Sa Dihang ang Daang mga Samad Maalim
ANG batan-ong si Adeline Nako, nga gihisgotan sa pagsugod ning serye, nakaugmad ug dakong kayugot alang sa yutang-natawhan sa iyang mga apohan, ang Hapon. Sa dihang ang ubang mga bata motawag sa mga Hapones-Hawaiiano ug “Japs,” siya mosumbalik, “Kami mga Amerikano.” Siya nagpinta ug mga paskin nga nagaingon, “Paphaa Kanang mga Gahom sa Axis” ug nanguna sa kampanya sa pagpalit ug mga selyo alang sa gubat. Si Adeline nag-ingon: “Ako mapasigarbohon kaayo tungod sa 100th ug 442nd nga mga batalyon nga giapilan sa mga nisei, o ikaduhang-henerasyon sa mga Hapones-Amerikano, kinsa maisogong nakig-away dapig sa Amerika.”
Ugaling, samtang siya nagkaedad, siya misugod sa pagkahibulong: ‘Ngano nga kinahanglan magpatyanay ang mga tawo?’ Kining tanan morag sayop. ‘Ang mga Budhista nangentra sa gubat. Ang mga Kristiyano nangadto sa gubat. Silang tanan mga maut,’ iyang hunahuna. Samtang siya nagsugod pagtuon sa Bibliya uban sa tabang sa mga Saksi ni Jehova, iyang gihagit ang iyang magtutudlo nga Saksi pinaagi sa usa ka pangutana, “Kamo bang mga Saksi ni Jehova moadto sa gubat?”
Siya giingnan nga sila dili mobakyaw ug hinagiban sa pagpatay ni bisan kinsang tawo. Niadtong panahona ang gubat nagsilaob pa sa Uropa ingon usab sa Asia. Si Adeline nasayod nga ang mga Saksi sa Alemanya gipadala sa mga kampo konsentrasyon ug kadtong sa Estados Unidos gibilanggo tungod kay sila dili makig-away sa gubat. ‘Kini gayod ang matuod nga relihiyon,’ iyang hunahuna.
Malinawong Misyon
Samtang ang iyang kahibalo sa Bibliya nag-uswag, siya natukmod sa pagpahinungod sa iyang kinabuhi ngadto kang Jehova, ang Diyos sa Bibliya. Ang iyang debosyon sa “Diyos sa kalinaw” nakapalihok kaniya sa pagpalapad sa iyang gugma pinaagi sa pagsunod sa mga lakang sa lima ka Hapones-Hawaiiano nga miboluntaryo sa pag-adto sa Hapon dihadiha pagkatapos sa Gubat sa Kalibotan II. (Filipos 4:9) Sila maikagon kaayo nga motabang sa mga tawo sa yuta sa ilang mga apohan, nga mga kanhi kaaway pa, pinaagi sa pagwali ingong mga misyonero sa makapahupay nga maayong balita sa Gingharian gikan sa Bibliya.—Mateo 24:14.
Ang usa nga miboluntaryo sa pagtabang sa nadaot sa gubat nga yuta sa Hapon, si Shinichi Tohara, naghinumdom kon unsa ang iyang pagbati labot sa iyang misyon. “Akong gipalandong ang pagkamatinumanon sa mga tawong Hapones kon bahin sa pag-alagad sa mga tawhanong ginoo ug sa emperador,” siya nagtug-an. “Akong gihunahuna ang mga kamikaze nga piloto, kinsa minghatag sa ilang kinabuhi alang sa emperador pinaagi sa tinuyong pagdasmag sa ilang mga ayroplano sa mga bapor de guerra sa kaaway. Kon ang mga Hapones matinumanon sa mga tawo, akong gihunahuna, unsay ilang mabuhat kon ilang makaplagan ang matuod nga Ginoo, si Jehova?”
Tungod sa maong positibong mga panlantaw, sa 1949 kining mga boluntaryo mingsulod sa Tokyo, nga sa dili pa lang dugay nahimong kagun-oban tungod sa pagsulong sa kahanginan sa mga B-29. Unsa ang ilang nakaplagan diha sa mga payag taliwala sa kagun-oban? May pagkamaulawon nga mga tawo nga maoy kugihan nga mga trabahante. Tinuod, dihay mga tawo nga naghambin pag kaligutgot ug pagpihig. Bisan pa, daghan ang paborableng misanong sa mensahe sa kalinaw sa Bibliya.
Sa 1953, si Adeline mikuyog niadtong unang mga misyonero. Siya buot gayod nga motabang kanila nga gigutom ug giuhaw sa makapahupay nga mensahe nga makita diha sa Bibliya. Siya nakahibalag sab ug mga supakerong mga tawo sa iyang buluhatong pagsangyaw. Sila mosulti kaniya: “Kamong mga tawhana naghulog ug mga bomba atomika sa Hiroshima ug Nagasaki!”
“Buweno,” siya motubag, “kamo nahibalo nga ako gikan sa Hawaii. Ug ang Hapon mao ang unang miatake sa Pearl Harbor ug mipatayg daghang katawhan didto. Apan kana wala makapugong kanako sa pag-anhi sa Hapon sa pagsulti niining maayong balita sa katawhan dinhi.” Kana sa kasagaran makapakalma kanila, ug sila modawat sa literatura nga nagasaysay sa Bibliya.
Salamat sa maayong pundasyon nga gipahiluna niadtong unang mga misyonero gikan sa Hawaii ug ubang mga kayutaan, karon kapin nag 150,000 ka mga Hapon ang nahimong bahin sa panagsoon niadtong si kinsa dili na “makakat-on pa ug gubat.”—Isaias 2:4; 1 Pedro 2:17.
Kon sa Unsang Paagi ang Tanang Gubat Mohunong
Sa pagkatinuod, ang pag-ilhanay sa matag-usa ug ang pag-ugmad sa dili mahakogong gugma sa usag-usa maoy labing kinahanglanon alang sa kalinaw sa kalibotan. Ugaling, kana dili paigo. Ang mga tawo nga nahigugma sa kalinaw ug dunay mga higala sa pikas kiliran gipalihok usab alang sa gubat sa Pasipiko nga napugos ubos sa “arang pakamatarongon” nga mga hinungdan. Ang nasyonalistikong propaganda nakapukgo sa ilang kinaiyanhong mga kiling. Bisan tuod ang pila midumili sa pag-adto sa gubat bisan pag nameligrong ibanlod sa mga kampo konsentrasyon o bilanggoan, ang ilang mga gihimo, bisan tuod dalayegon, diyutay ra, kon naa man ugaling, epekto sa pagpugong sa kadasig alang sa gubat.
Sa dihang ang tibuok nasod giagak paingon sa gubat, labaw sa tawhanong kamot ang nagatultol. Kasagaran ang tanang nalangkit mopugos nga sila nagatinguha sa pagpugong sa gubat. Apan, dunay pila ka kusganong puwersa ang nagamando kanila batok sa ilang mga tinguha. Ang Bibliya nagapaila nga kanang kusganong puwersa mao “ang diyos niining sistema sa mga butang.” (2 Corinto 4:4) Tinuod, “ang tibuok kalibotan nahiluna diha sa gahom sa daotang usa,” si Satanas nga Yawa.—1 Juan 5:19; tan-awa usab ang Juan 12:31; 14:30.
Hinuon, ang Bibliya nagasaad nga “ang Diyos nga nagahatag sa kalinaw magadugmok kang Satanas.” (Roma 16:20) Ang pasiuna niining pagdugmok nahitabo didto sa langit mga 77 ka tuig ang milabay. Paminawi ang pagbatbat kon unsay nakit-an ni apostol Juan diha sa usa ka maukyabong panan-awon mga 18 ka siglo nga abante sa iyang katumanan sa 1914: “Ang gubat misilaob sa langit . . . Busa ang dakong dragon gitambog, ang karaan nga serpente, ang usa nga gitawag Yawa ug Satanas, nga nagalimbong sa tibuok pinuy-anang yuta; siya gitambog sa yuta, ug ang iyang mga manulonda gitambog uban kaniya.”—Pinadayag 12:7-9.
Sukad niadto si Satanas nga Yawa napugngan sa kasikbitan sa yuta. Pinaagi sa pagmaneobra sa mga politiko ug mga militarista samag mga tawo-tawo, siya nakapahinabog dili mabatbat nga mga pag-antos diha sa mga gubat niining siglo. Hinuon, ang iyang kakulang sa pailob nagasumbalik lamang sa iyang dakong kasuko, “kay nahibalo nga siya may mubo na lamang nga panahon.” (Pinadayag 12:12) Pinaagi sa kusgang mga kamot sa “Prinsipe sa Pakigdait,” si Jesu-Kristo, ang Diyos dili na magpalihok kang Satanas pagkatapos “sa gubat sa dakong adlaw sa Diyos nga Labing Gamhanan” sa “Har–Magedon.”—Isaias 9:6; Pinadayag 16:14, 16.
Dili sama sa tanang gubat nga gibugno sa mga tawo, ang sukdanan sa hustisya nga molungtad nianang umaabot nga gubat sa Diyos maoy absoluto. Kini ang sukdanan sa Maglalalang sa mga tawo, kinsa may kinasingkasing nga tinguha alang sa kaayohan sa katawhan. Dili sama sa mga politikal nga mga pangulo nga mopugos sa ilang katawhan sa pagpakiggubat, si Jehova, ang atong Maglalalang, magasulti sa iyang katawhan sama nga iyang gisultihan ang iyang nasod sa Israel sa mga adlaw ni Josapat sa Juda niadtong ikanapulo ka siglo W.K.P.: “Kamo dili kinahanglan nga makig-away niining maong gubat. Magpahamutang kamo sa walay lihok, ug tan-awa ang kaluwasan ni Jehova alang kaninyo.”—2 Cronicas 20:17.
Kay mapadpad na ang mga dag-om sa impluwensiya ni Satanas, ang matag tawo gikan sa tanang kanasoran makatagamtam sa tinuod nga kalinaw ug seguridad sa tibuok yuta. Unya ang mosunod nga mga kahimtang nga gitagna ni Isaias mamatuman na. “Tan-awa, ako nagabuhat ug bag-ong mga langit ug usa ka bag-ong yuta. Ang daang mga butang dili na pagahinumdoman ni motungha pa sa hunahuna.”—Isaias 65:17, The New English Bible.
Busa, kon unsa ang nahitabo sa Pearl Harbor dili na pagahinumdoman sa masakit nga paagi, ni ang mga biktima sa mga bomba atomika sa Hiroshima ug Nagasaki mohugyaw “Wala nay dugang Hiroshima!” Ngano? Sanglit ang mosunod nga mga pulong sa tagna ni Isaias mahimong tinuod alang sa tanang tawo sa yuta: “Siya [Diyos] sa tino magahukom sa mga kanasoran ug magatul-id sa mga butang labot sa daghang katawhan. Ug sila magasalsal sa ilang mga espada ngadto sa mga lipya sa daro ug sa ilang mga bangkaw ngadto sa mga galab. Ang nasod dili na mobakyaw ug espada batok sa laing nasod, ni sila makakat-on pa sa gubat.”—Isaias 2:4.
Ang katumanan ning mga tagnaa ginapahinabo na taliwala sa mga Saksi ni Jehova, nga karon naglangkob sa tibuok kalibotang panagsoon nga mga minilyon na ang gidaghanon. Kini nahimong labi pang dayag diha sa mga internasyonal nga kombensiyon sa mga Saksi ni Jehova nga ginabuhat sa nagkalainlaing dapit sa kalibotan. Ikaw mahimong bahin nianang internasyonal nga panaghiusa ug kalinaw. Umari ug pagtuon sa unsang paagi mahimong usa sa mga katawhan nga nakahimo na sa ‘pagsalsal sa ilang mga espada ngadto sa mga lipya sa daro ug sa ilang mga bangkaw ngadto sa mga galab,’ nga wala na “makakat-on pa sa gubat,” ug nga nagalantaw sa umaabot sa usa ka paraiso unya dinhi sa yuta, kon asa wala na gayoy mahitabong gubat.—Salmo 46:8, 9.
[Hulagway sa panid 9]
Si Jerry ug Yoshi Toma, si Shinichi ug Masako Tohara, ug si Elsie Tanigawa mingboluntaryo sa pagtabang sa ilang mga kanhi-kaaway
[Hulagway sa panid 10]
Karong adlawa ang internasyonal nga kapunongan sa mga magsoon nagasimba sa Diyos nga may panaghiusa ug pakigdait