ang mga kinutlo sa Kasulatan naggikan sa modernog-pinulongang Bag-ong Kalibotang Hubad sa Balaang Kasulatan.