Mga Biktima sa mga Paring Hilig ug mga Bata Nagpadayag
“SULOD sa milabayng dekada, mga 400 ka Romano Katolikong pari gisumbong ngadto sa simbahan o sibil nga mga awtoridad tungod sa seksuwal nga pag-abuso sa mga bata,” sumala sa U.S.News & World Report. Ning bag-o pa, usa ka nasodnong panagtigom sa mga nakaagig abuso gihimo duol sa Chicago, Illinois. Daghan nagsultig dayag kon sa unsang paagi sila gibiktima sa mga paring pedophile o hilig makigsekso sa mga bata.
Apan ang NCR (National Catholic Reporter) miingon nga ang mga mamumulong nagbalikbalik pagpalanog sa laing tema sa tibuok komperensiya: “Ang unang pag-abuso maoy seksuwal; ang ikaduha ug mas masakit, mao ang sikolohikal.” Kining ikaduhang pag-abuso mahitabo sa dihang ang simbahan dili maminaw sa mga biktima sa pag-abuso, mapakyas sa paghatag ug seryosong pagtagad sa ilang mga sumbong, ug molihok lamang aron panalipdan ang nakasalang mga pari. “Makataronganon o dili-makataronganon,” ang taho sa NCR, “ilang gihulagway ang Katolikong klero ingong nahisakop sa dili-maayo ug nahisalaag nga grupo nga labawng nakiling sa pagpreserbar sa pribilehiyo ug gahom kay sa pag-alagad sa mga panginahanglan sa ginsakpan.” Daghang mamumulong ang mihimog mahulgaong mga pagtandi sa Repormasyon, nga bug-os mibahin sa simbahan niadtong ika-16 nga siglo.
Sumala kang Richard Sipe, usa ka pari kanhi nga nahimong sikoterapista ug eksperto sa seksuwal nga pag-abuso sa Katolikong klero, kining tanang institusyonal nga paglimod nagyagyag “sa lalom, walay-paglaom ug may-kasayorang personal nga pagkalangkit sa suliran.” Siya midugang: “Ang simbahan nasayod ug nahibalog maayo sa dugay nang panahon mahitungod sa seksuwal nga kalihokan sa iyang mga pari. Kana tinuyong wala motagad, nagtugot, nagtago, ug yanong naglimod mahitungod sa gidak-on sa seksuwal nga kalihokan sa iyang mga pari.”
Nan, dili ikatingala nga daghang mga nakaagig abuso nagpasakag kaso sa simbahan. Ang NCR mikutlo sa usa ka abogado nga espesyalista sa maong mga kaso nga nag-ingon nga may mga kaso sa pedophile nga pari sa tanang 188 ka dioseses sa simbahan sa Tinipong Bansa. Siya miingon nga ang mga pag-areglo sa mga kaso mikabat ug $300,000 kada kaso. Ang U.S.News & World Report nag-ingon nga ang maong mga kaso nakakostar na sa simbahan ug $400,000,000, usa ka kantidad nga mahimong moabot ngadto sa $1 bilyon sa tuig 2000. Ug ang Canadianhong Prensa nagtaho nga ning bag-o pa mga 2,000 ka nakaagig seksuwal nga pag-abuso sa pagkabata sa 22 ka gidumala-sa-simbahan nga balay sa mga ilo ug mental nga mga institusyon sa Quebec nagakiha sa relihiyosong mga orden alang sa $1.4 bilyong danyos.
Hinuon, makaiikag nga ang gihisgotang abogado sa T.B., nga naghawas sa 150 ka biktima sa pedophile nga mga pari sa 23 ka estado, miingon nga siya wala pa gayod ing usa ka kliyente nga gustong moadtog korte. Ang kada usa sa sinugdan misulay sa pagpangitag hustisya “sulod sa pastoral nga paagi sa simbahan.” Ang NCR mihinapos: “Ang mga nakaagi sa pag-abuso midangop sa mga korte, morag mipakita, dili ingong unang lakang, apan ingong kataposang paagi.”