Mga Batan-on Nangutana . . .

Unsay Ikasulti Bahin sa mga Naytklab?

“GIKINAHANGLAN namo ang diyutay nga kalingawan.” “Moadto kami aron lang mosayaw.” “Ang tanan nagaadto.” “Buot ra namong malingaw.” Ang ubay-ubayng batan-on misaysay sa maong paagi ngadto sa usa ka reporter sa Pagmata! kon nganong sige silag adto sa mga naytklab. Ang maong mga dapit sa kalingawan popular kaayo sa daghang batan-on, ug kon anaa kana sila diha sa inyong komunidad, basin nakapalandong ka nga moadto mismo.

Karong adlawa, gihugopan sa daghang batan-on ang mosunod nga mga matang sa mga klab, sumala sa pagbatbat sa magasing Friday: “Ang panahon sa parti maoy bisan unsang panahon ug ang bisan unsang panahon maoy karong gabii. Alang sa mga mapatuyangon, ang parti wala gayoy hunong. Ang kaikag sa pagsayaw lapnag sa siyudad diha sa nagbahang mabugnaw nga mga ilimnon, nangidlap nga mga sugang dagitabnon ug makapaiktin nga musika nga dili magpalingkod kanimo. ‘Ang mga klab karon may nabatonan nga maangayan sa tanan. . . . Adunay mga klab nga magpahimuot sa mga batan-ong propesyonal, sa mga estudyante sa kolehiyo, sa mga bayot ug sa mga gulanggulang.’”

Alang sa mga maarte, adunay mga klab nga magbaod sa mahal kaayong pulta, mahalon nga biste, ug bisan sa hustong sumbanan sa kagawian aron makasulod. Alang sa dili kaayo dato, adunay mga klab nga may dili kaayo maluhong palibot nga motanyag sa palibot sa parti nga mas barato. Ug alang sa mga batan-on nga bata pa kaayo (o dili pa kaayo malansison) sa pagsulod sa mga klab sa hamtong, adunay “juice clubs” ug “soda bars,” nga giingong walay isog nga ilimnon.

Dili lisod sabton nganong ang mga naytklab makapadani kaayo sa daghang batan-on. Kon bata ka pa, ang pagkagustog lipaylipay maoy kinaiyanhon. (Itandi ang Ecclesiastes 11:9.) Ang usa ka gabii nga pagsayaw tingali mopatim-awng makapahimsog nga paagi sa paghanaw sa mga tensiyon sa eskuylahan ug sa trabaho. Apan unsa ka maayo ang mga naytklab?

Si Sonya, usa ka batan-ong babaye nga sigeg adto sa mga naytklab, miangkon: “Ang ideya maorag dili makadaot. Ikaw mosayaw lamang ug maglipaylipay. Apan kasagarang mosangpot kini sa labaw pa niana. Mosugod ka sa pag-adto sa mga gabii sa dihang ang musika ug ang panon pinakabibo. Sa dili madugay mailhan nimo ang mga regular nga tig-adtoan, ug ikaw usab mahimong regular. Ang ideya mao ang pagsayaw​—ug may mahimamat. Ug kon kaha kana ang imong tumong o dili, kini mao sa kanunay ang ilaha.” Nagpasobra ba si Sonya?

Mga Naytklab Karong Adlawa

Ang diskohanan sa napulo ka tuig nga miagi gidungog nga sanayanan sa imoralidad sa sekso, pag-abusar sa droga, ug bisan sa homoseksuwalidad.a Ug ang kausaban sa kahimtang sukad niadto maoy gamay ra. Bisan tuod ang musika (sa Tinipong Bansa, kini sagad gitawag house music o yanong dance music) ug ang mga tikang sa sayaw nausob, ang palibot diha sa daghang naytklab maoy makalilisang nga pahinumdom sa imoral nga kahimtang sa diskohanan.

Sa usa ka artikulo diha sa magasing Life bahin sa house music o musika sa balay, usa ka mahiligon ug naytklab miingon: “Ang musika para sa sayaw sa labing pasukaranan kanunayng may tribonhong pagbati​—nagaasod nga kompas ug erotikong basal, nga moganoy hangtod nga ang kadaghanan mahupong sa usa ka matang sa kasadya. May butang nakulang diha sa mga lasangnong siyudad, ug ang musika sa balay motagana sa kahaw-ang sa nagaasod nga kompas.” Ang disc jockey sa New York si David Piccioni miingon: “Ang tumong mao nga mahikalimtan nimo ang imong kaugalingon sa tibuok nga gabii.”

Tungod sa bag-ong gikabuangan nga mga sayaw sama sa imoral nga lambada, ang magasing Mademoiselle mipahayag: “Sekso: Kini nahigawas na sa mga banyo ug nahibalik sa dapit nga angay niini​—diha sa salog sayawanan. Sa karaang mga adlaw (ang katuigang 1970), ang salog sayawanan maoy alang sa karinyohay ug ang mga banyo maoy alang sa sekso ug mga droga. Karon nga ang tanan nabalaka bahin sa AIDS, ang mga banyo maoy alang sa pagpangarya ug ang salog sayawanan mao ang dapit diin tan-awon nimo ang ubang mga tawo nga nakigsekso. O magpakaaron-ingnong nakigsekso.” Oo, ang musika magamit sa pagmugna sa tinamdan nga magwagtang sa moral nga mga pagpugong ug mopagimok sa seksuwalidad.

Pakighimamat Kang Kinsa?

Ang pila ka klab nailhan usab nga mga dapit sa pakighimamat sa kaatbang nga sekso. Ugaling, unsang matanga sa mga tawo ang imo tingaling mahimamat? Usa ka dalaga nga kaniadto tiglibot sa mga naytklab miangkon: “Daghang tawo dinha ang may imoral nga mga kinabuhi ug interesado nga makigsekso. Kon maibog nimo, ila kang palitan ug ilimnon, ilimnon, ilimnon ug makigduol kanimo sa tibuok gabii nga magasultig nindot, tam-is nga mga butang sa paglaom nga ikaw mosugot sa ilang gusto.”

Ang pila ka dapit gilaraw gani sa paghatag lugar sa maong imoral nga kalihokan. Si Doris, usa ka batan-ong babaye nga regular usab nga tig-adto sa mga naytklab, miingon: “Adunay mga klab nga may mga dapit-pahulayan nga may mga sopa ug mga lingkoran sa managtrato diin adtoan sa daghan aron maghalok ug maghikapanay. Daghang minyo nga mga lalaki ang tua didto nga dili kauban ang ilang mga asawa. Ang pipila tua didto nga maglaom nga may mahibalag alang sa usa ka gabii sa pakigsekso o pakigromansa, ug ang uban mangitag usa ka kapikas.” Mihinapos si Doris: “Ang palibot diha sa mga naytklab makadaldal kaayo sa imoralidad. Ang alkohol giinom nga dinaghan hangtod sa mga takna sa kabuntagon, ug puwede ang bisan unsa.”

Ang naytklab gilangkit usab sa kusog nga paggamit ug droga. Usa ka tag-iyag klab gitahong miingon: “Ang kalihokan . . . bug-os nalangkit sa mga droga.” Ang mga droga ug alkohol kasagarang makaplagan bisan diha sa giingong walay-alkohol nga mga juice bar. Si Jesse, laing kanhi regular nga tig-adtoan sa mga naytklab, midugang: “Ang aso sa marijuana ug sigarilyo kasagarang magpuno sa kahanginan. Ang kadaghanang tawo didto nagabiste sa paaging makapagimok sa unod: huot ug seksi nga biste, mahilas nga mga estilo, hingaping alahas.”

Magmabinantayon Pag-ayo

Sukad sa karaang panahon, ang musika ug sayaw gigamit sa paghaylo sa mga tawo ngadto sa daotang gawi. Pananglitan, atong mabasa nga ang mga Israelinhon kas-a “nanglingkod aron sa pagkaon ug pag-inom. Dayon sila nanindog aron maglipaylipay.” Kadto naglangkit sa linuog nga musika ug patuyang nga pagsayaw. Bisan pa niana, kadtong “paglipaylipay” mao ang pasiuna sa grabeng idolatriya ug walay-pugong nga malaw-ayng kagawian.​—Exodo 32:6, 17-19, 28.

Ang Kristohanong mga batan-on sa ingon angay maglikay nga masulod sa kahimtang nga daling mahimong ‘hudyaka-bahakhak,’ o ‘mapatuyangon nga parti.’ (Galacia 5:19, 21; Byington) Ang 1 Corinto 15:33 nagpahinumdom kanato: “Ayaw kamo pagpalimbong. Ang daotang mga panagkauban makadaot sa mapuslanong mga batasan.” Ang usa ka tawo makabuylog ba diha sa usa ka parti uban sa mga tawo nga “anaa sa kangitngit sa kaisipan, ug nahibulag sa kinabuhi nga iya sa Diyos” ug dili madaot? (Efeso 4:18) Ug sumala sa giangkon sa usa ka batan-ong babaye: “Ang pakigsandurot ug panaghigala mahimong maugmad ug kasagarang maugmad [uban sa ubang regular nga tig-adtoan].” Sa unsang paagi kini mag-apektar sa imong espirituwalidad?

Bisan pa niana, ang pila tingali mangatarongan nga ang tubag mao ang pagpakuyog sa usa ka grupo sa isigka-Kristohanon. Bisan pa niana, ang pagkamatarong mahimong molambo lamang diha sa Kristohanong palibot. (Santiago 3:18) Ug ang palibot diha sa daghang naytklab gilaraw sa pagpukaw sa mga pagbati nga “yutan-on, mananapon, demonyohanon,” inay kay espirituwal.​—Santiago 3:15.

Itugot nato, dili tanang naytklab ang nagahimo sa hingaping mga buhat nga gihisgotan dinhi, ni makataronganon ang pagsaway sa tanang restawran nga may sayaw o kalingawan. Apan si Pablo nagtambag nga “tinoon kon unsay dalawaton sa Ginoo.” (Efeso 5:10) Ug kon ikaw gidapit sa usa ka dapit nga may wala-hisayri o kuwestiyonableng dungog, angay nga magmabinantayon pag-ayo kon bahin sa pagdawat sa imbitasyon.​—Proverbio 14:15.

Ikaw makasukna sa imong kaugalingon sa mga pangutana sama sa: Kinsay nagaanha, ug unsang matang sa dungog ang naangkon niini? Unsay nasayran sa imong mga ginikanan o ubang kasaligang mga hamtong bahin sa dapit mismo? Unsang matang sa palibot ang nabatonan niini? Unsang matang sa mga tawo ang tig-adtoan? Nagaalagad ba lang kini sa mga batan-on? Kon mao, unsay purohan nga kini dunay maayong palibot? Kon may kalingawan, unsa ba ang maong kalingawan? Unsang matanga sa musika ang tugtogon niini? Usa ba kini ka dapit nga motugot sa mga parokyano nga kapin kun kulang maglain sa ilang kaugalingon, o sosyal ba kini nga esena nga makapugos tingali nimo sa pagpakigbuylog sa uban?

Si Doris, nga gikutlo ganina, miangkon: “Gihimo ni Satanas nga ang mga naytklab mopatim-awng makaikag, makapaukyab, madanihon, makalingaw​—bisan unsay kinahanglanon sa paghaylo kanato.” Apan ayaw pagpalimbong sa pangidlap sa mga naytklab! Sila napamatud-ang makapatayng lit-ag alang sa daghang batan-on. Pangitag dalawaton, mapuslanong mga paagi sa paglingaw sa imong kaugalingon.b

[Mga footnote]

[Hulagway sa panid 16]

Daghan nga sigeg adto sa mga naytklab labawng interesado sa imoral nga sekso kay sa kalingawan