Gikan sa Among mga Magbabasa
Pagdawat sa Pagsaway Sayo pa niining adlawa ako nakadawat ug pipila ka pagsaway sa proyektong akong gihimo sa daghang mga semana. Bisag ang pagsaway makaayo, ang akong superbisor maharuson. Ako naglagot kaayo. Sa mipauli ako sa balay, gibasa ko ang artikulong “Dili Ka ba Gustong Sawayon?” (Pebrero 8, 1991) Pagaingnon pa, kini nakapausab sa tibuok kong panlantaw.
D. B., Tinipong Bansa
Ang artikulo tinuod gayod nga makatabang. Kay gisaway ako sa dili pa dugay, gibati ko ang kaguol ug nadaog sa kasubo. Bisan pa niana, pinaagi sa kanunayng pagbasa sa artikulo, natabangan ako nga mabuntog ang akong suliran.
N. O., Hapon
Pag-inom ug Pagmaneho Ako natandog pag-ayo sa mga artikulong “Pag-inom ug Pagmaneho—Makapatayng Panag-uban.” (Pebrero 8, 1991) Ang akong gamay nuybe-meses nga igsoong babaye namatay tungod sa aksidente sa kotse sa miaging 31 na ka tuig. Ako nagbangotan gihapon tungod kaniya. Ang usa ka hubog nga drayber mibangga sa among kotse. Ako makakita gihapon sa akong inahan nga nabulit sa dugo ug ang akong gamay nga igsoong babaye nahilukapang patay sa iyang lingkoranan. Ako nalipay nga may paglaom sa pagkabanhaw, apan ako tim-os nga naglaom nga ang artikulo mopahinabo sa kadaghanan nga mamalandong pag-usab kon sila angay bang moinom ug magmaneho.
K. N., Tinipong Bansa
Ako 16 anyos ang panuigon. Ang artikulong “Mga Biktima Miatubang sa mga Tagsala” naundan sa makapatandog kaayong mga kasinatian ug nagpahilak kanako. Gibati ko gayod nga kining artikuloha motabang sa daghang mga batan-on sama kanako nga padayong hunahunaon ang uban ug mag-amping sa paggamit ug alkohol.
R. H., Alemanya
Pag-atiman sa mga Tigulang Ang artikulong “Pag-atiman sa mga Tigulang—Usa ka Nagatubong Suliran” (Marso 22, 1991) mihatag nako ug dakong kadasig. Ang akong 86-anyos nga amahan karon nag-antos sa sakit nga Alzheimer, ug buot kong atimanon siya sa balay inay kay sa ospital. Samtang migrabe ang iyang kahimtang, ang kalisod ug kabug-at sa hunahuna lakip ang pag-atiman kaniya nag-uswag. Nakaabot ako sa punto nga mibating bug-os nga walay paglaom! Apan unya akong gibasa ang inyong mga artikulo. Kay dulot nga gilipay, ang mga luha midaligdig sa akong mga mata. Daghan pa, dugang pang mga suliran ug mga kalisod ang anaa sa unahan, apan ang akong hukom nga moatiman sa akong amahan hangtod gayod sa kataposan nakadawat ug malig-ong pagpaluyo.
T. H., Hapon
Mexico City Nakaplagan ko ang artikulong “Mexico City—Usa ka Nagtubong Dako Kaayong Mananap?” (Enero 8, 1991) nga sayop. Inyong giingon nga ang pagbatog dakong pamilya maoy usa ka panulondon sa kultura. Apan, kining butanga nahitabo lamang diha sa pipila ka mga bahin sa nasod—dili sa Mexico City.
S. C., Mexico
Gikasubo namo kon ang artikulo mipahinabog pipila ka kalibog. Apan, ang pahayag gihimo nga gipunting ang Mexico ingong tibuok, dili lamang sa Mexico City.—ED.
Mga Naytklab Ingong instruktor sa musika ug sayaw, ako gihasol sa inyong artikulong “Mga Batan-on Nangutana . . . Unsay Ikasulti Bahin sa mga Naytklab?” (Pebrero 8, 1991) Walay daotan sa musika ug sayaw. Apan ang inyong artikulo nag-ingon nga ang musika ug sayaw gigamit sa pagdaldal sa mga tawo ngadto sa dili maayong paggawi. Ako dili mouyon. Ang inyong artikulo magpasarado lamang sa mga hunahuna sa mga tawo ngadto sa maong mga arte.
B. M., Tinipong Bansa
Wala namo sawaya ang tanang matang sa musika ug sayaw. Bisan pa niana, ang makadaldal nga musika ug sensuwal nga sayaw nagdulag papel sa pagpahisalaag sa katawhan sa Diyos sa kapanahonan sa Bibliya. (Itandi ang Exodo 32:6, 17-19.) Busa tukmang pasidan-an ang mga batan-on mahitungod sa pipila ka mga paghingapin nga ginabuhat karong adlawa.—ED.