Mga Batan-on Nangutana . . .

Sa Unsang Paagi Ako Magkinabuhi sa Usa ka Nabahin sa Relihiyon nga Panimalay?

“Lisod sa dihang nagadako kami. Ang akong papa mitamay sa among relihiyon. Adunay away kanunay sa balay.”​—Terry.

IKAW ba nagkinabuhi sa usa ka nabahin sa relihiyon nga panimalay? Kon mao, nahibalo ka unsa ka kimaw ug lisod ang kahimtang. Si Mama ug Papa mahimong matugoton sa ilang isigkatinoohan, apan sa giobserbahan ni S. Sandmel sa iyang libro When a Jew and Christian Marry: “Ang pagtugot sa usa ka tawo sa relihiyon sa iyang paris nagalangkit sa pagmatuto sa kabataan sa maong relihiyon? Ang matuod nga tubag maoy dili.”

Konsideraha, pananglitan, unsay mahitabo kon usa sa imong mga ginikanan usa ka saksi ni Jehova. Ang ginikanan mobatig seryoso nga obligasyon sa pagpadako kanimo “diha sa disiplina ug pagpahamatngon ni Jehova” ug basin adunay mga lig-ong panglantaw mahitungod sa pakigdeyt, moralidad, ug pakig-ambit sa pakusog sa eskuelahan, paggamit sa libreng panahon, ug mga tumong sa kinabuhi. (Efeso 6:4) Ang imong dili-Saksi nga ginikanan, hinuon, mahimong adunay mas libre nga pagpanglantaw niining bahina.

Sa Domingo sa hapon si Mama basin buot nga ikaw mokuyog kaniya sa Kristohanong panagkatigom. Si Papa basin buot nga ikaw mopabilin sa balay uban kaniya ug motan-aw ug ball game sa TV. “Adunay mga panahon nga malooy ko kang papa,” mihinumdom si Doug. “Siya nagapamaligya, busa dili siya namo makauban tibuok semana, dayon sa tapos sa semana, ang pamilya mobiya kaniya kay moadto man sa mga tigom. Usahay, dili ako motambong ug magpabilin ako uban kaniya.”

Si Jesus nagpasidaan nga kining mga panghitabo molungtad. Siya miingon: “Kay mianhi ako sa pagpahimutang sa tawo aron makigbingkil siya batok sa iyang amahan, ug sa anak nga babaye batok sa iyang inahan, ug sa binalaye batok sa iyang ugangang babaye. Sa pagkatinuod, ang mga kaaway sa usa ka tawo anaa ra sa iyang kaugalingong panimalay.” (Mateo 10:35, 36) Dili nga gituyo ni Jesus ang pagbahin sa mga panimalay, apan nahibalo siya nga motungha ang mga problema sa dihang ang ubang membro sa pamilya modawat sa matuod nga pagsimba ug ang uban dili. Ang pangutana mao: Unsa man gayud ang imong himoon kon ikaw anaa sa maong situwasyon?

Mga Lit-ag nga Angay Likayan

Una sa tanan, amgohi nga ang tumong maoy pagpahimuot, dili lamang usa sa imong mga ginikanan, apan ang Diyos mismo! Siya ang mimando sa “pagsimba diha sa espiritu ug kamatuoran.” (Juan 4:24) Apan sa paghimo niana sa usa ka nabahin sa relihiyon nga panimalay, adunay mga lit-ag nga angay likayan.

Pagkompromiso​—Usa ka tin-edyer nga lalake kansang mga ginikanan nagdiborsiyo miingon kabahin sa pagbisita sa iyang dili magtotoo nga amahan: “Iyang sulayan nga ako mobatok sa kamatuoran ug sa Diyos.” Mohimo siya niini pinaagi sa pagpit-os sa iyang anak nga mopakig-ambit sa dili-kristohanong mga selebrasyon. “Kini mopahimo kanakong dili komportable,” ang tin-edyer nag-ingon. Apan si Jesus mipahinumdom kanato: “Siya nga adunay mas labaw nga paghigugma sa amahan o inahan kay kanako dili takos kanako.” (Mateo 10:37) Busa barog nga malig-on sa unsay imong gitoohan! Kon dili igo ang ugdang nga pagbalibad gikan sa usa ka wala nahiangay nga buhat, uban sa kalumo apan malig-on nga ipahibalo sa imong ginikanan nga ikaw modumili sa pagkompromiso. Sa dihang makita sa imong ginikanan ang imong dili mabangbang nga determinasyon, ang pagpit-os mahimong hinayhinay nga momenos.

Hinuon, adunay panginahanglan sa pagkabalanse. Ang Filipos 4:5 nagaingon: “Tugoti nga ang imong pagkamakataronganon mailhan sa tanang tawo.” Ang pagkamakataronganon nagalangkit sa pagkamatugoton, maayon-ayonon. Basin maareglo nimo nga makahatag kag dako-dakong panahon sa imong dili-magtotoo nga ginikanan kon gibati niyang siya napasagdan. Hinumdomi, usab, nga ikaw adunay obligasyon sa imong mga ginikanan.​—Efeso 6:1.

Mahimong ‘ang tigpataliwala’​—Tungod sa wala nagiyahan nga pagpakita ug pagkamaangayon, ikaw basin matintal sa pagdapig kang Mama sa relihiyosong mga butang tungod lamang kay ang imong igsoong lalake midapig sa imong Papa​—o sa katugbang. Apan kana ba usa ka lig-on nga basehanan sa pagpili sa unsang paagi simbahon ang Diyos? Unsa na man kon ang relihiyosong mga pagpanglantaw ni Mama bakak, dili kasulatanhon? “Palita ang kamatuoran ug ayaw kini pag-ibaligya,” mitambag ang Proverbio 23:23.

Sunda ang pangulo​—Basin mas suod ka sa usa ka mas magulang nga igsoong lalake o babaye kay sa bisan hain nga ginikanan. Busa basin ikaw makiling sa pagsunod sa bisan haing relihiyon nga ilang ginasudlan. “Mao kana ang akong gibati, gikan sa usa ka dako nga pamilya,” nagaingon si Roberto. Busa siya naluya sa espirituwal sa dihang ang iyang magulang nga lalake misalikway sa tinuod nga pagsimba sa bug-os ug mibiya sa balay. “Kadto makaluya kaayo,” siya miangkon. Bisan kon unsa ka kasuod sa usa ka igsoon, dili ba kana binuang gayud nga tugotan nga kana mopahilayo nimo sa Diyos?

‘Pagbahin ug pagdaog’​—“Sa dihang ako mga 19, ang akong papa nagsugod sa pag-awhag kanako nga makigdeyt,” mihinumdom si Doug. “Si Mama, kinsa usa ka bawtimasdong Kristohanon, supak gayud niana. Dayon nakita na lang nako nga ako nagadapig kang Papa, bisan nga sa sulod nako nahibalo akong husto si Mama.” Sa dihang ang mga ginikanan nagkalahig moral nga mga sukdanan, adunay mga higayon nga ang usa magdapig sa usa ka ginikanan kay sa usa. Mahimong makatintal nga mosuod ka sa mas matugoton nga ginikanan.

Ang pagpalabi ug ginikanan kay sa usa, hinuon, mas mohatag ug bingkil diha sa pamilya. Ug ang pagbaton ug permiso sa pagbuhat ug usa ka butang nga imong nahibaloang dili maalamon o sayop wala naghatag ug katarungan sa mata sa Diyos. “Kon ang usa nahibalo unsa ang matarong apan wala nagahimo niana, kana usa ka sala alang kaniya.” (Santiago 4:17) Inay sa pagmaniobra nga ang ginikanan mohatag kanimo sa dakong kagawasan, nganong dili sulayan sa pagsunod sa ginikanan nga mogiya kanimo sa “dalan sa kinabuhi”?​—Proverbio 6:23.

Paghimo sa Imong Relihiyosong Pagpili

Hinuon, pipila ka mga batan-on mahimong sa tim-os malibog kon kinsang ginikanana kana. Sa unsang paagi ikaw modesidir? Ang Bibliya nagasulti kanato sa usa ka batan-ong lalake ginganlang Timoteo kinsa midako sa usa ka nabahin sa relihiyon nga panimalay siya gihubit ingong “anak nga lalake sa usa ka magtotoo nga Hudiyong babaye apan sa usa ka Gregong amahan.” (Buhat 16:1) Usahay basin si Timoteo mibati kon asa gayud siya sa iyang ginikanan. Apan, siya misunod sa relihiyosong pagtoo sa iyang inahan ug nahimong kauban sa biyahe ni apostol Pablo. (Buhat 16:2, 3) Kini ba usa ka kaso nga siya labaw ug paghigugma sa iyang inahan kay sa iyang amahan? Dili gayud.

Ang apostol Pablo misulat kang Timoteo: “Ikaw, hinuon, padayon sa mga butang nga imong nakat-onan ug naawhag sa pagtoo, sa pagkahibalo kang kinsa nimo kini nahibaloan ug nga sukad sa pagkabata ikaw nahibalo na sa balaang mga sinulat, nga napahimo nimong maalamon alang sa kaluwasan pinaagi sa pagtuo maylabot kang Kristo Jesus.” (2 Timoteo 3:14, 15) Gikan niini kita makapahinapos nga si Timoteo mihimo sa iyang pagpili pinasukad sa usa ka seryoso nga pagtuon sa Pulong sa Diyos! Siya “naawhag,” kombinsido, sa pagtuo niana.

Inay sa paghimo ug piniliay pinasukad sa sentimiento o emosyon, susiha ang pagtuo sa imong ginikanan binase sa “balaang mga sinulat.”a Sa kataposan ikaw, dili si Mama ug Papa, maoy responsable sa pagpanlimbasog sa imong kaluwasan!​—Filipos 2:12.

Pagdaog sa Imong Dili-Magtotoong Ginikanan

Human sa pagpasulod sa imong kasingkasing sa pagsunod sa matuod nga relihiyon, nan, sa unsa man, nga ikaw angay nga molantaw sa imong dili-magtotoong ginikanan? Ang apostol pablo miawhag sa mga Kristohanon sa pagsulay sa pagdaog sa ilang dili-magtotoong mga kapikas: “Hunahunaa kini: ingong asawa ikaw mahimong kaluwasan sa imong bana; ingong bana mahimong ikaw ang kaluwasan sa imong asawa.” (1 Corinto 7:12-16, The New English Bible) Kini dili ba, sa prinsipyo, moaplikar sa kabataan sa mga dili-magtotoo?

Ang imong ligdong nga pamatasan ug lalom nga pagtahod sa imong ginikanan dakog mahimo sa usa nga makabaton sa maayong impresyon sa matuod nga Kristiyanidad. (Itandi 1 Pedro 3:1, 2.) Hinumdomi, usab, nga ang pagbarog alang sa kamatuoran wala nagkahulogan nga ikaw supak sa dili-magtotoong ginikanan. Tinuod, pinaagi sa pagpadayong maluluton, masundanon, ug kooperatibo, ikaw makasalig sa usa sa imong padayon nga gugma.

Adunay “panahon sa paghilom ug sa pagsulti.” (Ecclesiastes 3:7) Kon adunay higayon nga makahisgot ka mahitungod sa imong pagtuo uban sa imong ginikanan, nan pahimusli kini! “Ayaw ihikaw ang kaayohan gikan kanila nga nanginahanglan,” ang Proverbio 3:27 nagapahinumdom kanato. Apan mahimong maluluton, ugdang. Likayi ang pagpaubos sa usa ka ginikanan kay mas nahibalo ka sa Bibliya. Kinsay nahibalo, basin nga ang imong paningkamot mamunga. “Ang akong Papa supak kaayo sa daghang katuigan,” mihinumdom si Jay. “Maorag dili gayud siya mausob, apan amo ra gayud siyang nadala.” Sa dihang namatay ang amahan ni Jay mga pipila ka tuig ang nangagi, siya nagaalagad ingong Kristohanong ansiano.

Kon walay nagsingabot nga sanong, hinumdomi ang mga pulong ni Dabid sa Salmo 27:10: “Kon motalikod man ang akong akong kaugalingong amahan ug ang akong kaugalingong inahan, si Jehova mismo ang moagak kanako.” Ikaw aduna usab ing suportar sa maunongong mga higala sulod sa Kristohanong kongregasyon, kinsa ‘magatapot suod pa kay sa usa ka igsoon.’ (Proverbio 18:24) Uban sa ilang tabang ug ang tabang sa imong magtotoong ginikanan, ikaw malig-ong makabarog sa kamatuoran.

[Footnote]

[Hulagway sa panid 23]

Ang pagpalabi sa usa ka ginikanan kay sa usa basin makapahimo nimo nga makuha ang imong gusto, apan sa dili madugay, kini moresulta ug panagbingkil