Usa ka Suliran sa Katolikong Iglesya

“USA KA BAG-ONG PENTEKOSTES.” Mao kana ang paglaom nga gipahayag ni Papa Juan XXIII alang sa ekumenikanhong konsilyo nga nagsugod sa 1962 ug nailhang Vatican II. Siya naglaom nga kini mahimong kasangkapan sa espirituwal nga pagbag-o taliwala sa mga Katoliko ug nga kini mohatag ug mga kausaban nga moiway sa dalan alang sa paghiusa pag-usab sa Kakristiyanohan.

Apan ang maong mga ideya sa aggiornamento (ang pagpabag-o) wala uyoni sa tanang mga obispo sa Batikano. Ang The New Encyclopœdia Britannica nagtaho: “Ang desisyon sa Papa, sa ingon, bugnaw nga gidawat sa iyang konserbatibong Curia, kinsa kombinsidong ang iglesya miuswag ilalom sa pagpanguna ni Pio XII ug walay nakitang maayong rason sa mga kausabang gipanan-aw ni Juan. Ang ubang mga kardinal sa Batikano gani mihimo kutob sa maarangan sa ilang gahom sa paglangan sa konsilyo hangtod ang tigulang mawala na sa eksena ug ang proyekto hilom nga gihiklin.”

Pamalaod sa Vatican II Mahitungod sa Ekumenismo

Si Papa Juan XXIII buhi pa nga nakita ang Second Vatican Council nga nagaobra, apan siya namatay sa wala madugay, sa Hunyo 1963, sa wala pa ang konsilyo matapos sa Disyembre 1965. Apan, ang Pamalaod sa Ekumenismo gibutyag ni Papa Paulo VI sa Nobyembre 21, 1964. Kini mibatbat sa iyang introduksiyon: “Ang pagpasig-uli sa panaghiusa taliwala sa tanang Kristohanon mao ang pangunang kabalaka sa Second Vatican Council.”

Sa kahinungdanon, ang Heswita nga pari si Walter M. Abbott misulat diha sa The Documents of Vatican II: “Ang Pamalaod sa Ekumenismo nagatimaan sa bug-os nga pagsulod sa Romano Katolikong Iglesya sa ekumenikanhong kalihokan.” Ug sa susamang punto, ilalom sa ulohang “Romano Katolisismo nagsunod sa ikaduhang Konsilyo sa Batikano,” The New Encylopœdia Britannica nagaingon sa pagkapositibo: “Ang Romano Katolikong Iglesya sa opisyal mibiya sa iyang ‘bugtong matuod nga iglesya’ nga baroganan.”

Apan tinuod bang gibiyaan sa Katolikong Iglesya ang maong baroganan? Sa unsang mga kahimtang nga ang panaghiusa makab-ot? Human sa paglatid sa sukod nga makabahin ang mga Katoliko sa ekumenikanhong kalihokan, ang Pamalaod sa Ekumenismo mibatbat: “Kining balaang konsilyo nagaawhag sa mga matinumanon sa paglikay sa bisan unsang walay kapuslanan o dili-mabuot nga kasibot. . . . Ang ilang ekumenikanhong kalihokan kinahanglang bug-os o sinsero nga Katoliko, nga mao, matinumanon sa kamatuoran nga among nadawat gikan sa mga Apostoles ug sa mga Amahan, ug nahiuyon sa pagtuo nga gipangangkon sa Katolikong Iglesya.”

Mga Babag sa Panaghiusa

Ang kamatuoran mao, ang Romano Katolikong Iglesya wala mobiya sa iyang baroganan nga mao ang bugtong matuod nga iglesya. Ang Vatican II nga Pamalaod sa Ekumenismo mipahayag: “Pinaagi lamang sa kang Kristo nga Katolikong Iglesya, nga mao ang unibersohanong tabang ngadto sa kaluwasan, nga ang pagkabug-os sa paagi sa kaluwasan makab-ot. Kami nagtuo nga pinaagi lamang sa pundok sa mga apostoles, nga diin si Pedro mao ang ulo, ang gitugyanan sa Atong Ginoo sa tanang panalangin sa Bag-ong Pakigtugon.”

Ang bag-ong Pranses nga basahong Théo​—Nouvelle Encyclopédie Catholique (1989) mibatbat: “Alang sa mga Katoliko, ang papa, ingong manununod ni Pedro, sa teolohikanhong pagkasulti mao ang permanenteng elemento sa panaghiusa sa Iglesya ug sa mga obispo. Ang tin-aw nga kamatuoran, hinunoa, mao nga ang papa mao ang pangunang hinungdan sa panagbahinbahin sa mga Kristohanon.”

Kining nakapabahing doktrina sa pagkalabaw sa papa suod nga nalangkit sa mga doktrina sa pagkadili-masayop sa papa ug sa apostolikanhong kagikan sa mga Katolikong obispo, diin kining mga doktrinaha dili madawat sa kadaghanang dili-Katolikong mga iglesya sa Kakristiyanohan. Ang Vatican II ba mihimo ug paagi sa pag-usob sa baroganan sa Iglesya bahin niining mga doktrinaha?

Ang Vatican II Dogmatic Constitution on the Church mitubag, diha sa parapo 18: “Kining maong sagradong katigoman, nga nagasunod sa First Vatican Council [nga nagsugo sa pagtulon-an sa pagkadili-masayop sa papa], nagatudlo ug nagadeklarar nga si Jesu-Kristo, ang walay kataposang pastor, maoy nagtukod sa balaang Iglesya pinaagi sa paghatag sa mga apostoles ug buluhaton nga siya mismo usab gipadala sa Amahan (cf. Jn. 20:21). Siya nagsugo nga ang ilang mga manununod, ilabina ang mga obispo, kinahanglan mao ang mga magbalantay sa iyang Iglesya hangtod sa kataposan sa kalibotan. Aron ang mga obispo, hinuon, mahimong usa ug dili magkabahinbahin iyang gibutang si Pedro nga pangulo sa uban pang mga apostoles, ug diha kaniya siya nagtukod ug usa ka dumalayon ug makitang tuboran ug haligi sa panaghiusa sa pagtuo ug sa pag-ambitay. Kining pagtulon-ana maylabot sa institusyon, sa pagkadumalayon, sa paagi ug kahinungdanon sa pagkabalaan sa pagpanguna sa Romanong Papa ug ang iyang pagkadili-masayop nga pagtulon-an sa katungdanan, ang sagradong katigoman naglaraw pag-usab nga kinahanglang lig-ong tuohan sa tanang mga matinumanon, ug, magpadayon nga dili-mosimang sa maong tumong, kini naglaraw sa pagwali sa katilingban ug sa pagpatin-aw sa doktrina mahitungod sa mga obispo, sa mga manununod sa mga apostoles, kinsa uban sa manununod ni Pedro, ang Kapuli ni Kristo ug ang makitang ulo sa tibuok Iglesya, magapanguna sa balay sa buhi nga Diyos.”

Sa kahinungdanon, kining Dogmatic Constitution on the Church gibutyag ni Papa Paulo VI sa mismong adlaw sa iyang pagpirma sa Pamalaod sa Ekumenismo. Ug nianang mismong adlawa sa Nobyembre 23, 1964, siya mihimo ug pagpahayag nga nagaproklamar kang “Maria ‘Inahan sa Iglesya,’ nga mao, sa tanang matinumanon ug sa tanang mga pastor.” Sa unsang paagi maangkon nga ang Pamalaod sa Ekumenismo ‘nagatimaan sa bug-os nga pagsulod sa Romano Katolikong Iglesya diha sa ekumenikanhong kalihokan’ sanglit ang papa mipili nianang mismong adlaw nga kini gipatik sa paglig-on pag-usab sa mga doktrina nga dili gayod madawat sa kadaghanang mga membro sa WCC (World Council of Churches)?

Ang Suliran sa Iglesya

Si Dr. Samuel McCrea Cavert, kanhing sekretaryo heneral sa National Council of Churches, nga dako ug bahin sa pagkaporma sa World Council of Churches, mibatbat: “Ang Pamalaod [sa Ekumenismo] wala gayod mahauyon sa iyang ekumenikanhong panglantaw sa iyang pangangkon nga ang Romano Katoliko mao lamang ang bugtong matuod nga Iglesya. Nalangkit niini mao ang dugang nga pangangkon sa pagkalabaw ni Pedro ug sa iyang gahom sa tibuok Iglesya. Kining mga pangangkona daw nagapakita nga ang Romano Katolikong pagsabot sa ekumenismo sa tino nahasentro sa Roma.”

Si Dr. Konrad Raiser, katabang nga sekretaryo-heneral sa WCC, mideklarar: “Ang papa [Juan Paulo II] naghimog daghang ekumenikanhong mga deklarasyon, apan siya dinasig sa usa ka misyon nga nagadala kaniya sa laing direksiyon.”

Kining tin-aw nga panagsumpaki taliwala sa gipakitang posisyon sa ekumenismo sa Batikano ug sa iyang lig-ong pagtapot sa iyang kaugalingong tradisyonal nga mga ideya nagapakita lamang nga ang Iglesya sa Roma natunga sa makalibog nga situwasyon. Kon kini sinsero mahitungod sa iyang pag-apil sa ekumenikanhong kalihokan alang sa Kristohanong panaghiusa, kinahanglang mobiya kini sa iyang pangangkon nga mao ang bugtong matuod nga iglesya. Kon kini modumili sa pagbiya niining maong pangangkon, kinahanglang modawat siya nga kining ginatawag nga ekumenismo maoy usa lamang ka mataktikanhong lihok sa pagdani sa Ortodokso ug Protestanteng mga iglesya balik sa pundok sa Katoliko.

Sa prangkang pagkasulti, admitihon na lamang sa Katolikong Iglesya nga ang iyang kasiglohang mga pangangkon maoy bakak ug ang iyang presenteng pag-apil sa ekumenikanhong kalihokan maoy tuman nga pagminaot. Bisan hain niini, daghang sinserong mga membro sa iglesya sa Kakristiyanohan nalibog. Sila nalibog kon ang Kristohanong panaghiusa makab-ot ba gayod.

[Blurb sa panid 8]

‘Ang Pamalaod sa Ekumenismo nagatimaan sa bug-os nga pagsulod sa Romano Katolikong Iglesya sa ekumenikanhong kalihokan.’

[Hulagway sa panid 7]

Gibutang sa Vatican II ang Katolikong Iglesya diha sa makalibog nga situwasyon

[Credit Line]

UPI/Bettmann Newsphotos