Gikan sa Among mga Magbabasa
Narcolepsy Trayente ka tuig kanhi ako nahiling sa doktor nga dunay narcolepsy. Sa tibuok nakong kinabuhi nagkinabuhi ako uban sa mga problema tungod sa pagkatulog sa dili hustong panahon. Tungod kay makatulog ako sa Kristohanong mga tigom, ang uban nagtuo nga wala kaayo akoy apresasyon sa espirituwal nga mga butang. Ang mga paningkamot sa pagpatin-aw sa akong situwasyon wala magpulos. Busa, salamat sa inyong maayong artikulo (Abril 8, 1991) mahitungod sa katingalahang sakit sa pagkatulog.
R. N., Alemanya
Tahora ang mga Tigulang Salamat sa inyong mga artikulong “Ikaw ba Nagatahod sa mga Tigulang? (Marso 22, 1991) Human sa 40 ka tuig nga matinumanong pag-alagad sa Diyos, ang akong inahan nagkinahanglag bug-os panahong pag-atiman tungod sa sakit nga Alzheimer. Ang kalendaryo nga gipatik sa Watch Tower Society nahimong dakong tabang, kay isulat sa iyang mga bisita ang ilang ngalan diha sa petsa sa ilang pagduaw. Busa makapahinumdom ako kaniya nga dili lamang ako ang iyang bisita, sanglit halos katunga sa mga petsa puno man sa mga ngalan! Lain pa, siya nakadawat ug maayo kaayong pag-atiman sa mga empliyado diha sa balay-alimahan tungod kay sila nahibalo nga daghan kaayo ang interesado sa iyang kaayohan. Salamat kaninyo alang niini.
W. J. H., Tinipong Bansa
Ang akong inahan, nga naparalisar gikan sa hawak hangtod sa tiil, nag-antos sa pagkadili-makapugong. Kada buntag amo siyang trapohan ug ilisan ang iyang mga gamit sa higdaanan. Siya ginailisan ug ginahungitan, ug kanunay siyang nagkinahanglag medikal nga pag-atiman. Ang akong bana ug mga anak tinuod nga nagapaluyo, apan ang dakong bahin sa responsabilidad nahulog kanako. Usahay bation ko ang kaluya, ug ang espiritu sa paghikaw sa kaugalingon kanunay nga gikinahanglan. Busa uban sa dako kaayong kalipay nga nagbasa ako sa inyong mga artikulo. Salamat gikan sa kinailadman sa akong kasingkasing.
L. D., Italya
Panig-ingnan Alang sa mga Igsoon Ang inyong artikulo “Mga Batan-on Nangutana . . . Sa Unsang Paagi Mahimo Akong Panig-ingnan sa Akong Manghod nga mga Lalaki ug Babaye?” nakatandog kaayo kanako. (Abril 8, 1991) Sanglit ako ang kamagulangan sa tulo ka anak, ang ikaingon ko lang nga maayo pa untag nabasa ko kining mga artikuloha sa batan-on pa ako. Ako karon duna nay duha ka anak ug nahupayan nga sila adunay maayong mga tambag nga pagasundon.
L. K., Alemanya
Pagbantay ug Bata Salamat kaayo sa inyong artikulo “Mga Batan-on Nangutana . . . Sa Unsang Paagi Mahimo Akong Maayong Tigbantay ug Bata?” (Marso 8, 1991) Nadawat ko kini gikan sa buson samtang nagbantay sa akong sayis anyos nga igsoong lalaki. Samtang gibasa ko kana, akong gisultihan siya sa paghipos sa iyang mga dulaan. Unya nahiabot ako sa parapo nga naghisgot nga ang pagganti sa maayong batasan mosalir kay sa paghulga. Akong gisulayan kini, ug kini misalir! Giapresyar ko usab ang bahin nga kini naghisgot nga dili maayo ang pagtawag sa bata nga buang o kuwanggol. Ginatawag ko siya nga buang, ug karon ako nakaamgo nga kini kabuangan kanako.
A. L., Tinipong Bansa
Asbestos Ingong usa ka nabansay nga Tigtrabaho sa Proyekto Labot sa Asbestos, buot kong ipahayag nga nalingaw kaayo ako sa timbang nga artikulo mahitungod sa “Ang Kasaysayan sa Asbestos.” (Marso 22, 1991) Ingong bahin sa akong pagbansay, nakadungog akog mga pakigpulong gikan sa mga espesyalista sa kanser. Gipamatud-an sa usa ka doktor nga ang imong purohan nga maapektohan sa asbestos mas dako kon ikaw manabako. Sa naandan, ang inyong mga artikulo tukma ug undanon.
J. M., Tinipong Bansa
Lupus Gipadalhan ako sa akong uyoan ug artikulo nga dunay estorya bahin kang Robin Kanstul “Sa Unsang Paagi Ako Nagkinabuhi Uban sa Lupus.” (Mayo 8, 1990) Akong nabasa ang tibuok masasin ug nalingaw niana. Ako usab dunay lupus, ug wala gayod ako sultihi sa mga doktor sa katunga nianang gipahayag sa artikulo. Salamat, Robin Kanstul, sa pagsulti kanako. Salamat, Pagmata!, sa pagpatik sa iyang sugilanon. Karon nahibalo na ako nga wala ako mag-inusara, ug ako nagtuon sa pagsagubang.
R. B., Tinipong Bansa